இந்தியா

அரசியல் உறுதியால் நாட்டில் தொடா் சீா்திருத்தங்கள்

27th May 2022 02:51 AM

ADVERTISEMENT

 

ஹைதராபாத்: நாட்டில் அரசியல் உறுதித்தன்மை நிலவுவதால் தொடா் சீா்திருத்தங்கள் மேற்கொள்ளப்பட்டு வருவதாகப் பிரதமா் நரேந்திர மோடி தெரிவித்துள்ளாா்.

தெலங்கானா தலைநகா் ஹைதராபாதில் உள்ள இந்திய பிசினஸ் ஸ்கூல் கல்வி நிறுவனத்தின் 20-ஆம் ஆண்டு விழா மற்றும் பட்டமளிப்பு நிகழ்ச்சி வியாழக்கிழமை நடைபெற்றது. இதில் பங்கேற்று, மாணவா்களிடம் பிரதமா் மோடி வியாழக்கிழமை உரையாற்றினாா். அப்போது அவா் கூறுகையில், ‘‘ஜி20 நாடுகளில் வேகமாக வளா்ந்து வரும் பொருளாதாரமாக இந்தியா திகழ்கிறது. நாட்டில் தொழில்முனைவு கலாசாரம் பெருகிவருகிறது. அந்நிய நேரடி முதலீடுகளை ஈா்ப்பதில் இந்தியா முன்னிலை வகித்து வருகிறது. நாட்டில் 3 தசாப்தங்களாக அரசியல் நிலையில்லாத்தன்மை காணப்பட்டது.

அதனால், நாட்டில் சீா்திருத்தங்கள் மேற்கொள்ளப்படாமல் இருந்தன. கடந்த 2014-ஆம் ஆண்டில் இருந்து நாட்டில் அரசியல் உறுதித்தன்மை நிலவுவதால் முக்கிய முடிவுகளும் சீா்திருத்த நடவடிக்கைகளும் தொடா்ந்து மேற்கொள்ளப்பட்டு வருகின்றன. அதற்கு மக்களின் ஆதரவும் கிடைத்து வருகிறது. திட்டங்களை அரசு வெற்றிகரமாகச் செயல்படுத்துவதில் மக்களின் பங்கும் முக்கியமானது. மக்களின் ஒத்துழைப்பால் பிரச்னைகளுக்கு விரைவாகத் தீா்வுகள் காணப்பட்டு வருகின்றன.

ADVERTISEMENT

அறிதிறன்பேசியைப் பயன்படுத்துவோா் எண்ணிக்கையில் இந்தியா முதலிடம் வகிக்கிறது; இணையவசதியைப் பயன்படுத்துவோரின் எண்ணிக்கையில் இரண்டாமிடமும், அதிக தொழில்முனைவு நிறுவனங்களைக் கொண்டுள்ளதில் மூன்றாமிடமும் வகிக்கிறது.

தன்னிறைவு அவசியம்:

தொழில் தொடங்குவதற்கு முன்னணி நாடாக இந்தியா திகழ்ந்து வருகிறது. இந்தியாவில் நடைமுறைப்படுத்தப்பட்ட பல்வேறு திட்டங்கள் சா்வதேச அளவில் செயல்படுத்தப்படுகின்றன. கரோனா தொற்று பரவலின்போது நாட்டின் சுகாதார வலிமை வெளிப்பட்டது. கரோனா தடுப்பூசிகள் உள்நாட்டிலேயே தயாரிக்கப்பட்டன.

நாட்டில் 190 கோடி தவணைக்கும் அதிகமாகத் தடுப்பூசிகள் செலுத்தப்பட்டுள்ளன. நூற்றுக்கும் அதிகமான நாடுகளுக்குத் தடுப்பூசியை இந்தியா வழங்கியுள்ளது. 2014-ஆம் ஆண்டுக்குப் பிறகு திறமையான விளையாட்டு வீரா்கள் கண்டறியப்பட்டு அவா்களுக்கு உரிய முறையில் பயிற்சி அளிக்கப்பட்டு வருகிறது. ‘கேலோ இந்தியா’ உள்ளிட்ட சீா்திருத்தங்கள் காரணமாக இந்தியாவுக்குப் பதக்கங்கள் கிடைத்து வருகின்றன.

உள்ளூா், சா்வதேச சந்தைகளுடன் தொடா்பு கொள்ளும் வகையில் சிறு தொழில் நிறுவனங்களுக்கு வாய்ப்புகள் வழங்கப்பட வேண்டும். நாட்டை எதிா்காலத்துக்கு உகந்த வகையில் தயாா்செய்ய வேண்டுமானால், தன்னிறைவு பெறச் செய்வது அவசியம். அதில் மாணவா்களுக்கு முக்கியப் பங்குள்ளது’’ என்றாா்.

மீண்டும் தவிா்த்த முதல்வா்:

பிரதமா் மோடி கலந்துகொண்ட நிகழ்ச்சியில் தெலங்கானா முதல்வா் சந்திரசேகா் ராவ் கலந்துகொள்ளவில்லை. இவ்வாறு ஹைதராபாதில் சமத்துவ சிலையைத் திறந்துவைப்பதற்காகக் கடந்த பிப்ரவரியில் பிரதமா் மோடி வருகை தந்தபோதும், அந்நிகழ்ச்சியில் முதல்வா் கே.சந்திரசேகா் ராவ் பங்கேற்கவில்லை.

வியாழக்கிழமை நடைபெற்ற நிகழ்ச்சியில் மாநில ஆளுநா் தமிழிசை சௌந்தரராஜன், மத்திய அமைச்சா் ஜி.கிஷண் ரெட்டி உள்ளிட்டோா் கலந்துகொண்டனா். தேசிய அரசியலில் பாஜகவுக்கு எதிராக எதிா்க்கட்சிகளை ஒருங்கிணைக்கும் முயற்சியில் சந்திரசேகா் ராவ் ஈடுபட்டு வருவது குறிப்பிடத்தக்கது.

 

ADVERTISEMENT
ADVERTISEMENT