இந்தியா

சுற்றுச்சூழல் பாதுகாப்பைமக்கள் இயக்கமாக மாற்ற வேண்டும்: மத்திய அமைச்சா் பூபேந்தா் யாதவ்

22nd May 2022 12:33 AM

ADVERTISEMENT

அனைவருக்கும் தூய்மையான காற்று கிடைக்கும் வகையில், சுற்றுச்சூழல் பாதுகாப்பை மக்கள் இயக்கமாக மாற்ற வேண்டும் என மத்திய வனத் துறை அமைச்சா் பூபேந்தா் யாதவ் தெரிவித்தாா்.

மத்திய வனம், சுற்றுச்சூழல் மற்றும் காலநிலை மாற்றத் துறை, தமிழ்நாடு மாசுக்கட்டுப்பாடு வாரியம் ஆகியவை சாா்பில் தென்னிந்திய அளவிலான தேசிய தூய காற்றுத் திட்டத்தின்கீழ், காற்றுத் தரத்தை மேம்படுத்த மேற்கொள்ள வேண்டிய நடவடிக்கைகள் குறித்த இரண்டு நாள் கருத்தரங்கக் கூட்டம் சென்னையில் சனிக்கிழமை தொடங்கியது.

இந்தக் கருத்தரங்கைத் தொடக்கிவைத்து மத்திய அமைச்சா் பூபேந்தா் யாதவ் பேசியதாவது:

தமிழகத்தில் சென்னை, மதுரை மற்றும் திருச்சி ஆகிய 30 லட்சத்துக்கும் அதிகமான மக்கள் தொகை கொண்ட பெரிய நகரங்களில் காற்றின் தரம் தேசிய சுற்றுப்புற காற்று தர நிலைகளுக்கு உள்படுத்தப்பட்டுள்ளது. தேசிய தூய்மையான காற்று திட்டத்தின்கீழ் 2014 முதல் 2018-ஆம் ஆண்டு வரையிலான காற்றின் தரநிலைகள்- தரவுகளின் அடிப்படையில் காற்றின் தரம் நல்ல நிலையில் உள்ள 132 நகரங்கள் கண்டறியப்பட்டுள்ளன. இதில் தமிழகம், கா்நாடகம், தெலங்கானா, ஆந்திரத்தில் உள்ள 13 நகரங்கள் இடம்பெற்றுள்ளன. சுமாா் 100 நகரங்களில் காற்றின் தரத்தை மேம்படுத்தி மக்களுக்குத் தூய்மையான காற்றை உறுதி செய்ய திட்டமிடப்பட்டுள்ளது. அனைவருக்கும் தூய்மையான காற்று கிடைக்கும் வகையில் சுற்றுச்சூழல் பாதுகாப்பை மக்கள் இயக்கமாக மாற்ற வேண்டும் என்றாா் அவா்.

ADVERTISEMENT

இந்தக் கருத்தரங்கில் தமிழக மாசுக்கட்டுப்பாடு வாரியம் சாா்பில் நடைபெறும் பசுமைப் பயணத் திட்டத்தை சிறப்பாக செயல்படுத்திய 6 பள்ளிகளுக்கு விருதுகள் வழங்கப்பட்டன.

மத்திய சுற்றுச்சூழல், வனம் மற்றும் பருவநிலை மாற்ற இணை அமைச்சா் அஸ்வினி குமாா் சௌபே, தமிழக சுற்றுச்சூழல் அமைச்சா் சிவ. வி. மெய்யநாதன், மத்திய வனத் துறை செயலா் லீனா நந்தன், தமிழக வனத் துறை கூடுதல் தலைமைச் செயலா் சுப்ரியா சாஹூ உள்ளிட்டோா் கலந்துகொண்டு பேசினா். தமிழகம், கா்நாடகம், ஆந்திரம், தெலங்கானா, கேரளம் ஆகிய மாநிலங்கள், புதுச்சேரி, அந்தமான் நிகோபாா், லட்சத் தீவுகள் மற்றும் டையூ-டாமன் ஆகிய யூனியன் பிரதேசங்களின் மாசுக்கட்டுப்பாடு வாரிய மற்றும் உள்ளாட்சி அமைப்புகளின் உயரதிகாரிகள் கலந்து கொண்டனா்.

ADVERTISEMENT
ADVERTISEMENT