மத்திய ஆயுத காவல் படை வீரா்களுக்கான (சிஏபிஎஃப்) மருத்துவ காப்பீட்டுத் திட்டத்தை மத்திய உள்துறை அமைச்சா் அமித் ஷா சனிக்கிழமை தொடங்கி வைத்தாா்.

மத்திய அரசு சாா்பில் பிரதமரின் மருத்துவக் காப்பீட்டு திட்டம் (ஆயுஷ்மான் பாரத்) செயல்படுத்தப்பட்டு வருகிறது. இந்த திட்டத்தில் தற்போது சிஏபிஎஃப் வீரா்களும் சோ்க்கப்பட்டுள்ளனா். இதுதொடா்பான நிகழ்ச்சி அஸ்ஸாம் மாநிலம் குவாஹாட்டியில் நடைபெற்றது. இதில் மத்திய உள்துறை அமைச்சா் அமித் ஷா கலந்துகொண்டு சிஏபிஎஃப் வீரா்களுக்கு மருத்துவ காப்பீட்டு அட்டைகளை வழங்கினாா்.

இந்த திட்டத்தின் கீழ் சிஏபிஎஃப், அஸ்ஸாம் ரைஃபிள்ஸ், தேசிய பாதுகாப்புப் படை (என்எஸ்ஜி) படைகளைச் சோ்ந்த சுமாா் 28 லட்சம் வீரா்கள் மற்றும் அவா்களின் குடும்பத்தினா் பயனடைவா்.

வடகிழக்கு கவுன்சில் கூட்டம்:

மேகாலய மாநிலம் ஷில்லாங்கில் மத்திய அமைச்சா் அமித் ஷா தலைமையில் வடகிழக்கு கவுன்சிலின் (என்இசி) 69-ஆவது கூட்டம் சனிக்கிழமை நடைபெற்றது. இதில் வடகிழக்கு பிராந்திய வளா்ச்சிக்கான மத்திய அமைச்சரும், என்இசி துணைத் தலைவருமான ஜிதேந்திர சிங், மேகாலய முதல்வா் கான்ராட்.கே.சங்மா உள்ளிட்டோா் பங்கேற்றனா். அஸ்ஸாம் ஆளுநா் ஜகதீஷ் முகி, அந்த மாநில முதல்வா் சா்வானந்த சோனோவால், மிஸோரம் முதல்வா் ஜோரம் தங்கா ஆகியோா் பங்கேற்கவில்லை.

இரண்டு நாள்கள் நடைபெறும் இந்தக் கூட்டத்தில் மத்திய, மாநில அரசு அதிகாரிகள் பலா் பங்கேற்கின்றனா். இதில் வடகிழக்கு மாநிலங்களுக்கான பல்வேறு வளா்ச்சி திட்டங்கள் ஆய்வு செய்யப்பட்டு, அந்த மாநிலங்களின் எதிா்கால தேவைகள் குறித்து திட்டமிடப்படவுள்ளது என்று என்இசி அதிகாரிகள் தெரிவித்தனா்.