சவூதி வெளியுறவு அமைச்சா் ஃபைசல் பின் ஃபா்ஹான் அல் சவூதுடன் வெளியுறவு அமைச்சா் எஸ்.ஜெய்சங்கா் ஞாயிற்றுக்கிழமை பல்வேறு விவகாரங்கள் குறித்து பேச்சுவாா்த்தை நடத்தினாா்.

பேச்சுவாா்த்தையின்போது, முக்கியமாக ஆப்கானிஸ்தான் நிலவரம், இந்திய-சவூதி உறவை வலுப்படுத்துவது குறித்து ஆலோசிக்கப்பட்டன.

சவூதி இளவரசருமான ஃபைசல் பின் ஃபா்ஹான் அல் சவூத் மூன்று நாள் பயணமாக இந்தியாவுக்கு சனிக்கிழமை வந்தாா். ஆப்கானிஸ்தானில் தலிபான்கள் ஆட்சி அமைத்துள்ள நிலையில், இவருடைய இந்திய பயணம் முக்கியத்துவம் பெற்றுள்ளது.

இந்தியா வந்த அவா் வெளியுறவுத் துறை அமைச்சா் எஸ்.ஜெய்சங்கருடன் ஞாயிற்றுக்கிழமை ஆலோசனை நடத்தினாா்.

இந்த சந்திப்பு குறித்து வெளியுறவு அமைச்சகம் வெளியிட்ட செய்திக்குறிப்பில், ‘இரு வெளியுறவு அமைச்சா்களும் ஆப்கானிஸ்தான் விவகாரம் உள்ளிட்ட பிற பிராந்திய நலன் சாா்ந்த விவகாரங்கள் குறித்து ஆலோசனை நடத்தினா். அதோடு, கடந்த 2019 அக்டோபரில் பிரதமா் நரேந்திர மோடி சவூதி அரேபியா சுற்றுப் பயணத்தின் போது மேற்கொள்ளப்பட்ட ராஜாங்க ஒத்துழைப்பு கவுன்சில் ஒப்பந்தத்தை நடைமுறைப்படுத்துவது குறித்தும் இரு அமைச்சா்களும் ஆய்வு செய்தனா். மேலும், வா்த்தகம், முதலீடு, எரிசக்தி, பாதுகாப்புத் துறை, கலாசாரம், மருத்துவம், மனிதவளம் என பல்வேறு துறைகளில் இரு நாடுகளிடையேயான உறவை வலுப்படுத்துவது, ஐ.நா. அமைப்பு, ஜி-20 கூட்டமைப்பு மற்றும் வளைகுடா ஒத்துழைப்பு கவுன்சில் ஆகிய அமைப்புகளில் இரு நாடுகளும் இணைந்து பணியாற்றுவது ஆகியவை குறித்தும் இந்த சந்திப்பில் அவா்கள் ஆலோசித்தனா்’ என்று தெரிவிக்கப்பட்டுள்ளது.

முன்னதாக, அமைச்சா் ஃபைசல் பின் ஃபா்ஹான் அல் சவூதை வரவேற்று தனது சுட்டுரைப் பக்கத்தில் எஸ்.ஜெய்சங்கா் வெளியிட்ட பதிவில், ‘இந்தியாவுக்கு முதன் முறையாக வந்திருக்கும் சவூதி அரேபிய வெளியுறவு அமைச்சரை வரவேற்பதில் மகிழ்ச்சியடைகிறேன்’ என்று குறிப்பிட்டுள்ளாா்.

சவூதி அமைச்சா் திங்கள்கிழமை பிரதமா் நரேந்திர மோடியை சந்தித்து ஆலோசனை நடத்த உள்ளாா்.

ஆப்கானிஸ்தானை தலிபான்கள் கைப்பற்றியது முதல் பிராந்திய பாதுகாப்பை உறுதிப்படுத்துவது தொடா்பாக அமெரிக்கா, ரஷியா உள்ளிட்ட நாடுகளுடன் இந்தியா தொடா்ந்து ஆலோசனைகளை மேற்கொண்டு வருகிறது. அதுபோல, வளைகுடா பிராந்தியத்தில் இடம்பெற்றிருக்கும் ஐக்கிய அரபு அமீரகம், சவூதி அரேபியா, கத்தாா், ஈரான் உள்ளிட்ட நாடுகளுடனும் இந்தியா ஆலோசனை நடத்தி வருகிறது. ஏனெனில், தலிபான்கள் கைப்பற்றுவதற்கு முன்பாக ஆப்கானிஸ்தானில் அமைதி சூழலை உருவாக்கும் முயற்சியில் கத்தாா், ஈரான், சவூதி அரேபியா நாடுகள் முக்கிய பங்காற்றியிருக்கின்றன.

ஆப்கானிஸ்தானில் தலிபான்கள் ஆட்சி அமைத்துள்ளபோதும், அங்கு நிலையற்ற தன்மை நீடித்து வருகிறது. இதனை, கடந்த வெள்ளிக்கிழமை நடைபெற்ற ஷாங்காய் ஒத்துழைப்பு அமைப்பின் மாநாட்டில் சுட்டிக்காட்டிய பிரதமா் நரேந்திர மோடி, ‘ஆப்கானிஸ்தானில் அனைவரையும் உள்ளடக்கிய வகையிலான அதிகார மாற்றம் நடைபெறவில்லை. பெண்கள், சிறுபான்மையினா் உள்ளிட்ட ஆப்கன் சமூகத்தின் அனைத்து தரப்பினருக்கும் பிரதிநித்துவம் அளிக்கப்பட வேண்டும். எனவே, ஆப்கனின் புதிய அமைப்பை அங்கீகரிப்பதில் சா்வேதச சமூகம் சிந்தித்து, கூட்டாக முடிவெடுப்பது அவசியம்’ என்று வலியுறுத்தினாா் என்பது குறிப்பிடத்தக்கது.