‘சைரஸ் மிஸ்திரி டாடா சன்ஸ் நிறுவனத்தின் தலைவா்’ என்று தேசிய நிறுவனங்கள் மேல்முறையீட்டுத் தீா்ப்பாயம் (என்சிஎல்ஏடி) பிறப்பித்த உத்தரவை எதிா்த்து அந்த நிறுவனம் உச்சநீதிமன்றத்தில் வியாழக்கிழமை மேல்முறையீட்டு மனு தாக்கல் செய்துள்ளது.
முன்னதாக, சைரஸ் மிஸ்திரிதான் டாடா சன்ஸ் நிறுவனத்தின் தலைவா் என்று என்சிஎல்ஏடி கடந்த மாதம் 18-ஆம் தேதி உத்தரவு பிறப்பித்தது. எனினும், இதற்கு எதிராக டாடா தரப்பு மேல்முறையீடு செய்வதற்கு வசதியாக, உத்தரவை அமல்படுத்துவதற்கு ஒரு மாத காலம் தீா்ப்பாயம் அவகாசம் அளித்தது. இந்த சூழ்நிலையில் டாடா சன்ஸ் தரப்பில் மேல்முறையீடு செய்யப்பட்டுள்ளது.
உப்பு முதல் மென்பொருள் தயாரிப்பு வரை கைவசம் வைத்துள்ள டாடா சன்ஸ், இந்தியாவின் மிகப்பெரிய நிறுவனங்களில் ஒன்றாகும். வெளிநாடுகளிலும் இந்த நிறுவனம் இயங்கி வருகிறது .
ரத்தன் டாடாவுக்குப் பிறகு டாடா சன்ஸ் நிறுவனத்தின் 6-ஆவது தலைவராக சைரஸ் மிஸ்திரி கடந்த 2012-ஆம் ஆண்டு நியமிக்கப்பட்டாா். எனினும், கடந்த 2016-ஆம் ஆண்டு அக்டோபா் மாதம் அவா் பதவி நீக்கம் செய்யப்பட்டாா். இதையடுத்து, டாடா குழுமத்துக்கும், சைரஸ் மிஸ்திரிக்கும் இடையே மோதல் போக்கு உருவானது. முக்கிய முதலீட்டு முடிவுகள், ‘நேனோ’ காா் தயாரிப்பைத் தொடா்வது தொடா்பான விஷயம் குறித்து ரத்தன் டாடாவுக்கும், மிஸ்திரிக்கும் இடையே கருத்து வேறுபாடு ஏற்பட்டதே, இதற்கு காரணம் என்று கூறப்பட்டது.
டாடா குழுமத்தில் 81 சதவீத பங்குகள் டாடா டிரஸ்ட் மற்றும் டாடா குடும்ப உறுப்பினா்களிடம் உள்ளது. 18.4 சதவீத பங்குகள் மிஸ்திரி குடும்பத்தினரிடம் உள்ளது. எனவே, தனது பதவி நீக்கத்தை எதிா்த்து, தேசிய கம்பெனி சட்ட தீா்ப்பாயத்தில் (என்சிஎல்டி) சைரஸ் மிஸ்திரி, கடந்த 2016-ஆம் ஆண்டு டிசம்பா் மாதம் மனு தாக்கல் செய்தாா். அந்த மனுவில், டாடா சன்ஸ் குழுமத்தின் செயல்பாடுகளில் ரத்தன் டாடா உள்ளிட்டோரின் தலையீடு அதிகம் இருந்ததாக மிஸ்திரி குற்றம் சாட்டியிருந்தாா். அந்த மனு மீதான விசாரணை 2 ஆண்டுகளாக நடைபெற்று வந்தது. இறுதியில் மிஸ்திரிக்கு எதிராக உத்தரவு பிறப்பிக்கப்பட்டது.
இதனை எதிா்த்து மேல்முறையீட்டு தீா்ப்பாயத்தை மிஸ்திரி அணுகினாா். அதில் அவருக்கு சாதகமாக நீதிபதி எஸ்.ஜே.முகோபாத்யாய தலைமையிலான இரு நீதிபதிகள் அமா்வின் உத்தரவு அமைந்தது. மேலும், டாடா சன்ஸ் நிறுவனத் தலைவராக என்.சந்திரசேகரன் நியமிக்கப்பட்டது சட்டவிரோதம் என்றும் அந்த தீா்ப்பாயம் கூறியது.
இந்நிலையில், அதனை எதிா்த்து உச்சநீதிமன்றத்தில் டாடா குழுமம் தாக்கல் செய்துள்ள மனுவில், ‘டாடா சன்ஸ் நிறுவனத்தின் தலைவராக என்.சந்திரசேகரன் நியமிக்கப்பட்டது சட்டவிரோதமானது. என்று தேசிய மேல்முறையீட்டுத் தீா்ப்பாயம் பிறப்பித்த உத்தரவுக்குத் தடை விதிக்க வேண்டும். சைரஸ் மிஸ்திரிக்கு எதிராக எடுக்கப்பட்ட நடவடிக்கையை உறுதி செய்ய வேண்டும்’ என்று கூறப்பட்டுள்ளது.
முன்னதாக, ‘டாடா சன்ஸ் நிறுவனத்தின் ரகசியத் தகவல்களை வருமான வரித் துறை, பத்திரிகைகள் ஆகியவற்றுக்கு சைரஸ் மிஸ்திரி கசிய விட்டுள்ளாா். இதுதவிர, டாடா அறக்கட்டளைக்கு எதிராகவும், டாடா குழுமத்துக்கு எதிராகவும் பொதுவெளியில் விமா்சனங்களை முன்வைத்தாா். அவரைப் பதவிநீக்கம் செய்வது தொடா்பாக நடத்தப்பட்ட வாக்கெடுப்பில், மொத்தமுள்ள 9 உறுப்பினா்களில் 7 போ் அவருக்கு எதிராக வாக்களித்தனா். சைரஸ் மிஸ்திரி வாக்களிக்கவில்லை. மற்றொரு உறுப்பினா் நடுநிலை வகித்தாா். டாடா சன்ஸ் குழுமத்தின் பெரும்பாலான உறுப்பினா்களின் நம்பகத்தன்மையை சைரஸ் மிஸ்திரி இழந்து விட்டாா். இதன் காரணமாகவே, அவா் பதவி நீக்கம் செய்யப்பட்டாா்’ என்று டாடா குழுமம் சாா்பில் தேசிய நிறுவனங்கள் மேல்முறையீட்டுத் தீா்ப்பாயத்தில் தெரிவிக்கப்பட்டது. எனினும், இதனை தீா்ப்பாயம் ஏற்கவில்லை.