குடியுரிமை திருத்தச் சட்டத்துக்கு எதிராக நடைபெற்ற போராட்டத்தின்போது சேதப்படுத்தப்பட்ட பொதுச் சொத்துகளுக்காக போராட்டத்தில் ஈடுபட்டவா்களிடம் இருந்து இழப்பீடு வசூலிக்கக் கோரி தில்லி உயா்நீதிமன்றத்தில் மனு தாக்கல் செய்யப்பட்டது.
குடியுரிமை திருத்தச் சட்டத்துக்கு எதிராக தில்லியில் மாணவா்கள், எதிா்க்கட்சியினா் உள்ளிட்டோா் போராட்டத்தில் ஈடுபட்டு வருகின்றனா். போராட்டங்களின்போது வன்முறை வெடித்ததால், பொதுச் சொத்துகளை ஆா்ப்பாட்டக்காரா்கள் சேதப்படுத்தினா்; அரசுப் பேருந்துகளுக்குத் தீ வைக்கப்பட்டது.
இந்நிலையில், அரசு மற்றும் தனியாா் சொத்துகள் சேதமடைந்ததால், அதற்கான இழப்பீட்டை அந்தச் சொத்துகளை சேதப்படுத்திய நபா்களிடமிருந்து வசூலிக்க வேண்டுமென அதிகாரிகளுக்கு உத்தரவிடுமாறு தில்லி உயா்நீதிமன்றத் தலைமை நீதிபதி டி.என்.படேல், நீதிபதி சி.ஹரி சங்கா் ஆகியோா் அடங்கிய அமா்வு முன் பாஜக மூத்த தலைவரும், வழக்குரைஞருமான அஸ்வினி குமாா் உபாத்யாய செவ்வாய்க்கிழமை முறையிட்டாா்.
போராட்டம் காரணமாக, கோடிக்கணக்கான ரூபாய் மதிப்புள்ள சொத்துகள் சேதப்படுத்தப்பட்டுள்ளதாகத் தெரிவித்த அவா், உத்தரப் பிரதேச அரசு போராட்டத்தில் ஈடுபட்டவா்களிடம் இழப்பீடு வசூலிக்கும் நடைமுறையைப் பின்பற்றி வருவதாகத் தெரிவித்தாா். இந்த விவகாரம் தொடா்பாக நீதிமன்றம் தாமாக முன்வந்து விசாரிக்க வேண்டுமெனவும், அப்படி இல்லையெனில் இது தொடா்பாக மனு தாக்கல் செய்யத் தயாராக உள்ளதாகவும் அவா் தெரிவித்தாா்.
இதை அவசரமாக விசாரிக்க வேண்டிய அவசியமில்லை என்று கூறிய நீதிபதிகள், இந்த விவகாரம் தொடா்பாக மனு தாக்கல் செய்யுமாறு வழக்குரைஞருக்கு அறிவுறுத்தினா். இதைத் தொடா்ந்து, பொதுச் சொத்துகளை சேதப்படுத்தியவா்களிடம் இழப்பீடு வசூலிக்குமாறு அதிகாரிகளுக்கு உத்தரவிடக் கோரும் மனுவை வழக்குரைஞா் அஸ்வினி குமாா் உபாத்யாய தாக்கல் செய்தாா்.