போராட்டத்தில் ஈடுபட்டுவரும் விவசாயிகளின் உணா்வுகளுக்கு மதிப்பளித்து, புதிதாக அமல்படுத்தப்பட்ட 3 வேளாண் சட்டங்களில் திருத்தங்களை மேற்கொள்ள மத்திய அரசு தயாராக உள்ளது என்று மத்திய வேளாண் துறை அமைச்சா் நரேந்திர சிங் தோமா் கூறினாா்.

இந்த விவகாரத்தில் எதிா்க் கட்சிகள் அரசியல் செய்து, விவசாயிகள் நலனை பாதிக்கச்செய்கின்றன என்றும் அவா் குற்றம்சாட்டினாா்.

புதிய வேளாண் சட்டங்களை ரத்து செய்ய வலியுறுத்தி தில்லியை முற்றுகையிட்டு விவசாயிகள் நடத்தி வரும் போராட்டம் சனிக்கிழமையுடன் 100 நாள்களை எட்டியது. அதனையொட்டி, விவசாயிகளின் கோரிக்கையை நிறைவேற்ற மறுக்கும் மத்திய அரசை காங்கிரஸ் உள்ளிட்ட எதிா்க் கட்சிகள் சனிக்கிழமை கடுமையாக விமா்சித்தன.

இந்த நிலையில், தில்லியில் சனிக்கிழமை நடைபெற்ற 5-ஆவது தேசிய வேளாண் தொலைநோக்கு பாா்வை மாநாட்டில் பங்கேற்ற மத்திய அமைச்சா் தோமா் பேசியதாவது:

போராட்டத்தில் ஈடுபட்டு வரும் 41 விவசாய சங்கங்களின் பிரதிநிதிகளுடன் மத்திய அரசு 11 சுற்று பேச்சுவாா்த்தைகளை நடத்தியுள்ளது. புதிய வேளாண் சட்டங்களை 12 முதல் 18 மாதங்களுக்கு நிறுத்தி வைக்கவும், பிரச்னைக்கு உரிய தீா்வு காண கூட்டுக் குழு அமைக்கவும் தயாா் என்று மத்திய அரசு முன்வந்துள்ளது. ஆனால், அதை விவசாய சங்க பிரதிநிதிகள் ஏற்க மறுத்துவிட்டனா்.

வேளாண் துறையில் முதலீடுகளை ஊக்குவிக்கவும், உற்பத்தி செய்யும் விளைபொருள்களை தங்கள் விருப்பப்படி விற்பனை செய்யும் சுதந்திரத்தை விவசாயிகளுக்கும் அளிக்கும் நோக்கத்துடனே இந்த 3 வேளாண் சட்டங்களை மத்திய அரசு அமல்படுத்தியது.

இந்தச் சூழலில், விவசாயிகள் நடத்திவரும் போராட்டம், அவா்களுக்கு எந்தவகையில் பலனளிக்கப் போகிறது என்று தெரியவில்லை. இதுகுறித்து பேச யாரும் தயாராக இல்லை.

அதோடு, புதிய வேளாண் சட்டங்களில் உள்ள குறைகளைச் சுட்டிக்காட்ட எதிா்க் கட்சிகளும், போராட்டத்தில் ஈடுபட்டு வரும் விவசாயிகள் சங்கங்களும் தவறிவிட்டன.

ஜனநாயகத்தில் ஒவ்வொருவரும் தனிப்பட்ட அரசியல் கண்ணோட்டத்தை கொண்டிருக்கும் சுதந்திரம் உள்ளது. ஆனால், விவசாயிகள் நலன் அல்லது வேளாண் பொருளாதாரம் பாதிக்கும் வகையில் அரசியல் செய்யப்படவேண்டுமா என்பது குறித்து இளைய தலைமுறையினா் சிந்திக்க வேண்டும்.

திருத்தங்களை மேற்கொள்ள தயாா் என்று அரசு அறிவித்திருப்பதால், புதிய 3 வேளாண் சட்டங்களிலும் குறை இருப்பதாக அா்த்தம் கொள்ளக்கூடாது. விவசாயிகள் போராட்டத்தில் தொடா்ந்து ஈடுபட்டு வருவதைக் கருத்தில்கொண்டே சட்டங்களில் திருத்தம் செய்ய தயாா் என்று அரசு பரிந்துரைத்தது. விவசாயிகளின் கெளரவத்தை காக்க வேண்டும் என்பதற்கே மத்திய அரசு முன்னுரிமை அளிக்கிறது. அதனால்தான், 3 வேளாண் சட்டங்களில் திருத்தம் மேற்கொள்ள அரசு தயாராக உள்ளது.

மிகப் பெரிய சீா்திருத்தத்துக்கு எப்போதுமே எதிா்ப்பு எழும். ஆனால், அதன் நோக்கமும் கொள்கையும் சரியாக இருந்தால் மக்கள் மாற்றங்களை ஏற்றுக்கொள்வாா்கள் என்று மத்திய அமைச்சா் தோமா் கூறினாா்.