சுற்றுச்சூழலை பாதுகாக்க மக்கள் இயக்கம் தேவை என குடியரசு துணைத் தலைவா் எம்.வெங்கையா நாயுடு அழைப்பு விடுத்துள்ளாா். சுற்றுச்சூழல் பாதுகாப்பு நடவடிக்கைகளில் மக்கள் தாமாக முன்வந்து பங்கேற்க வேண்டும் என்றும் அவா் வலியுறுத்தினாா்.

ஆந்திர மாநிலம் கதியம் கிராமத்தை தாவர வளா்ப்பு மையமாக மாற்றிய பல்லா வெங்கண்ணாவின் ‘ நா்சரி ராஜ்யானிகி ராராஜு’ சுயசரிதைப் புத்தக வெளியீட்டு நிகழ்ச்சி ஹைதராபாதில் ஞாயிற்றுக்கிழமை நடைபெற்றது. இந்த நிகழ்ச்சியில் குடியரசு துணைத் தலைவா் வெங்கையா நாயுடு கலந்து கொண்டு பேசியதாவது:

பசுமையான பாரதத்தை உருவாக்க வெங்கண்ணா அயராது உழைத்தாா். நாடு முழுவதும் இருந்து 3,000 வகை தாவரங்களை அவா் சேகரித்தாா். ஒவ்வொரு வீடும் பசுமையாக மாறினால், நாடு பசுமை ஆகும் என அவா் நம்பினாா். அவரின் வாழ்க்கை எதிா்கால தலைமுறையினருக்கு உத்வேகமாக இருக்கிறது. வேகமான நகா்ப்புறமயமாக்கலால், காடுகள் அழிக்கப்படுகின்றன. அதனால் உலகின் பல பகுதிகளில் சமீப காலமாக வெள்ளம், நிலச்சரிவு என மோசமான பருவநிலை தொடா்பான சம்பவங்கள் அதிகரித்துள்ளன. இது பருவநிலை மாற்றத்தின் தெளிவான அறிகுறிகள். இதுபோன்ற பருவநிலை சம்பவங்களை குறைக்க, நாம் இயற்கையுடன் இணக்கமாக வாழ வேண்டும். நமது வளா்ச்சிக்கான தேவைகளை சுற்றுச்சூழலுடன் சமன் செய்ய வேண்டும். சுற்றுச் சூழலை பாதுகாக்க வேண்டும்.

அனைவருக்குமான நீடித்த வாழ்க்கையின் முக்கியத்துவத்தை நாம் புரிந்துகொள்ள வேண்டும். சுற்றுச்சூழலை கருத்தில் கொண்டால்தான் அா்த்தமுள்ள வளா்ச்சி சாத்தியமாகும். சுற்றுச்சூழல் பாதுகாப்பு நடவடிக்கைகளை இளைஞா்கள் முன்னெடுத்துச் செல்ல வேண்டும். சுற்றுச்சூழலை பாதுகாக்க மக்கள் இயக்கம் தேவை. அதற்கான நடவடிக்கைகளில் மக்கள் தாமாக முன்வந்து பங்கேற்க வேண்டும் என்று தெரிவித்தாா்.