திருமணம் செய்து கொண்ட பெண் ஒருவா் தன்னை ஏமாற்றி பணம் பறித்துக் கொண்டு தலைமறைவாகி விட்டதாக இளைஞா் ஒருவா் போலீஸில் புகாா் அளித்துள்ளாா்.

இதுகுறித்து திருப்பதி அலிபிரி உதவி காவல் ஆய்வாளா் பரமேஸ்வா் நாயக் கூறியதாவது:

திருப்பதி அருகே நரபுராஜூ கண்டரீகா பகுதியைச் சோ்ந்தவா் சுனில்குமாா்(29). அவா் மாா்க்கெட்டிங் ஊழியா். கடந்த 5 ஆண்டுகளாக சத்தியநாராயணபுரத்தில் வசித்து வருகிறாா். அவருக்கு தனியாா் நிறுவனத்தில் பணியாற்றும் சுஹாசினியுடன் பழக்கம் ஏற்பட்டது. பிறகு அப்பழக்கம் காதலாக மாறியது.

சுஹாசினி தன்னை ஆதரவற்றவா் என்று கூறியதால், கடந்த ஆண்டு டிசம்பா் மாதம் சுனில்குமாா், தனது வீட்டாா் ஒப்புதலுடன் திருமணம் செய்து கொண்டாா். அப்போது சுனில்குமாா் குடும்பத்தினா் 20 கிராம் தங்கச் சங்கிலி வாங்கி கொடுத்தனா். சிறிது நாட்களுக்கு பிறகு தன்னை சிறுவயதில் வளா்த்தவா்களுக்கு உடல்நிலை சரியில்லை என்று கூறியதுடன், தான் திருமணத்துக்கு முன்பு கடன் வாங்கியுள்ளதாகவும் கூறியுள்ளாா்.

அதை தீா்க்க வேண்டும் என்று கூறி ரூ. 6 லட்சத்தை வாங்கிக் கொண்டாா். கடந்த 7-ஆம் தேதி இதுகுறித்து வீட்டில் உள்ளவா்கள் கேள்வி கேட்க தொடங்கியதும், மறுநாள் சுஹாசினி வீட்டை விட்டு வெளியேறினாா். ஆதாா் எண் மூலம் சுஹாசினி நெல்லூரை சோ்ந்தவா் என்பதும், அவருக்கு திருமணமாகி ஒரு குழந்தை இருப்பதும் தெரிய வந்தது.

மேலும் சுஹாசினி சுனில்குமாரை தொடா்பு கொண்டு தான் ஹைதராபாதில் இருப்பதாகவும், பணத்தை விரைவில் தந்து விடுவதாகவும், போலீஸை நாடினால் பிரச்னை செய்வேன் என மிரட்டி உள்ளாா். மேலும் ஒன்றரை ஆண்டுகளுக்கு முன்பு தனக்கு திருமணம் நடந்து விட்டதாகவும், கூறியுள்ளாா். இதனால் மனவேதனை அடைந்த சுனில் குமாா் சனிக்கிழமை இரவு அலிபிரி காவல்நிலையத்தில் சுஹாசினி மீது புகாா் அளித்துள்ளாா் என்று கூறினாா்.