கொல்லம்: கேரள மாநிலத்துக்கு வந்துள்ள காங்கிரஸ் எம்.பி. ராகுல் காந்தி, புதன்கிழமை அதிகாலை மீனவா்களுடன் கடலுக்குள் சென்று மீன் பிடித்தாா். மீனவா்களின் குறைகளுக்குத் தீா்வுகாணும் வகையில் தனி தோ்தல் வாக்குறுதி அறிக்கை தயாரிக்கப்படும் என்று அவா் கூறினாா்.

காங்கிரஸ் முன்னாள் தலைவரும், வயநாடு மக்களவைத் தொகுதி எம்.பி.யுமான ராகுல் காந்தி, பல்வேறு நிகழ்ச்சிகளில் கலந்துகொள்வதற்காக கேரளம் வந்துள்ளாா்.

புதன்கிழமை அதிகாலை 4.30 மணியளவில் கொல்லம் மாவட்டம் தங்கச்சேரி கடற்கரையில் உள்ள வாடி மீன்பிடித் துறைமுகத்துக்கு சில மீனவா்களுடன் வந்த அவா், கடலுக்குள் மீன்பிடிக்கச் சென்றனா். சுமாா் ஒரு மணி நேர பயணத்துக்குப் பிறகு அவா்கள் மீண்டும் கரைக்கு வந்தனா். ராகுல் காந்தியுடன் காங்கிரஸ் பொதுச் செயலாளா் கே.சி.வேணுகோபால், நாடாளுமன்ற உறுப்பினா் டி.என்.பிரதாபன் ஆகியோரும் உடன் சென்றிருந்தனா்.

கரைக்குத் திரும்பிய ராகுல் காந்தி, மீனவா்களுடன் கலந்துரையாடினாா். அப்போது, அவா் கூறியதாவது:

மீனவ சகோதரா்களுடன் அதிகாலை கடலுக்குள் மீன்பிடிக்கச் சென்றிருந்தேன். கரையில் இருந்து புறப்பட்டது முதல் மீண்டும் கரையை வந்தடையும் அவரை ஒவ்வொரு நிமிடமும் போராட்டமாகவே இருந்தது.

படகு வாடகை, பெட்ரோல் செலவு, போராட்டம் நிறைந்த பயணம் ஆகியவற்றுடன் மொத்த உழைப்பையும் செலுத்தி மீனவா்கள் கடலுக்குள் சென்றனா். மீன்பிடி வலை முழுவதும் மீன் நிறைந்திருக்கும் என்று எதிா்பாா்த்திருந்தேன்; ஆனால், வெறும் வலை மட்டுமே வந்தது. நீண்ட நேர முயற்சிக்குப் பிறகு ஒரே ஒரு மீன் மட்டுமே சிக்கியது. மீனவா்கள் துயரத்தை நான் நேரில் கண்டு தெரிந்துகொண்டேன்.

பெட்ரோல், டீசல் விலை தினந்தோறும் அதிகரித்து வருகிறது. மீனவா்களால் மிகப்பெரிய படகு இயந்திரங்களை வாங்க முடியாது. மீனவா்கள் யாருக்கும் எந்தவித காப்பீடும் இல்லை என்பது அவா்களுடன் பேசும்போது தெரியவந்தது.

நம் சாப்பாட்டு தட்டுக்கு மீன் வருவதற்கு பின்னணியில் எவ்வளவு பெரிய உழைப்பு இருப்பதை புரிந்துகொண்டேன்.

மீனவா்கள் பல்வேறு கோரிக்கைகளை என்னிடம் முன்வைத்தனா். அவை அனைத்துக்கும் என்னால் தீா்வுகாண இயலாது. இருப்பினும் சில பிரச்னைகளை நிச்சயம் தீா்த்து வைப்பேன்.

மீன்பிடித்தொழில் அபாயம் நிறைந்ததால், அந்த தொழிலுக்கு மீனவா்கள் செல்வதை அவா்களின் குழந்தைகள் விரும்பவில்லை. மாநிலத்தில் விரைவில் பேரவைத் தோ்தல் நடைபெறவுள்ளது. எனவே, மீனவா்களுடன் காங்கிரஸ் கூட்டணியின் தலைவா்கள் கூடி விவாதித்து, அவா்களின் குறைகளுக்குத் தீா்வுகாணும் வகையில் தனி தோ்தல் வாக்குறுதி அறிக்கை தயாரிக்கப்படும்.

கேரளத்தில் காங்கிரஸ் ஆட்சிக்கு வந்தால் ஏழை குடும்பங்களுக்கு ஆண்டுக்கு ரூ.72,000 உதவித்தொகை வழங்கப்படும். அந்தத் தொகை, அவா்களின் வாழ்க்கையை நடத்துவதற்கும், குழந்தைகளின் பள்ளிச் செலவுக்ம் உதவியாக இருக்கும் என்றாா் அவா்.

கேரளத்தில் ஆழ்கடல் மீன்பிடிப்புக்காக, ஒரு அமெரிக்க நிறுவனத்துடன் ஆளும் இடதுசாரி கூட்டணி அரசு ஒப்பந்தம் செய்து கொண்டது. இதுதொடா்பாக சா்ச்சைகள் எழுந்ததை அடுத்து, அந்த ஒப்பந்தத்தை ரத்து முதல்வா் உத்தரவிட்டாா்.

இதுகுறித்து கருத்து தெரிவித்த ராகுல் காந்தி, ‘மீன்பிடித் தொழிலில் போட்டி இருப்பது நல்லதுதான்; அந்த போட்டி நியாயமற்ாக இருக்கக் கூடாது’ என்றாா்.