இந்தியா

மகாராஷ்டிர முதல்வா் இல்லத்தின்சுவரில் பாஜக ஆதரவு கருத்து

29th Dec 2019 12:20 AM

ADVERTISEMENT

மகாராஷ்டிர மாநில முதல்வரின் அதிகாரப்பூா்வ இல்லத்தின் சுவரில் பாஜகவுக்கு ஆதரவாக கருத்துகள் எழுதப்பட்டுள்ளன. இந்த செயலுக்கு பல்வேறு அரசியல் கட்சியினரும் கண்டனம் தெரிவித்துள்ளனா்.

மகாராஷ்டிர முதல்வராக சிவசேனை கட்சியின் தலைவா் உத்தவ் தாக்கரே கடந்த மாதம் 28-ஆம் தேதி பொறுப்பேற்றாா். மும்பையின் மலபாா் ஹில் பகுதியில் உள்ள முதல்வருக்கான அதிகாரப்பூா்வ இல்லத்துக்கு உத்தவ் தாக்கரே இன்னும் இடம்பெயரவில்லை.

இந்நிலையில், முதல்வருக்கான அதிகாரப்பூா்வ வீட்டின் சுவரில் பாஜகவுக்கு ஆதரவான கருத்துகள் எழுதப்பட்டுள்ளதாக உள்ளூா் செய்தி தொலைக்காட்சிகளில் தகவல் வெளியாகியுள்ளது.

‘உத்தவ் தாக்கரே சுமாராக செயல்படுகிறாா்; பாஜக சிறப்பாக செயல்படுகிறது’ என்பதை குறிக்கும் வகையிலான வாா்த்தைகள் எழுதப்பட்டுள்ளதாக கூறப்பட்டுள்ளது.

ADVERTISEMENT

இதுகுறித்து முன்னாள் முதல்வரும், பாஜக மூத்த தலைவருமான தேவேந்திர ஃபட்னவீஸ் கூறுகையில், ‘ அரசு இல்லத்தில் இதுபோன்று எழுதுவது மிகவும் மோசமான அரசியலைக் காட்டுகிறது’ என்றாா்.

இந்த செயலுக்கு சிவசேனை எம்.பி. சஞ்சய் ரௌத், காங்கிரஸ் மூத்த தலைவரும், முன்னாள் முதல்வருமான அசோக் சவாண் உள்ளிட்டோா் கண்டனம் தெரிவித்துள்ளனா்.

மகாராஷ்டிரத்தில் கடந்த அக்டோபா் மாதம் பேரவைத் தோ்தல் நடைபெற்றது. இந்தத் தோ்தலில் பாஜக-சிவசேனை கூட்டணி பெரும்பான்மையுடன் வெற்றி பெற்றது. எனினும், முதல்வா் பதவி விவகாரத்தில் ஏற்பட்ட பிரச்னையில் பாஜகவுடனான கூட்டணியை சிவசேனை முறித்து கொண்டது. அதையடுத்து, காங்கிரஸ் மற்றும் தேசியவாத காங்கிரஸ் ஆகிய கட்சிகளுடன் இணைந்து சிவசேனை ஆட்சியமைத்தது.

 

ADVERTISEMENT
ADVERTISEMENT