செவ்வாய்க்கிழமை 16 ஜூலை 2019

ஆரோக்கியத்திற்கு ஆதாரமாகும் நாட்டு விதைகள்! 

DIN | Published: 12th July 2019 05:12 PM


சென்ற இதழ்களில் எளிமையாக வீட்டு தோட்டம் அமைக்க எவ்வாறு இடத்தை தேர்வு செய்வது என்பதையும் அதனோடு செடி வளர்ச்சிக்கு அவசியமான மண் கலவையை எளிமையாக தயாரிக்கும் முறைகளையும் பார்த்தோம். அடுத்ததாக தோட்டத்திற்கும், செடிக்கும், உணவிற்கும், மனித ஆரோக்கியத்திற்கும் ஆதாரமாக இருக்கும் வித்துக்கள் அதாவது விதைகளைப் பற்றி தெரிந்து கொள்வோம். 

செடிகளின் இலையிலிருக்கும் ஒரு செல்லை வைத்தே இன்று செடி, மரம் என எதை வேண்டுமானாலும் வளர்க்க முடியும் என்ற காலம் இந்த நவீன காலம். செடி வளர்ச்சிக்கே இன்று விதைகள் தேவையில்லை என்றபொழுது விதைகள் எவ்வாறு ஆரோக்கியத்திற்கு ஆதாரமாகும்? என்கிறீர்களா.. உண்மைதான், விதையில்லாத காய்கறி, பழங்கள் என பலவற்றை பெருமையாக சிரமமின்றி உண்பதற்கு இன்று பழகிவிட்டோம். மேலும் அடுத்த தலைமுறை விவசாயிகள் விவசாயத்தை விட்டு வெளியேறுவதும், மண் மலடானதால் விளைச்சல் குறைந்ததும், மழை பொய்த்ததும், ஆரோக்கியம் என்ற வார்த்தையைக்கூட இணையத்திலும் வலைதளங்களிலும் மட்டுமே தேடக்கூடியதாக இருப்பதும் அன்றாடம் நிகழும் நிகழ்வுகளாகத்தான் உள்ளது. 

விதைகள் என்று மறைந்ததோ (குறைந்ததோ அல்லது மாற்றப்பட்டதோ) அன்றே நமது ஆரோக்கியமும் மறைந்தது. காய்களுக்குள்ளும், பழங்களுக்குள்ளும் இருந்த விதைகள் நமக்கு சிரமமாக தோன்றி அதனை தொலைத்து விட்டோம். இதனால் உடலில் இருக்கும் விதைகள் குறைந்துள்ளது. இன்றைய தலைமுறையினர் தங்களது வாரிசுகளை பெறுவதற்கு போராடுகின்றனர். ஆண், பெண் மலட்டுத்தன்மை மேல்நோக்கி உள்ளது. 

உடல் ஆரோக்கியமும் இயற்கை தன்மை மாறாத உணவும் ஒன்றோடு ஒன்று பின்னிப் பிணைந்தது. மொத்தத்தில் உடல் ஆரோக்கியம், உணவு, விவசாயம் ஆகிய மூன்றும் ஒன்றுக்குள் ஒன்று அடக்கமானவை. இன்று உணவின் வித்தான விதைகள், உணவினை தரக்கூடிய விவசாய முறைகள் ஆகியவை தொலைந்ததால் ஆரோக்கியமும் தொலைந்துவிட்டது.

ஆரோக்கியத்திற்கு அஸ்திவாரமான உணவிற்கு ஆதாரமாக இருக்கும் விதைகளே மனித சமூகத்தின் பேராயுதம். விதைகளை பேணிப்பாதுகாப்பதாலேயே சிறந்த ஆரோக்கியம், சிறந்த சுற்றுசூழல், சிறந்த வாழ்வியலை பெறமுடியும். 

அனைத்தும் தொழில் மயமாக்கல் நவீன கோட்பாட்டில் விதைகளும் இன்று அடங்கியுள்ளது. இயற்கையில் பிரமிப்பை ஏற்படுத்தும் பறந்து விரிந்த ஆலமரத்தினை பிரம்மாண்டத்தை கடுகளவு விதை அடக்கி வைத்திருக்கிறது. இன்றைய நவீன வளர்ச்சியோ எதையும் விட்டு வைக்கவில்லை. அந்த ஆலமரத்தின் விதையைப் பிரித்து அதன் மரபணுவை மாற்றி தனக்கு தேவையான வடிவம், இலைகள், உயரம், அகலம், காய்கள், விழுதுகள் என அனைத்தையும் வடிவமைத்து நவீனப்படுத்துகின்றனர். அதுமட்டுமல்ல அந்த விதைகள் துளிர்க்கும், வளரும், காய்க்கும் ஆனால் மீண்டும் தனது இனத்தைப் பெருக்க ஏதுவான விதைகளை அளிக்காது. மாறாக மலட்டு விதைகளை மட்டுமே அளிக்கும். இந்த நவீன விதையின் ஆலமரத்திலிருந்து கிடைக்கும் மலட்டு விதைகளை மீண்டும் மண்ணிலிட்டால் அவை பொதுவாக முளைப்பதுமில்லை, வளருவதுமில்லை அல்லது காய்ப்பதுமில்லை. இதனால் இயற்கை இனப்பெருக்க சுழற்சி அறுபடுகிறது. ஒன்றிற்கும் உதவாத விதைகளாகிறது. 

