ராஜஸ்தானில் பசு கடத்தல் கும்பலுடன் மோதல்: துப்பாக்கிச் சூட்டில் காவலா் காயம்

ராஜஸ்தான் மாநிலத்தில் பசு கடத்தல் கும்பலுடன் வெள்ளிக்கிழமை நடந்த துப்பாக்கிச் சண்டையில் காவல் உதவி ஆய்வாளா் காயமடைந்தாா்.

இதுகுறித்து பரத்பூா் மாவட்ட காவல் துறை கண்காணிப்பாளா் ஹைதா் அலி ஜைதி கூறியதாவது:

பரத்பூா் மாவட்டத்தில் உள்ள ஃபதேபூா் கிராமத்தில் பசுக்கள் கடத்தப்படுவதாகக் காவல் துறைக்குத் தகவல் கிடைத்தது. இதையடுத்து, அந்த கிராமத்துக்கு வெள்ளிக்கிழமை காலை காவலா்களைக் கொண்ட குழு சென்றது. கிராமத்துக்குள் காவலா்கள் சென்றதை அறிந்த கடத்தல் கும்பல், அவா்கள் மீது துப்பாக்கிச் சூடு நடத்தியது. காவலா்களும் பதிலுக்கு துப்பாக்கிச் சூடு நடத்தினா். இந்த மோதலில், காவல் உதவி ஆய்வாளா் காயமடைந்தாா்.

துப்பாக்கிச் சண்டையைத் தொடா்ந்து, 2 பேரைக் கைது செய்துள்ளோம். அவா்களிடம் பசு கடத்தல் தொடா்பாக விசாரணை நடத்தி வருகிறோம் என்றாா் அந்த காவல் துறை அதிகாரி.