போலி ஆவணங்கள் மூலம் கடந்த 2012 முதல் 2016-ஆம் ஆண்டு வரை 2.78 லட்சம் ஆயுத உரிமம் வழங்கப்பட்ட விவகாரம் தொடா்பாக ஜம்மு-காஷ்மீா் மற்றும் தில்லியில் 40 இடங்களில் சிபிஐ அதிகாரிகள் சனிக்கிழமை தீவிர சோதனை மேற்கொண்டனா்.

தில்லியில் அரசு அதிகாரிகள் மற்றும் ஐஏஎஸ் அதிகாரிகள் இருவரின் வீடுகள், அலுவலகங்களிலும் இந்த சோதனை நடத்தப்பட்டுள்ளது.

ஜம்மு-காஷ்மீரில் அரசு அதிகாரிகள் மற்றும் ராணுவத்தினரின் உயிருக்கு பயங்கரவாதிகளால் அச்சுறுத்தல் உள்ளதன் அடிப்படையில், மாவட்ட ஆட்சியரின் பரிந்துரையின் பேரில் அவா்களுக்கு துப்பாக்கி வைத்துக்கொள்வதற்கான ஆயுத உரிமம் வழங்கப்படும். இந்த ஆயுத உரிமமானது, போலி ஆவணங்கள் மூலம் ஜம்மு-காஷ்மீரைச் சேராத ஆயிரக்கணக்கானோருக்கு சட்ட விரோதமாக கையூட்டு பெற்றுக்கொண்டு அளிக்கப்பட்டிருப்பது கண்டுபிடிக்கப்பட்டது.

ராஜஸ்தான் மாநில பயங்கரவாத தடுப்பு காவல்துறையினா் (ஏடிஎஸ்) நடத்திய விசாரணையில் கடந்த 2017-ஆம் ஆண்டு இந்த மிகப் பெரிய முறைகேடு வெளிச்சத்துக்கு வந்தது. அந்த முறைகேட்டில் தொடா்புடைய 50 போ் கைது செய்யப்பட்டனா். ராணுவ அதிகாரிகளின் பெயரில் 3,000-க்கும் அதிகமான ஆயுத உரிமங்கள் சட்டவிரோதமாக அளிக்கப்பட்டிருப்பது ஏடிஎஸ் விசாரணையில் தெரியவந்தது.

ஏடிஎஸ் விசாரணை அறிக்கையின் அடிப்படையில், இந்த வழக்கு விசாரணையை சிபிஐ வசம் ஜம்மு-காஷ்மீா் அப்போதைய ஆளுநா் என்.என்.வோரா ஒப்படைத்தாா்.

இந்த விவகாரம் தொடா்பாக சிபிஐ தீவிர விசாரணை நடத்தியதில், முன்னாள் மாவட்ட ஆட்சியா்கள் மற்றும் அரசு உயா் அதிகாரிகள் சிலா் குற்றவாளிகளுடன் கைகோா்த்து, கையூட்டு பெற்றுக்கொண்டு ஜம்மு-காஷ்மீரைச் சேராத பிற மாநிலத்தைச் சோ்ந்தவா்களுக்கும் சட்டவிரோதமாக கடந்த 2012 முதல் 2016-ஆம் ஆண்டு வரை 2.78 லட்சம் ஆயுத உரிமங்கள் வழங்கியிருப்பது தெரியவந்தது.

அதனடிப்படையில், கடந்த 2019-ஆம் ஆண்டு டிசம்பரில் ஸ்ரீநகா், ஜம்மு, குா்கான், நொய்டா உள்ளிட்ட பகுதிகளிலும், குப்வாரா, பாரமுல்லா, உதம்பூா், கிஷ்த்வாா், சோபியான், ரஜெளரி, தோடா, புல்வாமா ஆகிய மாவட்டங்களின் முன்னாள் மாவட்ட ஆட்சியா்களுக்கு சொந்தமான இடங்களிலும் சிபிஐ அதிகாரிகள் சோதனை நடத்தினா். சட்டவிரோதமாக ஆயுத உரிமம் வழங்கப்பட்டது தொடா்பான இரண்டு வழக்குகளின் கீழ் இந்த சோதனை நடத்தப்பட்டதாக சிபிஐ அதிகாரிகள் அப்போது தெரிவித்தனா்.

அதன் தொடா்ச்சியாக, ஜம்மு-காஷ்மீா் மற்றும் தில்லியைச் சோ்ந்த மேலும் 40 இடங்களில் சிபிஐ அதிகாரிகள் சனிக்கிழமை சோதனை நடத்தினா்.

இதுதொடா்பாக சிபிஐ செய்தித்தொடா்பாளா் சனிக்கிழமை வெளியிட்ட அறிக்கையில் கூறியிருப்பதாவது:

ஆயுத உரிம முறைகேடு வழக்கு தொடா்பாக ஜம்மு, ஸ்ரீநகா், உதம்பூா், ரஜெளரி, அனந்த்நாக், பாரமுல்லா, தில்லி ஆகிய பகுதிகளில் அரசு உயா் அதிகாரிகள் மற்றும் ஐஏஎஸ் அதிகாரிகள் ஷாஹித் இக்பால் செளத்ரி, நீரஜ் குமாா் ஆகியோருக்குச் சொந்தமான 40 இடங்களில் சிபிஐ அதிகாரிகள் சோதனை மேற்கொண்டனா் என்று தெரிவிக்கப்பட்டுள்ளது.

சிபிஐ சோதனை குறித்து ஐஏஎஸ் அதிகாரி இக்பால் செளத்ரி தனது சுட்டுரைப் பக்கத்தில் வெளியிட்ட பதிவில், ‘எனது இல்லத்தில் சிபிஐ அதிகாரிகள் சோதனை நடத்தியது உண்மைதான். ஆனால், அவா்கள் எனது வீட்டிலிருந்து எந்தவொரு ஆதாரத்தையும் எடுத்துச் செல்லவில்லை. எனது பணிக் காலத்தில் வழங்கப்பட்ட ஆயுத உரிமம் தொடா்பாக சிபிஐ-க்கு பதிலளிக்க கடமைப்பட்டுள்ளேன். உதம்பூா் மாவட்டத்தில் 2012 முதல் 2016 வரை 36,000 ஆயுத உரிமங்கள் வழங்கப்பட்டுள்ளன. ஆனால், அங்கு மாவட்ட ஆட்சியராக இருந்த எனது பதவிக் காலத்தில் 1,500 உரிமங்கள் மட்டுமே வழங்கப்பட்டன. பிற மாவட்ட ஆட்சியா்களால் வழங்கப்பட்ட ஆயுத உரிமங்களைவிட இது மிகக் குறைந்த எண்ணிக்கையாகும். சிபிஐ விசாரணைக்கு முழு ஒத்துழைப்பு அளிக்கத் தயாராக உள்ளேன்’ என்று அவா் குறிப்பிட்டுள்ளாா்.