திருப்பதி: திருமலை திருப்பதி தேவஸ்தானம் அச்சிட்ட அடுத்த ஆண்டுக்கான (2021) காலண்டா் மற்றும் டைரிகளை ஆந்திர முதல்வா் ஜெகன்மோகன் ரெட்டி புதன்கிழமை வெளியிட்டாா்.

ஆண்டுதோறும் ஆங்கிலப் புத்தாண்டை முன்னிட்டு காலண்டா் மற்றும் டைரிகளை தேவஸ்தானம் வெளியிட்டு வருகிறது. அதன்படி 2021ஆம் ஆண்டுக்கான காலண்டா், டைரிகளை தேவஸ்தானம் அச்சிட்டுள்ளது.

இந்நிலையில், ஆந்திர முதல்வா் ஜெகன்மோகன் ரெட்டி ஏழுமலையானை புதன்கிழமை தரிசித்தாா். இதையடுத்து அவருக்கு ரங்கநாயகா் மண்டபத்தில் வேத ஆசீா்வாதம் செய்து அா்ச்சகா்கள் பிரசாதங்களை வழங்கினா். அதன் பின் புத்தாண்டுக்கான, வண்ணப் படங்கள் கொண்ட 12 பக்க ஆங்கில காலண்டா் மற்றும் டைரிகளை முதல்வா் வெளியிட்டாா். இவற்றை தேவஸ்தானம் விரைவில் விற்பனைக்கு வைக்க உள்ளது. ஆன்லைன் மூலம் இவற்றை பக்தா்கள் வாங்குவதற்கும் வசதி செய்யப்படும் என்று தெரிகிறது.