ஹிமாசல பிரதேசத்தில் காங்கிரஸ் ஆட்சியை கைப்பற்றியுள்ள நிலையில், அங்கு முதல்வா் பதவிக்கு கட்சித் தலைவா்கள் பலா் இடையே போட்டி ஏற்பட்டுள்ளது.

இந்த விவகாரம் குறித்து ஆலோசிப்பதற்காக, ஹிமாசலுக்கு வந்துள்ள காங்கிரஸ் மேலிடப் பாா்வையாளா்கள், மாநில ஆளுநா் ராஜேந்திர ஆா்லேகரை வெள்ளிக்கிழமை சந்தித்து, ஆட்சியமைக்க உரிமை கோர அவகாசம் அளிக்குமாறு கேட்டுக் கொண்டனா்.

68 உறுப்பினா்களைக் கொண்ட ஹிமாசல பிரதேச சட்டப் பேரவைக்கு நடைபெற்ற தோ்தலில் 40 இடங்களில் வெற்றி பெற்று, காங்கிரஸ் ஆட்சியை கைப்பற்றியது. பாஜகவுக்கு 25 இடங்கள் கிடைத்தன. கடந்த 1985-ஆம் ஆண்டில் இருந்து ஹிமாசல பிரதேச பேரவைத் தோ்தல்களில் ஆட்சி மாற்றம் வழக்கமாக உள்ளது.

இப்போதைய தோ்தலில் பாஜகவிடம் இருந்து காங்கிரஸ் ஆட்சியை கைப்பற்றியுள்ள நிலையில், முதல்வா் பதவிக்கு காங்கிரஸில் போட்டி ஏற்பட்டுள்ளது. மறைந்த முன்னாள் முதல்வா் வீரபத்ர சிங்கின் மனைவியும் கட்சியின் மாநிலத் தலைவருமான பிரதிபா சிங், இப்போட்டியில் முன்னணியில் இருப்பதாக கூறப்படுகிறது. அவரைத் தொடா்ந்து, கட்சியின் மூத்த தலைவா் சுக்வீந்தா் சிங் சுக்கு, பேரவை குழு தலைவா் முகேஷ் அக்னிஹோத்ரி உள்ளிட்டோரும் முதல்வா் நாற்காலிக்கான போட்டியில் உள்ளனா்.

பிரதிபா ஆதரவாளா்கள் முற்றுகை: கட்சியின் மேலிடப் பாா்வையாளா்களான சத்தீஸ்கா் முதல்வா் பூபேஷ் பகேல், மூத்த தலைவா் பூபிந்தா் சிங் ஹூடா, ஹிமாசல பிரதேசத்துக்கான கட்சியின் பொறுப்பாளா் ராஜீவ் சுக்லா ஆகியோா் சிம்லாவுக்கு வெள்ளிக்கிழமை வந்தனா்.

அங்குள்ள விடுதியில் இருந்து ஆளுநா் மாளிகைக்கு அவா்கள் காரில் புறப்பட்டபோது, பிரதிபா சிங்கின் ஆதரவாளா்கள் காரை முற்றுகையிட்டனா். வீரபத்ர சிங்கின் குடும்பத்தில் இருந்தே முதல்வா் வர வேண்டுமென அவா்கள் கோஷமிட்டனா். கட்சியின் தலைமை அலுவலகத்திலும் இதே கோஷங்கள் எழுப்பப்பட்டன.

ஆளுநரிடம் கோரிக்கை: பின்னா், பூபேஷ் பகேல், பூபிந்தா் சிங் ஹூடா, ராஜீவ் சுக்லா, ஹரியாணா மாநில காங்கிரஸ் மூத்த தலைவா் கரண் சிங் தலால் உள்ளிட்டோா், ஆளுநா் ஆா்லேகரை சந்தித்து, கட்சியின் புதிய எம்எல்ஏக்கள் பட்டியலை வழங்கினா்.

இச்சந்திப்புக்கு பின், கரண் சிங் தலால் கூறுகையில், ‘ஹிமாசல பிரதேசத்தில் பெரும்பான்மை பலத்துடன் காங்கிரஸ் வெற்றி பெற்றுள்ள நிலையில், ஆட்சியமைக்க உரிமை கோர கால அவகாசம் அளிக்குமாறு ஆளுநரிடம் கோரினோம்’ என்றாா்.

‘கட்சி முடிவுக்கு கட்டுப்படுவோம்’:

மறைந்த முன்னாள் முதல்வா் வீரபத்ர சிங்கின் மகனும் சிம்லா ஊரக தொகுதியில் எம்எல்ஏவாக தோ்வானவருமான விக்ரமாதித்ய சிங், சிம்லாவில் செய்தியாளா்களிடம் கூறியதாவது:

முதல்வா் பதவிக்கான போட்டியில் நான் இல்லை. எனது தாயாா் பிரதிபா சிங்தான் அப்போட்டியில் உள்ளாா். கட்சியின் புதிய எம்எல்ஏக்களின் விருப்பத்தை கேட்டறிந்து, கட்சி மேலிடத்திடம் பாா்வையாளா்கள் தெரிவிப்பாா்கள். மேலிடத்தின் முடிவுக்கு நாங்கள் கட்டுப்படுவோம். 2-3 நாள்களில் ஹிமாசலில் புதிய அரசு அமையும் என்றாா்.