பின் எதற்காக இந்த விதைகள்? அதுதான் தொழில் வளர்ச்சி. வியாபாரம். நீங்கள் ஆலமரத்தை வளர்க்கவேண்டுமென்றால் அந்த தொழில் நிறுவனத்திடம் மட்டுமே விதைகளை பெறவேண்டும் (வாங்கவேண்டும்). ஆலமரத்திற்கு மட்டுமல்ல இந்த கதி. நாம் அன்றாடம் சாதாரணமாக உண்ணும் அரிசி பருக்கை தொடங்கி தக்காளி, கத்திரிக்காய், வெண்டைக்காய் என அனைத்தின் விதைகளும் இவ்வாறானவைகளே. 

நாம் உண்ணும் உணவின் விளைச்சலை அதிகப்படுத்த இவ்வாறான நவீன விதைகள் என்ற விளம்பரத்துடன் வெளிவந்த இவ்வகை விதைகள் உண்மையில் விளைச்சலை அதிகப்படுத்தவில்லை மாறாக சுற்றுச்சூழலுக்கு, மனிதர்களின் ஆரோக்கியத்திற்கும் கேடு விளைவித்தன. இன்றைய நவீன நோய்கள் அதாவது வாழ்வியல் சார்ந்த நோய்களுக்கு மிக முக்கிய காரணமாக இருப்பது இவ்வகை விதைகளிலிருந்து கிடைத்த உணவுகள். இந்த வகை hybrid விதைகளை அதிக விளைச்சல் தரக்கூடிய விதைகள் (high yielding variety) அல்லது அதிக உரத்தை சார்ந்து விளையக்கூடிய விதைகள் (fertiliser responsive variety) என்று கூறுவார்கள்.

விதைகளின் தன்மையை மாற்றியதால் உடலுக்கு தகுந்த இயற்கையான சத்துகளை அளிக்க இவ்வகை உணவுகள் தவறியதும், அதிக ரசாயனங்கள், பூச்சிக் கொல்லிகள், களைக் கொல்லிகள் போன்ற நச்சுக்களை கொண்டு வளருவதால் இவற்றை உண்ணும் மனிதர்களுக்கு இந்த நச்சுகளினால் உடலின் செயல்பாடுகள், நரம்புகளின் செயல்பாடுகள், ரத்தத்தின் தன்மை, ஹார்மோன் சுரப்புகள் போன்றவை மாற்றமடைய வாழ்வியல் நோய்களுக்கு ஆளாகின்றனர்.
இன்று சந்தையில் அதிகமாக கிடைக்கக்கூடிய விதைகள் என்பது ஹைபிரிட் விதைகள்தான். இவற்றை தவிர்த்துவிட்டு நமது பாரம்பரிய நாட்டு விதைகளையே நமது வீட்டு தோட்டத்தில் பயன்படுத்தவேண்டும். நாட்டு விதைகள் என்பது காலம் காலமாக விதை, செடி, பூ, காய், விதை மீண்டும் செடி, பூ, காய் என்று சுழற்சியில் வரக்கூடியது. நமது மண்ணிற்கும், நமது சூழல், நமது நீர், நமது தட்பவெப்பம் போன்றவற்றிற்கு ஏற்ப வளரக்கூடியவை. இவ்வகை விதைகளிலிருந்து வரும் செடிகள் இயற்கையிலேயே பூச்சி மற்றும் நோய்த்தாக்குதலை எதிர்த்து வளரக்கூடியவை. ரசாயன உரங்களை ஏற்காதவை. அதிக வெயில், மழை என எல்லா சூழலையும் தாங்கி வளரக்கூடியவை. இயற்கையிலேயே பல பேரூட்ட மற்றும் நுண்ணூட்ட சத்துகளை கொண்டவை. இதனால் இவற்றை உண்பவர்களுக்கு தேவையான சத்துகளையும், நுண்காரணிகளையும் எளிமையாக அளிக்கக்கூடியது. இவ்வகை நாட்டு விதைகளிலிருந்து கிடைக்கும் உணவை உட்கொள்வதால் பலவகை நோய்கள் தீரும். ஆரோக்கியமும் மேம்படும். 

வீட்டுதோட்டம் என்பது நமது ஆரோக்கியத்திற்காக நாம் பார்த்துப்பார்த்து வளர்க்கும் தோட்டம். வீட்டினருகில் இருக்கும் காய்கறி விற்கும் அங்காடிக்கு சென்று எந்தநேரமும் எவ்வளவு வேண்டுமானாலும் வெண்டைக்காய் வாங்கிக் கொள்ளலாம். அதுவே நமது வீட்டிலோ விதையை விதைத்து இரண்டுமாதங்கள் அதற்கு தேவையான இயற்கை ஊட்டம், நீர் போன்றவற்றை பார்த்துப்பார்த்து அளித்தபின்பே அரைகிலோ வெண்டைக்காயைப் பார்க்கமுடியும். நமது வீட்டில் வளர்ப்பது, அதனை பராமரிப்பது என்பதெல்லாம் விருப்பத்திற்கு மேல் சற்று சிரமமான காரியம்தான் என்றாலும் நமது குடும்பத்தின் ஆரோக்கியமே அந்த அரை கிலோவில் தான் உள்ளது என்பதை மறுத்துவிடமுடியாது.

திருமணம் ஆகாதவரா? இன்றே பதிவு செய்யுங்கள் தமிழ் மேட்ரிமோனியில் - பதிவு இலவசம்!

More from the section

அரசு மருத்துவர்கள் தொடர் உண்ணாவிரதம்: புறநோயாளிகள் சிகிச்சையை புறக்கணிக்கத் திட்டம்
அறிவை தேடுவதற்கு பெருந்தடையாக இருப்பது இதுதான்!
எந்நேரமும் கோபம், ஞாபக மறதியா! மூளை மழுங்கல் பிரச்னையாக இருக்கலாம்!
உங்கள் உடலை அழகாக்க உதவும் ஆரோக்கியத் துவையல்
உங்களை உற்சாகப்படுத்தும் ஒரு ஆசனம்!