வடமாநிலங்களில் இருந்து மேலும் 3 ஆக்சிஜன் ரயில்கள் தமிழகத்துக்கு சனிக்கிழமை வந்தடைந்தன. 65 ஆக்சிஜன் ரயில்கள் மூலமாக, தமிழகத்துக்கு இதுவரை 4 ஆயிரத்து 781.22 மெட்ரிக் டன் ஆக்சிஜன் கிடைத்துள்ளது.

ஜாா்க்கண்ட் மாநிலம் டாடா நகரில் இருந்து 63-ஆவது ஆக்சிஜன் ரயில் புறப்பட்டு, சென்னை தண்டையாா்பேட்டைக்கு சனிக்கிழமை காலை 10 மணிக்கு வந்தடைந்தது. இந்த ரயிலில் இணைக்கப்பட்டிருந்த 4 கன்டெய்னா்களில் 80 மெட்ரிக் டன் ஆக்சிஜன் எடுத்துவரப்பட்டது. இதைத் தொடா்ந்து, 64-ஆவது ஆக்சிஜன் ரயில், மகாராஷ்டிர மாநிலம் டோல்வியில் உள்ள ஜிண்டால் உருக்காலை பகுதியில் இருந்து சென்னை துறைமுகத்துக்கு சனிக்கிழமை பிற்பகல் 3.20 மணிக்கு வந்து சோ்ந்தது. இந்த ரயிலின் 4 கன்டெய்னா்களில் 81.42 மெட்ரிக் டன் ஆக்சிஜன் இருந்தது.

65-ஆவது ஆக்சிஜன் ரயில் ஒடிஸா மாநிலம் ரூா்கேலாவில் இருந்து புறப்பட்டு, திருச்சிக்கு சனிக்கிழமை மாலை 5.05 மணிக்கு வந்தது. இந்த ரயிலின் 6 கன்டெய்னா்களில் 125.69 மெட்ரிக் டன் ஆக்சிஜன் எடுத்துவரப்பட்டது. மொத்தம் 65 ரயில்கள் மூலமாக, தமிழகத்துக்கு இதுவரை 4 ஆயிரத்து 781.22 மெட்ரிக் டன் ஆக்சிஜன் கிடைத்துள்ளதாக ரயில்வே துறை வட்டாரங்கள் தெரிவித்தன.