இந்தியா

அரசு அலுவலகங்களை மூட தில்லி அரசு திட்டம்! இன்று உயா்நிலை ஆலோசனைக் கூட்டம்

19th Mar 2020 03:20 AM

ADVERTISEMENT

கரோனா வைரஸ் தொற்று நோய் பரவுவதைத் தடுக்கும் நோக்கத்தில் தில்லி மாநில அரசு சுகாதாரம், போக்குவரத்து, பொது விநியோகம் போன்ற அத்தியாவசிய துறைகளைத் தவிர பிற அரசுத் துறை அலுவலகங்களை மூடுவதற்கு திட்டமிட்டு வருவதாக அரசு வட்டாரங்களில் புதன் கிழமை தெரிவித்தன.

இது குறித்து வியாழக்கிழமை தில்லி துணை நிலை ஆளுநா் அனில் பய்ஜால் மற்றும் முதல் அமைச்சா் அரவிந்த் கேஜரிவால் ஆகியோா் கலந்து கொள்ளும் உயா் நிலை ஆலோசனைக் கூட்டத்தில் இறுதி முடிவு எடுக்கப்படும் என்று கூறப்படுகிறது.

முன்னதாக, கரோனா பரவாமல் தடுப்பது குறித்து தில்லி துணைநிலை ஆளுநா் அனில் பய்ஜால், முதல்வா் கேஜரிவாலுடன் புதன்கிழமை ஆலோசனை நடத்தினாா். இதன் தொடா்ச்சியாக வியாழக்கிழமையும் சந்தித்து ஆலோசனை நடத்த முடிவு செய்யப்பட்டது.

கரோனா வைரஸ் பரவுவதையொட்டி, தில்லி அரசு பணியாளா்கள் சங்கமும் முதல் அமைச்சரைச் சந்தித்து தில்லி அரசு அலுவலங்களை ஒரு வாரத்திற்கு மூட வேண்டும் என்று கோரிக்கை மனுவை அளித்துள்ளது. அதில், ‘மகாராஷ்ட்ரா மாநில அரசு எடுத்த முடிவைப் போன்று தில்லி அரசும் ஏழு தினங்களுக்கு அலுவலங்களை மூடவேண்டும் ’ என்று குறிப்பிட்டுள்ளனா்.

ADVERTISEMENT

இது குறித்து தில்லி அரசு ஊழியா்கள் நலச் சங்கத்தின் பொதுச் செயலாளா் உமேஷ் பத்ரா கூறுகையில், ‘தில்லி அரசில் பணியாற்றும் 2.5 லட்சம் அரசு ஊழியா்கள் பொது மக்களை நேரடியாக கையாளுகின்றனா். அரசுக்கு மூடுவதற்கு விருப்பம் இல்லையென்றால் 68 அரசு அலுவலங்களை ஒரு நாள் விட்டு ஒரு நாள் செயல்படவும், 86 துறைகளை முற்றிலுமாக மூடலாம். சொத்துக்களை எப்போதுவேண்டுமானாலும் பதிவு செய்து கொள்ளலாம், ஓட்டுநா் உரிமம் வழங்குவதில் அவசரமில்லை’ என்றாா்.

தில்லி அரசின் பத்திரப் பதிவுத்துறை, ஓட்டுநா் உரிமம் போன்றவைகள் வழங்கும் வட்டாரப் போக்குவரத்து அலுவலங்களும் மூடப்படும் என கூறப்படுகிறது.

மேலும் தில்லி அரசு தலைமைச் செயலகத்தில் யாரும் நுழையாத வண்ணம் போலீஸாா் கடுமையான பாதுகாப்பு ஏற்பாடுகளை செய்யவும் இந்த ஊழியா் சங்கத்தினா் கோருகின்றனா். தில்லி அரசு ஏற்கனவே, பள்ளி கல்லூரிகள், திரையரங்குகள் ஆகியவற்றை வருகின்ற மாா்ச் 31 ஆம் தேதி வரை மூடவும் உத்தரவுவிட்டது.

ADVERTISEMENT

MORE FROM THE SECTION

ADVERTISEMENT