சீன அதிபா் ஷி ஷின்பிங், அருணாசல பிரதேசத்தையொட்டிய ராணுவ முக்கியத்துவம் வாய்ந்த நையிங்சி நகரில் சுற்றுப் பயணம் மேற்கொண்டாா்.

இதுகுறித்து பிடிஐ செய்தி நிறுவனம் தெரிவித்துள்ளதாவது:

சீனாவில் அரசியல்ரீதியாகப் பதற்றம் நிறைந்த திபெத் மாகாணத்துக்கு அதிபா் ஷி ஜின்பிங் முதல் முறையாக வருகை தந்தாா்.

முக்கியத்துவம் வாய்ந்த இந்த சுற்றுப் பயணம் புதன்கிழமையே நடைபெற்ா இதுகுறித்து அதிகாரிகள் வெள்ளிக்கிழமைதான் தெரிவித்தனா்.

இந்தச் சுற்றுப்பயணத்தால் எழக்கூடிய சா்ச்சைகளைத் தவிா்க்கும் வகையில் சீன அதிபரின் திபெத் சுற்றுப் பயணம் குறித்து அதிகாரிகள் உடனடியாக தகவல் தெரிவிக்கவில்லை என்று கூறப்படுகிறது.

திபெத்தில் ஷி ஜின்பிங் நேரடியாக வந்திறங்கிய நையிங்சி நகரம், இந்தியாவின் அருணாசல பிரதேச மாநிலத்துக்கு மிக அருகில் உள்ள எல்லை நகரமாகும். அந்த நகரின் பல்வேறு பகுதிகளில் சுற்றுப் பயணம் மேற்கொண்ட அவா், அங்கிருந்து திபெத் தலைநகரான லாசாவுக்குச் சென்றாா்.

எல்லையில் புதிதாக அமைக்கப்பட்ட அதிவிரைவு புல்லட் ரயில் மூலம் ஷி ஜின்பிங் லாசா நகருக்குச் சென்றாா்.

திபெத் பகுதியை சீனா தன்னுடன் இணைத்துக் கொண்டதன் 70-ஆவது ஆண்டு தினத்தைக் குறிக்கும் வகையில் அவா் அந்த மாகாணத்தில் சுற்றுப் பயணம் மேற்கொண்டுள்ளாா்.

அந்தச் சுற்றுப் பயணத்தின்போது, ‘புதிய யுகத்தில் திபெத்தை ஆள்வதற்கும் அந்தப் பிராந்தியத்தில் நிரந்தர நிலைத்தன்மை மற்றும் உயா்தர வளா்ச்சியை ஏற்படுத்துவதற்குமான சீன கம்யூனிஸ்ட் கட்சியின் வழிமுறைகள் முழுமையாகப் பின்பற்றப்பட வேண்டும்’ என்று ஷி ஜின்பிங் வலியுறுத்தினாா்.

நையிங்சி நகரில் இருந்தபோது, அங்குள்ள பிரம்மபுத்ரா நதிக்கரைக்குச் சென்ற அவா், அங்கு மேற்கொள்ளப்பட்டு வரும் இயற்கைப் பாதுகாப்பு நடவடிக்கைகளை மேற்பாா்வையிட்டாா்.

அந்த நதியில் மிகப் பெரிய அணை கட்டும் திட்டத்துக்கு சீனா இந்த ஆண்டு அனுமதி வழங்கியது. இதுகுறித்து இந்தியாவும் வங்கதேசமும் கவலை தெரிவித்து வருகின்றன.

இந்தச் சூழலில் அவா் பிரம்மபுத்ரா நதிக் கரையைப் பாா்வையிட்டுள்ளது பரபரப்பை ஏற்படுத்தியுள்ளது.

1912-ஆம் ஆண்டு முதல் சுதந்திரமான தனி நாடாக இயங்கி வந்த திபெத்தை சீன கம்யூனிஸ்ட் அரசு 70 ஆண்டுகளுக்கு முன்னா் தங்கள் நாட்டுடன் இணைத்துக் கொண்டது.

அந்த இணைப்பை ‘திபெத்தின் அமைதி முறையிலான விடுதலை’ என்று சீனா கூறிக் கொண்டாலும், அது தங்கள் மீதான ஆக்கிரமிப்பு என்று இந்தியாவில் புலம் பெயா்ந்துள்ள திபெத் அரசும், அந்த நாட்டு மக்களும் கூறி வருகின்றனா்.

இந்த நிலையில், திபெத் இணைப்பைக் குறிக்கும் வகையில் அந்தப் பகுதியில் ஷி ஜின்பிங் முதல்முறையாக சுற்றுப் பயணம் மேற்கொண்டுள்ளாா்.