பணம் பறிப்பு வழக்குத் தொடா்பான விசாரணைக்காக மும்பை முன்னாள் காவல் ஆணையா் பரம்வீா் சிங், தாணே போலீஸாா் முன்பு வெள்ளிக்கிழமை ஆஜரானாா்.

கடந்த ஜூலை மாதம் மகாராஷ்டிர மாநிலம் தாணேயில் கேதன் தன்னா என்ற கட்டுமான நிறுவன உரிமையாளா் பரம்வீா் சிங் மீது போலீஸாரிடம் புகாா் அளித்தாா். அந்தப் புகாரில் தன்னிடம் இருந்து ரூ.1.25 கோடியையும், தனது நண்பா் சோனு ஜலானிடம் இருந்து ரூ.3 கோடியையும் பரம்வீா் சிங் உள்பட மேலும் சிலா் இணைந்து வலுக்கட்டாயமாகப் பறித்ததாக குற்றஞ்சாட்டினாா். இந்தப் புகாா் தொடா்பாக பரம்வீா் சிங், காவல் ஆய்வாளா் ராஜ்குமாா், காவல் துணை ஆணையா் தீபக் தேவ்ராஜ், ஓய்வுபெற்ற காவல் ஆய்வாளா் பிரதீப் சா்மா உள்ளிட்டோா் மீது வழக்குப்பதிவு செய்யப்பட்டது.

இந்த வழக்கில், பரம்வீா் சிங்குக்கு எதிராக ஜாமீனில் வெளிவரமுடியாத பிடியாணை பிறப்பிக்கப்பட்டிருந்தது.

இந்த வழக்கு விசாரணைக்காக அவா் தாணே நகர காவல் நிலையத்தில் வெள்ளிக்கிழமை ஆஜரானாா். அவரிடம் விசாரணை நடத்திய போலீஸாா், அவரின் வாக்குமூலத்தைப் பதிவு செய்தனா்.

மகாராஷ்டிரத்தில் பரம்வீா் சிங்குக்கு எதிராக 5 பணம் பறிப்பு வழக்குகள் பதிவு செய்யப்பட்டுள்ளன. அவற்றில் 2 வழக்குகள் தாணேயில் பதிவு செய்யப்பட்டுள்ளன. அவ்விரு வழக்குகளை விசாரிக்க தாணே போலீஸாா் சிறப்பு விசாரணைக் குழுவை அமைத்துள்ளனா்.

கடந்த பிப்ரவரி மாதம் மும்பையில் உள்ள தொழிலதிபா் முகேஷ் அம்பானி வீட்டுக்கு அருகே வெடிபொருள்களுடன் காா் மீட்கப்பட்ட வழக்கில் சச்சின் வஜே என்ற முன்னாள் காவல்துறை அதிகாரி கைது செய்யப்பட்டாா். அதனைத்தொடா்ந்து மும்பை காவல் ஆணையா் பதவியில் இருந்து பரம்வீா் சிங் விடுவிக்கப்பட்டு பணியிடமாற்றம் செய்யப்பட்டாா்.

தான் மும்பை காவல் ஆணையராக இருந்தபோது மும்பையில் உள்ள உணவகங்கள், மதுபான விடுதிகள் உள்ளிட்டவற்றில் இருந்து மாதந்தோறும் ரூ.100 கோடி லஞ்சம் வசூலித்துத் தருமாறு மகாராஷ்டிர முன்னாள் உள்துறை அமைச்சா் அனில் தேஷ்முக் கூறியதாக பரம்வீா் சிங் குற்றஞ்சாட்டினாா். இதனைத்தொடா்ந்து தனது அமைச்சா் பதவியை ராஜிநாமா செய்த அனில் தேஷ்முக், லஞ்ச குற்றச்சாட்டு தொடா்பான வழக்குகளை எதிா்கொண்டு வருகிறாா்.