இந்தியா

வெங்கையா நாயுடு தலைமையில் மாநிலங்களவை செயல்திறன் அதிகரிப்பு

9th Aug 2022 03:00 AM

ADVERTISEMENT

குடியரசு துணைத் தலைவா் வெங்கையா நாயுடுவின் திறன்மிக்க தலைமையின் காரணமாக மாநிலங்களவையின் செயல்திறன் 70 சதவீதம் அதிகரித்துள்ளதாக பிரதமா் நரேந்திர மோடி புகழாரம் சூட்டினாா்.

குடியரசு துணைத் தலைவா் வெங்கையா நாயுடுவின் பதவிக் காலம் புதன்கிழமையுடன் (ஆக. 10) நிறைவடைகிறது. அடுத்த குடியரசு துணைத் தலைவராகத் தோ்ந்தெடுக்கப்பட்டுள்ள ஜகதீப் தன்கா், ஆகஸ்ட் 11-ஆம் தேதி பதவியேற்கவுள்ளாா்.

இந்நிலையில், குடியரசு துணைத் தலைவரும் மாநிலங்களவைத் தலைவருமான வெங்கையா நாயுடுவுக்கான பிரிவு உபசார நிகழ்ச்சி மாநிலங்களவையில் திங்கள்கிழமை நடைபெற்றது. கட்சி வேறுபாடின்றி தலைவா்கள் பலரும் வெங்கையா நாயுடு தொடா்பான தங்கள் நினைவுகளைப் பகிா்ந்து கொண்டனா். அவரது சிறப்புகளையும் மாநிலங்களவை எம்.பி.க்கள் பாராட்டிப் பேசினா்.

அப்போது பிரதமா் நரேந்திர மோடி பேசியதாவது: கடந்த 5 ஆண்டு காலத்தில் மாநிலங்களவைத் தலைவராக வெங்கையா நாயுடு செயல்பட்டபோது, அவை செயல்படும் விதத்தை மேம்படுத்தியுள்ளாா். அவரது தலைமையின் கீழ் அவையின் செயல்திறன் 70 சதவீதம் அதிகரித்துள்ளது; அவை உறுப்பினா்களின் வருகைப் பதிவும் அதிகரித்துள்ளது.

ADVERTISEMENT

ஆழமான கருத்துகள்: வெங்கையா நாயுடு அவைத் தலைவராகத் திகழ்ந்த 5 ஆண்டு காலத்தில் மாநிலங்களவையில் 177 மசோதாக்கள் மீது விவாதம் நடத்தப்பட்டோ அல்லது ஒப்புதல் பெறப்பட்டோ உள்ளது. ஒற்றைவரியில் அவா் கூறும் கருத்துகள் அனைத்தும் சிந்தனையைத் தூண்டுபவையாகவே அமைந்துள்ளன. அவரது பேச்சை எவரும் மறுதலிக்க முடியாது என்பதும் குறிப்பிடத்தக்கது.

வெங்கையாவின் அனுபவமும் வழிகாட்டுதலும் எம்.பி.க்கள் பலருக்குப் பலனளித்திருக்கும். அதேவேளையில், சில எம்.பி.க்களை அவா் கடிந்துகொண்டதும் உண்டு. ஆனால், அதை எம்.பி.க்கள் பெரிதாக எடுத்துக்கொண்டிருக்கமாட்டாா்கள் என நம்புகிறேன்.

ஜனநாயகத்தின் முதிா்ச்சி: அவையைக் குறிப்பிட்ட அளவுக்கு மேல் முடக்குவது அவமானகரமானது என வெங்கையா நாயுடு கூறியிருக்கிறாா். அவரது கொள்கைகளில் ஜனநாயகத்தின் முதிா்ச்சியைக் காணலாம். வெங்கையா நாயுடு தொடா்ந்து ஊக்கமளித்துக் கொண்டே இருப்பாா். மாநிலங்களவை செயலகத்தின் திறனை மேம்படுத்தியது, தகவல்-தொழில்நுட்ப வசதிகளின் பயன்பாட்டை அதிகரித்தது, காகிதப் பயன்பாடில்லாத பணியை ஊக்குவித்தது ஆகியவை மாநிலங்களவையின் எதிா்கால செயல்பாட்டை மேம்படுத்தும்.

தாய்மொழிக்கு முக்கியத்துவம்: வெங்கையாவின் தலைமையில் மாநிலங்களவை புதிய உச்சத்தைத் தொட்டது. இந்திய மொழிகள் மீது அவருக்கு ஆா்வம் அதிகம். அவையை அவா் வழிநடத்திய விதமே இதை வெளிக்கொணரும். அவை உறுப்பினா்கள் தாய்மொழியில் பேசுவதை அவா் எப்போதும் ஊக்குவிப்பாா். குடியரசு துணைத் தலைவராக அவா் பங்கேற்ற நிகழ்ச்சிகளில் 25 சதவீதம், இளைஞா்கள் சாா்ந்தவையே. இளைஞா்களின் மேம்பாட்டுக்கு அவா் முக்கியத்துவம் அளித்துவந்தாா்.

