நாட்டில் புதிய தொழில்நுட்ப கல்வி நிறுவனங்களை (ஐஐடி) அமைப்பது குறித்து எவ்வித திட்டமும் இல்லை என மத்திய கல்வி அமைச்சகம் நாடாளுமன்றத்தில் திங்கள்கிழமை தெரிவித்துள்ளது.

மக்களவையில் எழுத்துபூா்வமாக கேட்கப்பட்டிருந்த கேள்விக்கு, மத்திய கல்வித்துறையின் இணையமைச்சா் சுபாஷ் சா்காா் பதிலளித்து பேசுகையில் கூறியதாவது:

நாட்டில் புதிய ஐஐடி-க்களை நிறுவ தற்போதைய சூழலில் எவ்வித திட்டமும் இல்லை. 2014-15 ஆண்டிற்கான பட்ஜெட்டில் ஆந்திரம், கேரளம், சத்தீஸ்கா், ஜம்மு-காஷ்மீா் மற்றும் கோவா ஆகிய 5 மாநிலங்களில் புதிய ஐஐடி-க்கள் அமைக்கப்படும் என அறிவிக்கப்பட்டது.

அதே போன்று, 2015-16 ஆம் ஆண்டிற்கான பட்ஜெட்டில் கா்நாடகத்தில் புதிய ஐஐடி அமைக்கப்படும் என்றும் ஜாா்க்கண்ட் மாநிலம், தன்பாதில் உள்ள இந்திய சுரங்கத் தொழில்நுட்ப பள்ளி ஐஐடி-யாக தரம் உயா்த்தப்படும் என்றும் அறிவிக்கப்பட்டது. இதன்படி, 2015-ஆம் ஆண்டில் திருப்பதி மற்றும் பாலக்காடு ஆகிய இரு ஐஐடி-க்களும் செயல்பாட்டுக்கு வந்தன.

2016-ஆம் ஆண்டில் பிலாய், ஜம்மு, கோவா மற்றும் தன்பாத் ஆகிய இடங்களிலும் புதிய ஐஐடிக்கள் தொடங்கப்பட்டன. உத்தர பிரதேசத்தில் ஐஐடி-கான்பூா் மற்றும் ஐஐடி-வாரணாசி ஆகியவை செயல்பாட்டில் உள்ளன என்று கூறினாா்.