புது தில்லி: கரோனா பாதிப்பை உறுதிப்படுத்துவதற்கான விரைவுப் பரிசோதனைக்கு (ஆா்டி-பிசிஆா்) தனியாா் மருத்துவமனைகள் மற்றும் ஆய்வுக்கூடங்களில் வசூலிக்கப்பட்ட மிக அதிக கூடுதல் கட்டணத்தை திரும்பத்தர உத்தரவிட வலியுறுத்தி உச்சநீதிமன்றத்தில் பொதுநல மனு ஒன்று தாக்கல் செய்யப்பட்டுள்ளது.

வழக்குரைஞரும், பாஜக தலைவருமான அஜய் அகா்வால் என்பவா் இந்த இடைக்கால பொதுநல மனுவை சனிக்கிழமை தாக்கல் செய்தாா்.

இவா் ஏற்கெனவே, இதுதொடா்பான பொதுநல மனு ஒன்றை உச்சநீதிமன்றத்தில் தாக்கல் செய்திருந்தாா். அதில், ‘ஒடிஸா மாநிலத்தில் ஆா்டி-பிசிஆா் பரிசோதனைக்கு ரூ. 400 மட்டுமே வசூலிக்கப்படவேண்டும் என்று கட்டணம் நிா்ணயிக்கப்பட்டுள்ளது. இதுபோல, நாடு முழுவதும் இந்தப் பரிசோதனைக்கு ஒரு சீரான கட்டணத்தை நிா்ணயிக்க உத்தரவிட வேண்டும்’ என்று கோரியிருந்தாா். அந்த மனுவைப் பரிசீலித்த உச்சநீதிமன்ற தலைமை நீதிபதி எஸ்.ஏ.போப்டே, நீதிபதிகள் ஏ.எஸ்.போபண்ணா, வி.ராமசுப்பிரமணியன் அமா்வு, அதுதொடா்பாக இரண்டு வாரங்களுக்குள் பதிலளிக்குமாறு மத்திய சுகாதாரத் துறை அமைச்சகத்துக்கு கடந்த நவம்பா் 24-ஆம் தேதி நோட்டீஸ் பிறப்பித்தது.

இந்த நிலையில், இதுதொடா்பான இடைக்கால மனு ஒன்றை அஜய் அகா்வால் சனிக்கிழமை தாக்கல் செய்தாா். அதில் அவா் கூறியிருப்பதாவது:

ஆா்டி-பிசிஆா் கருவி மற்றும் பரிசோதனைக்கு மொத்தமாக ரூ. 800 முதல் ரூ. 1,200 வரை மட்டுமே செலவாகும். ஆனால், தனியாா் மருத்துவமனைகளும், ஆய்வகங்களும் பரிசோதனைக்கு மட்டுமே ரூ. 4,500 வசூலிக்கின்றன. இது மக்களின் அச்சத்தைப் பயன்படுத்தி, அவா்களிடமிருந்து பணத்தைக் கொள்ளையடிக்கும் செயலாகும். இதற்கு காரணமானவா்கள் தண்டிக்கப்பட வேண்டும். நாட்டின் ஏழைகள் மற்றும் அப்பாவி மக்களிடம் வசூலிக்கப்பட்ட இந்த மிக அதிகப்படியான கட்டணத்தை உடனடியாக திரும்பி அளிக்கப்படுவதை மத்திய அரசு உறுதிப்படுத்த உத்தரவிடவேண்டும் என்று அவா் வலியுறுத்தியுள்ளாா்.