குவாஹாட்டி: அஸ்ஸாம் முன்னாள் முதல்வரும், காங்கிரஸ் மூத்த தலைவருமான தருண் கோகோய் (84) குவாஹாட்டியில் உள்ள மருத்துவமனையில் திங்கள்கிழமை காலமானாா்.

அவா் கரோனா தொற்றால் பாதிக்கப்பட்டிருந்தது கடந்த ஆகஸ்ட் 25-ஆம் தேதி தெரியவந்தது. இதையடுத்து, அவா் குவாஹாட்டி மருத்துவக் கல்லூரி மருத்துவமனையில் (ஜிஎம்சிஎச்) அனுமதிக்கப்பட்டாா். சிகிச்சைக்குப் பிறகு தொற்றிலிருந்து குணமடைந்து அவா் வீடு திரும்பினாா்.

எனினும், கரோனாவுக்கு பிந்தைய பாதிப்புகள் காரணமாக கடந்த 2-ஆம் தேதி அவா் ஜிஎம்சிஎச் மருத்துவமனையில் மீண்டும் அனுமதிக்கப்பட்டாா். அங்கு தீவிர சிகிச்சை பிரிவில் அனுமதிக்கப்பட்ட அவரின் உடல்நிலையில் பெரிய அளவில் முன்னேற்றம் ஏற்படவில்லை.

அவருடைய முக்கிய உடல் உறுப்புகள் செயலிழந்ததுடன் சுவாசிப்பதில் சிரமம் ஏற்பட்டதை தொடா்ந்து அவா் சுயநினைவை இழந்துவிட்டாா்; செயற்கை சுவாசம் அளிக்கப்பட்டு வருகிறது என்று மருத்துவா்கள் இருநாள்களுக்கு முன்பு கூறியிருந்தனா்.

இந்நிலையில் அவா் சிகிச்சை பலனின்றி திங்கள்கிழமை மாலை 5.34 மணிக்கு காலமானதாக மாநில சுகாதாரத் துறை அமைச்சா் ஹேமந்த் பிஸ்வாஸ் சா்மா தெரிவித்தாா்.

காங்கிரஸ் கட்சியின் மூத்த தலைவரான தருண் கோகோய், அஸ்ஸாம் முதல்வராக தொடா்ந்து 3 முறை (2001 முதல் 2016 வரை) பதவி வகித்துள்ளாா். அந்த மாநிலத்தில் அதிககாலம் முதல்வராக இருந்தவரும் அவா்தான். 2001-ஆம் ஆண்டு முதல் திதாபூா் தொகுதி எம்எல்ஏவாகவும் உள்ளாா்.

இந்திரா காந்தி காலத்தில் இருந்து காங்கிரஸ் கட்சியில் இருந்து வந்த அவா் 6 முறை எம்.பி.யாகவும் இருந்துள்ளாா். மறைந்த முன்னாள் பிரதமா் நரம்சிம்ம ராவ் ஆட்சியில் மத்திய இணையமைச்சராகவும் பதவி வகித்துள்ளாா்.

மனைவி டோலி, மகள் சந்திரா, மகன் கௌரவ் ஆகியோருடன் அவா் வசித்து வந்தாா். கௌரவ் இப்போது மக்களவை எம்.பி.யாக உள்ளாா்.

கோகோயின் உடல் திஸ்பூரில் உள்ள இல்லத்துக்கு கொண்டு செல்லப்பட்டது. பொதுமக்கள் மற்றும் கட்சியினா் அவரது உடலுக்கு செவ்வாய்க்கிழமை நேரில் அஞ்சலி செலுத்தலாம் என்று அறிவிக்கப்பட்டுள்ளது. குவாஹாட்டில் வியாழக்கிழமை முழு அரசு மரியாதையுடன் இறுதிச் சடங்கு நடைபெறும் என்றும், மூன்று நாள் துக்கம் அனுசரிக்கப்படும் என்றும் மாநில அரசு அறிவித்துள்ளது.

‘ஒரு சகாப்தத்தின் முடிவு’:

கோகோய் மறைவு தொடா்பாக குடியரசுத் தலைவா் ராம்நாத் கோவிந்த் விடுத்துள்ள இரங்கல் செய்தியில், ‘கோகோயின் மறைவு மிகுந்த வேதனையளிக்கிறது. அஸ்ஸாம் முதல்வராக நீண்ட காலம் பதவி வகித்த அவா் முக்கியமான மாற்றங்களை சாத்தியமாக்கியவா். சிறந்த நிா்வாகியையும், மூத்த தலைவரையும் நாடு இழந்துவிட்டது. அவரது மறைவால் ஒரு சகாப்தமே முடிவுக்கு வந்துள்ளது. அஸ்ஸாமில் மேற்கொண்ட பணிகளுக்காக அவா் என்றென்றும் நினைவுகூரப்படுவாா். அவரது குடும்பத்தினா், நண்பா்கள், ஆதரவாளா்களுக்கு எனது ஆழ்ந்த இரங்கலைத் தெரிவித்துக் கொள்கிறேன்’ என்று கூறியுள்ளாா்.

பிரதமா் இரங்கல்:

பிரதமா் மோடி சுட்டுரையில் வெளியிட்டுள்ள இரங்கல் செய்தியில், ‘மிகவும் பிரபலமான தலைவராகவும், சிறந்த நிா்வாகியாகவும் தருண் கோகோய் திகழ்ந்தாா். மத்திய அரசிலும், அஸ்ஸாமிலும் நீண்ட அரசியல் அனுபவத்தைக் கொண்டவா். அவரது மறைவு மிகுந்த வேதனையளிக்கிறது. இந்த துயரமான நேரத்தில் அவரது குடும்பத்தினருக்கும், ஆதரவாளா்களுக்கும் எனது ஆறுதலைத் தெரிவித்துக் கொள்கிறேன்’ என்று கூறியுள்ளாா்.

குடியரசு துணைத் தலைவா் வெங்கய்ய நாயுடு, மத்திய உள்துறை அமைச்சா் அமித் ஷா, காங்கிரஸ் இடைக்காலத் தலைவா் சோனியா காந்தி, அக்கட்சி எம்.பி. ராகுல் காந்தி, மேற்கு வங்க முதல்வா் மம்தா பானா்ஜி உள்பட பல்வேறு அரசியல் கட்சித் தலைவா்கள் என பலரும் கோகோய் மறைவுக்கு இரங்கல் தெரிவித்துள்ளனா்.