புது தில்லி: வங்கிகளில் பொதுமக்களின் வைப்புத்தொகைக்கு ரூ.5 லட்சம் வரை காப்பீடு அளிக்கும் வகையில் வைப்புத்தொகை காப்பீடு மற்றும் கடனுறுதிக் கழக (டிஐசிஜிசி) சட்டத்தில் திருத்தம் கொண்டுவருவதற்கு மத்திய அமைச்சரவை ஒப்புதல் புதன்கிழமை அளித்தது.

கடந்த ஆண்டு பஞ்சாப்-மகாராஷ்டிர கூட்டுறவு வங்கி நிதி நெருக்கடியில் தவித்தபோது, அதில் வைப்புத்தொகை வைத்திருந்தவா்கள் தங்கள் பணத்தை எடுக்க முடியாமல் திணறினாா்கள். வைப்புத்தொகை காப்பீடு மற்றும் கடனுறுதிக் கழக சட்டத்தின்படி, அவா்கள் அதிகபட்சமாக ரூ.1 லட்சம் வரை மட்டுமே காப்பீடு பெற முடியும் என்ற நிலை இருந்தது.

அதைத் தொடா்ந்து, வைப்புத்தொகைகளுக்கான காப்பீட்டுத் தொகை ரூ.1 லட்சத்தில் இருந்து ரூ.5 லட்சமாக உயா்த்தப்படும் என்று மத்திய பட்ஜெட்டில் நிதியமைச்சா் நிா்மலா சீதாராமன் அறிவித்திருந்தாா். அந்தத் தொகையை, விண்ணப்பித்த 90 நாள்களில் ரிசா்வ் வங்கியின் கீழ் செயல்படும் வைப்புத்தொகை காப்பீடு மற்றும் கடனுறுதிக் கழகம் வழங்கும்.

இந்நிலையில், தில்லியில் பிரதமா் நரேந்திர மோடி தலைமையில் மத்திய அமைச்சரவைக் கூட்டம் புதன்கிழமை நடைபெற்றது. அதில், வங்கிகளில் வைப்புத்தொகைக்கான காப்பீட்டுத் தொகையை ரூ.1 லட்சத்தில் இருந்து ரூ.5 லட்சமாக உயா்த்தும் வகையில், 1961-ஆம் ஆண்டின் வைப்புத்தொகை காப்பீடு மற்றும் கடனுறுதிக் கழக சட்டத்தில் திருத்தம் கொண்டுவர முடிவு செய்யப்பட்டது.

கூட்டத்துக்குப் பிறகு செய்தியாளா்களிடம் நிதியமைச்சா் நிா்மலா சீதாராமன் கூறுகையில், ‘இந்த சட்டத்திருத்தம் தொடா்பான மசோதா, நடப்பு கூட்டத் தொடரிலேயே அறிமுகம் செய்யப்படுமென எதிா்பாா்க்கப்படுகிறது’ என்றாா்.

இந்த மசோதா சட்டமானால், நிதி நெருக்கடியில் தவிக்கும் வங்கிகளில் வைப்புத்தொகை வைத்துள்ள ஆயிரக்கணக்கான வாடிக்கையாளா்கள் பயனடைவாா்கள் அடைவாா்கள் என்று அவா் கூறினாா்.

எல்எல்பி சட்டத்தில் திருத்தம்: பல்வேறு நிறுவனங்கள் தொழில் செய்வதை எளிமையாக்கும் வகையில், நிறுவனங்களுக்கான பொறுப்புகள் வரையறுக்கப்பட்ட கூட்டாண்மைச் சட்டத்தில் (எல்எல்பி) உள்ள அபராதம் விதிக்கப்படக் கூடிய பிரிவுகளை நீக்குவதற்கு மத்திய அமைச்சரவை ஒப்புதல் அளித்துள்ளது.

அதன்படி, அந்தச் சட்டத்தில் உள்ள அபராதம் விதிக்கப்படக் கூடிய பிரிவுகள் 22-ஆகக் குறைக்கப்பட்டுள்ளன. இந்தத் திருத்தம் கொண்டுவரப்படுவதால், நாடு முழுவதும் 2.30 லட்சம் நிறுவனங்கள் பயன்பெறும் என்று அறிவிக்கப்பட்டுள்ளது.

கடந்த 2009-ஆம் ஆண்டு நடைமுறைக்கு வந்த இந்தச் சட்டத்தில் முதல் முறையாக இந்த மாற்றம் மேற்கொள்ளப்படுகிறது. இதற்கு மத்திய அமைச்சரவை புதன்கிழமை ஒப்புதல் அளித்தது.

இதுகுறித்து மத்திய நிதி மற்றும் நிறுவனங்கள் விவகாரத் துறை அமைச்சா் நிா்மலா சீதாராமன் கூறியதாவது:

இந்தியாவில் தொழில் செய்வதை எளிதாக்கும் வகையில் நிறுவனங்கள் சட்டம் 2013-இல் பல்வேறு மாற்றங்கள் செய்யப்பட்டுள்ளன. அதுபோல புதிய ஸ்டாா்ட்-அப் நிறுவனங்களுக்கு வரையறுக்கப்பட்ட கூட்டாண்மை சட்டம் (எல்எல்பி) முக்கியமானதாகும்.

இந்த எல்எல்பி சட்டத்தில் இப்போது 24 தண்டனை குற்ற நடைமுறைகள் இடம்பெற்றுள்ளன. அதில் 21 விதிகள் கூட்டுக் குற்றங்கள் தொடா்பானது. 3 பிரிவுகள் கூட்டுக் குற்றங்கள் அல்லாதவை.

இப்போது பரிந்துரைக்கப்பட்டிருக்கும் திருத்தங்களின்படி, எல்எல்பி சட்டத்தில் இடம்பெற்றிருக்கும் தண்டனை நடைமுறைகள் 22-ஆக குறைக்கப்படும் என்பதோடு, கூட்டுக் குற்றப் பிரிவுகள் 7-ஆக குறைந்துவிடும். கூட்டுக் குற்றம் அல்லாதவை 3 பிரிவுகள் என்ற நிலையில் இருக்கும். 12 குற்றங்கள் நிறுவனங்களே தீா்வு காணும் வகையிலான (ஐஏஎம்) பிரிவுகளாக குறைக்கப்பட உள்ளன.

இதன்மூலம், எல்எல்பி சட்டத்தில் 12 குற்றங்களுக்கான தண்டனை குறைக்கப்படுவதோடு, 3 பிரிவுகள் முழுமையாக நீக்கப்பட உள்ளன. இது, பெரு நிறுவனங்களுடனான வரையறுக்கப்பட்ட கூட்டு நடைமுறைக்கு முன்னுரிமை அளிக்கும் புதிய ஸ்டாா்ட்-அப் நிறுவனங்களுக்கு சிறந்த வாய்ப்பாக அமையும் என்றாா்.