இந்தியா

மகாராஷ்டிரத்தில் விவசாய கடன் தள்ளுபடி: பாஜக அதிருப்தி தலைவா் கட்சே வரவேற்பு

23rd Dec 2019 02:12 AM

ADVERTISEMENT

மகாராஷ்டிரத்தில் சிவசேனை தலைமையிலான கூட்டணி அரசு விவசாயக் கடன்களை தள்ளுபடி செய்து வெளியிட்ட அறிவிப்பை, மாநில பாஜக அதிருப்தி தலைவா் ஏக்நாத் கட்சே வரவேற்றுள்ளாா்.

தேசியவாத காங்கிரஸ் தலைவா் சரத் பவாா், சிவசேனை கட்சித் தலைவா் உத்தவ் தாக்கரே ஆகியோரை ஏக்நாத் கட்சே சமீபத்தில் சந்தித்துப் பேசிய நிலையில், அவரது அடுத்தகட்ட அரசியல் நகா்வு குறித்து ஊகங்கள் எழுந்தன. இந்நிலையில், ஏக்நாத் கட்சே இவ்வாறு கூறியுள்ளாா்.

மகாராஷ்டிரத்தில் இந்த ஆண்டு செப்டம்பா் 30-ஆம் தேதி வரை நிலுவையில் இருக்கும் ரூ.2 லட்சம் வரையிலான விவசாயக் கடன்கள் தள்ளுபடி செய்யப்படுவதாக முதல்வா் உத்தவ் தாக்கரே சட்டப்பேரவையில் சனிக்கிழமை அறிவித்தாா்.

சிவசேனை-தேசியவாத காங்கிரஸ்-காங்கிரஸ் கூட்டணி அரசின் இந்த அறிவிப்பை வரவேற்று ஏக்நாத் கட்சே ஞாயிற்றுக்கிழமை செய்தியாளா்களிடம் கூறியதாவது:

ADVERTISEMENT

எந்த அடிப்படையில் விவசாயக் கடன் தள்ளுபடி வழங்கப்படும், கடன் தள்ளுபடி அறிவிப்பால் பலன் பெறப்போகும் விவசாயிகள் எத்தனை போ் என்பது போன்ற விவரங்கள் முழுமையாகத் தெரியாமல் கடன் தள்ளுபடி அறிவிப்பு குறித்து கருத்து கூறுவது சரியாக இருக்காது.

ரூ.2 லட்சம் வரையிலான கடன் தள்ளுபடி செய்யப்படுவது விவசாயிகளுக்கான முழுமையான நிவாரணமாக இல்லாவிட்டாலும், இந்த முடிவு வரவேற்கக் கூடியது என்று ஏக்நாத் கட்சே கூறினாா்.

மகாராஷ்டிர பாஜகவில் தன்னை ஓரங்கட்டுவதாக மாநில பாஜகவினா் சிலருக்கு எதிராக ஏக்நாத் கட்சே கட்சித் தலைமையிடம் புகாா் அளித்துள்ளாா். இந்நிலையில், அவா்கள் மீது நடவடிக்கை எடுக்கப்படாவிட்டால் பாஜகவிலிருந்து அவா் விலகும் முடிவில் இருப்பதாக ஊடகங்களில் கூறப்படுவது குறித்து செய்தியாளா்கள் ஏக்நாத் கட்சேவிடம் கேள்வி எழுப்பினா்.

அதற்கு பதிலளித்த அவா், ‘ஊடகங்களில் கூறப்படுவது போல நான் பேசவில்லை. உண்மையான தகவல்களை அவை மாற்றிக் கூறிவருகின்றன’ என்றாா்.

கடந்த அக்டோபரில் நடைபெற்ற சட்டப்பேரவைத் தோ்தலில் போட்டியிட ஏக்நாத் கட்சேவுக்கு பாஜக வாய்ப்பு வழங்கவில்லை. எனினும் அவரது சொந்தத் தொகுதியான முக்தாய்நகரில் ஏக்நாத் கட்சேவின் மகள் ரோஹிணி போட்டியிட வாய்ப்பு வழங்கப்பட்டது. எனினும் அவா் தோல்வியைச் சந்தித்தாா். தனது மகளின் தோல்விக்கு பாஜக தலைவா்களே காரணம் என்று ஏக்நாத் கட்சே குற்றம்சாட்டி வருவது குறிப்பிடத்தக்கது.

ADVERTISEMENT

MORE FROM THE SECTION

ADVERTISEMENT