சிறப்பு வாய்ந்த சுதந்திர தின விழா: நடப்பாண்டு சுதந்திர தின விழாவானது தனிச்சிறப்பு கொண்டதாகத் திகழப்போகிறது. நாட்டின் குடியரசுத் தலைவா், குடியரசு துணைத் தலைவா், மக்களவைத் தலைவா், பிரதமா் ஆகிய அனைவரும் நாடு சுதந்திரமடைந்த பிறகு பிறந்தவா்களாக உள்ளனா். அனைவரும் எளிமையான பின்னணியைக் கொண்டவா்கள் என்பதும் சிறப்புமிக்கது என்றாா் பிரதமா் மோடி.

ஊக்குவிக்க வேண்டும்: மாநிலங்களவை எதிா்க்கட்சித் தலைவா் மல்லிகாா்ஜுன காா்கே கூறுகையில், ‘வெங்கையா நாயுடுவை 40 ஆண்டுகளாகத் தெரியும். மாநிலங்களவையில் பல்வேறு மாற்றங்களை அவா் கொண்டுவந்துள்ளாா். அதீத பணி அழுத்தத்திலும் அவா் சிறப்பாகச் செயல்பட்டுள்ளாா். அரசியல்வாதி எப்போதும் ஓய்வு பெறுவதுமில்லை, சோா்வடைவதுமில்லை என அவா் அடிக்கடி கூறுவாா். இனி பொது வாழ்வில் அதிகம் ஈடுபட்டு இளைஞா்களை அவா் தொடா்ந்து ஊக்குவிக்க வேண்டும்’ என்றாா்.

பிரிவே கிடையாது: திமுக எம்.பி. திருச்சி சிவா கூறுகையில், ‘கட்டாய நிகழ்ச்சி என்பதால் மட்டுமே அவைத் தலைவருக்குப் பிரியாவிடை அளிக்கப்படுகிறது. இல்லையெனில் அவரைப் பிரிவது என்பதே கிடையாது. அவை எம்.பி.க்களைக் கட்டுப்பாட்டுடன் நடக்கவைப்பதில் சிங்கம் போல அவா் செயல்பட்டாா்.

மாநிலங்களவையில் மட்டுமே அரசமைப்புச் சட்ட அட்டவணையில் குறிப்பிடப்பட்டுள்ள 22 மொழிகளிலும் பேச முடியும். அது அவைத் தலைவரால் மட்டுமே சாத்தியமானது. வாழ்நாளில் அவா் பெற்ற அனுபவங்களை சுயசரிதையாக வெளியிட வேண்டும். அது நாட்டின் வளா்ச்சிக்கான பங்களிப்பாக இருக்கும்’ என்றாா்.

கண்கலங்கிய வெங்கையா: திரிணமூல் காங்கிரஸ் எம்.பி. டெரீக் ஓ பிரையன் பேசுகையில், வெங்கையா தன் குழந்தைப் பருவத்திலேயே தாயாரை இழந்தது தொடா்பாகக் குறிப்பிட்டாா். அப்போது வெங்கையா நாயுடு கண்கலங்கினாா்.

ஒய்எஸ்ஆா் காங்கிரஸின் விஜய் சாய் ரெட்டி, பிஜு ஜனதா தளத்தின் சஸ்மித் பத்ரா, சமாஜவாதியின் ராம்கோபால் யாதவ், ஆம் ஆத்மியின் சஞ்சய் சிங், மாா்க்சிஸ்ட் எம்.பி. ஜான் பிரிட்டாஸ், இந்திய கம்யூனிஸ்ட் எம்.பி. வினய் விஸ்வம் உள்ளிட்டோரும் வெங்கையா நாயுடுவைப் பாராட்டி பேசினா்.

மக்களவைத் தலைவா் நேரில் சந்திப்பு: பணி ஓய்வு பெறவுள்ள வெங்கையா நாயுடுவை மக்களவைத் தலைவா் ஓம் பிா்லா நேரில் சந்தித்துப் பேசினாா்.

குடியரசுத் தலைவா் ஆக விரும்பியதில்லை: வெங்கையா நாயுடு

பிரிவுபசார நிகழ்ச்சியில் வெங்கையா நாயுடு பேசுகையில், ‘நான் எப்போதும் நாட்டின் குடியரசுத் தலைவா் ஆக விரும்பியதில்லை. இனி அரசுக்கு எதிராகவும் மாறப் போவதில்லை. அதே நேரம் வீட்டிலேயே முடங்கியிருக்கவும் போவதில்லை. மக்களுடன் தொடா்ந்து தொடா்பில் இருப்பேன். அரசியலில் ஈடுபட மாட்டேன். நாம் எதிரிகள் அல்ல; போட்டியாளா்கள்.

மாநிலங்களவைக்குப் பெரும் பொறுப்பு உள்ளது. அங்கு விவாதம் நடைபெறுவதையே மக்கள் விரும்புகின்றனா். அமளியை ஒருபோதும் அவா்கள் விரும்புவதில்லை. மாணவா்கள் முதல் கிராம மக்கள் வரை அனைத்துத் தரப்பினரும் நாடாளுமன்ற நடவடிக்கைகளை உற்றுநோக்கத் தொடங்கிவிட்டனா். எனவே, நாடாளுமன்றம் முறையாகச் செயல்பட வேண்டுமென்றே விரும்புகிறேன்’ என்றாா்.

ADVERTISEMENT
ADVERTISEMENT