ராஜஸ்தானில் முதல்வா் அசோக் கெலாட், துணை முதல்வா் சச்சின் பைலட் இடையேயான மோதல் போக்கு முற்றியதால் அந்த மாநிலத்தில் அரசியல் குழப்பம் உச்சகட்டத்தை எட்டியுள்ளது.

ராஜஸ்தானில் அசோக் கெலாட் தலைமையிலான காங்கிரஸ் அரசின் ஆட்சி நடைபெற்று வருகிறது. சச்சின் பைலட் துணை முதல்வராகவும், கட்சியின் மாநிலத் தலைவராகவும் உள்ளாா். அந்த மாநிலத்தில் கடந்த 2018-ஆம் ஆண்டு நடைபெற்ற பேரவைத் தோ்தலில் காங்கிரஸ் வெற்று பெற்று ஆட்சிக்கு வந்தது முதலே அரசை எதிா்த்து சச்சின் பைலட் துணிச்சலாகக் குரல் கொடுத்து வந்தாா். குறிப்பாக, நிகழாண்டின் தொடக்கத்தில் மாநிலத்தில் சட்டம்-ஒழுங்கு சீா்குலைந்துவிட்டதாக சச்சின் பைலட் பகிரங்கமாக குற்றம்சாட்டினாா்.

அத்துடன் கோட்டா நகரில் உள்ள மருத்துவமனைகளில் 100-க்கும் மேற்பட்ட பச்சிளம் குழந்தைகள் உயிரிழந்தபோது, இதுபோன்ற சம்பவங்களைத் தடுக்க கூடுதல் நடவடிக்கை எடுக்கப்பட வேண்டும் என்றும் கூறினாா்.

மற்றொரு புறம், மாநில காங்கிரஸ் தலைவா் பதவியை சச்சின் பைலட்டிடம் இருந்து பறிக்க வேண்டும் என்று அசோக் கெலாட்டிடம் அவரது ஆதரவாளா்கள் கூறி வந்தனா்.

இதனிடையே, அண்மையில் மாநிலங்களவைத் தோ்தல் நடைபெற்றபோது, காங்கிரஸ் எம்எல்ஏக்களை விலைக்கு வாங்க பாஜக குதிரை பேரம் நடத்துவதாக அசோக் கெலாட் குற்றம்சாட்டினாா்.

ஆனால், அவரது குற்றச்சாட்டை பாஜக மறுத்துவிட்டது. மேலும், மாநிலத்தில் அசோக் கெலாட், சச்சின் பைலட் இடையேயான மோதல் போக்கே பிரச்னைக்கு காரணம் என்று அக்கட்சி கூறிவிட்டது.

இந்நிலையில், மாநிலத்தில் ஆட்சியைக் கவிழ்க்க சதி நடந்ததாகவும் இதுதொடா்பான விசாரணைக்காக, சச்சின் பைலட்டுக்கு காவல் துறையின் சிறப்பு பிரிவின் சாா்பில் நோட்டீஸ் அனுப்பப்பட்டது. இதனால் அதிருப்தியடைந்துள்ள சச்சின் பைலட் தில்லியில் முகாமிட்டு, கட்சியின் மேலிடத் தலைவா்களிடம் முறையிட்டு வருகிறாா். மேலும், அவரது ஆதரவு எம்எல்ஏக்கள் 19 பேரையும் தொடா்புகொள்ள முடியவில்லை.

ஆனால், சச்சின் பைலட் மட்டுமன்றி,முதல்வா் அசோக் கெலாட், அரசு தலைமை கொறடா, சுயேச்சை உறுப்பினா்கள் ஆகியோருக்கும் நோட்டீஸ் அனுப்பட்டுள்ளதாக காவல் துறை சிறப்பு பிரிவின் கூடுதல் இயக்குநா் அசோக் ராத்தோா் ஞாயிற்றுக்கிழமை தெரிவித்தாா்.

இந்நிலையில், மாநிலத்தில் காங்கிரஸ் அரசு உறுதியாக உள்ளது என்பதை நிரூபிப்பதற்காக, காங்கிரஸ் எம்எல்ஏக்கள் கூட்டத்துக்கு முதல்வா் அசோக் கெலாட் ஞாயிற்றுக்கிழமை இரவு அழைப்பு விடுத்தாா். ஜெய்ப்பூரில் முதல்வரின் இல்லத்தில் ஞாயிற்றுக்கிழமை காலை இந்தக் கூட்டம் நடைபெறவுள்ளது. இந்தக் கூட்டத்தை சச்சின் பைலட் புறக்கணிப்பாா் என்று தெரிகிறது.

200 உறுப்பினா்களைக் கொண்ட ராஜஸ்தான் சட்டப் பேரைவயில் காங்கிரஸ் கட்சிக்கு 107 உறுப்பினா்களும் பாஜகவுக்கு 72 உறுப்பினா்களும், சுயேச்சை உறுப்பினா்கள் 13 பேரும் உள்ளனா். மாநிலத்தில் காங்கிரஸ் ஆட்சியமைத்தபோது, சுயேச்சை உறுப்பினா்கள் 13 பேரும் ஆதரவு அளித்தனா்.

காங்கிரஸ் மேலிடக் குழு ஜெய்ப்பூா் விரைந்தது: இந்நிலையில், உள்கட்சி பூசலுக்கு முற்றுப்புள்ளி வைப்பதற்காக, காங்கிரஸ் மூத்த தலைவா் அஜய் மாக்கன், கட்சியின் தலைமை செய்தித் தொடா்பாளா் ரண்தீப் சுா்ஜேவாலா ஆகியோரை மேலிடப் பாா்வையாளா்களாக காங்கிரஸ்

மேலிடம் ஜெய்ப்பூருக்கு அனுப்பி வைத்துள்ளது. அவா்களுடன் கட்சியின் பொதுச் செயலாளரும் ராஜஸ்தான் மாநில பொறுப்பாளருமான அவினாஷ் பாண்டேவும் ஜெய்ப்பூா் சென்றுள்ளாா்.