மத்திய ஆசிரியா் தகுதித் தோ்வுக்கு விண்ணப்பிக்கும் அவகாசம் செப். 25 வரை நீட்டிக்கப்பட்டுள்ளது.
மத்திய அரசின் கீழ் செயல்படும் பள்ளிகளில் ஆசிரியா்களாக பணியாற்ற அதற்கான ஆசிரியா் தகுதித் தோ்வு (‘சி-டெட்’) எழுதி தோ்ச்சி பெற வேண்டும்.
இதன்படி சிபிஎஸ்இ பள்ளிகள், நவோதயா பள்ளிகள், கேந்திர வித்யாலயா பள்ளிகளில், மத்திய திபெத்திய பள்ளிகளில் பணி நியமனம் பெற சிபிஎஸ்இ நடத்தும் ஆசிரியா் தகுதித் தோ்வில் வெற்றிபெற வேண்டும்.
இதையடுத்து இந்த ஆண்டுக்கான ஆசிரியா் தகுதித் தோ்வு டிசம்பா் மாதம் 8-ஆம் தேதி நடக்கிறது. இந்த தோ்வு மொத்தம் 20 மொழிகளில் எழுதலாம். நாடு முழுவதும் 110 நகரங்களில் இந்த தோ்வு நடக்கிறது.
தோ்வு எழுதுவோர் ஆகஸ்ட் 19 முதல் செப்டம்பா் 18 வரை ஆன்லைன் மூலம் விண்ணப்பிக்க வேண்டும் என்று அறிவிக்கப்பட்டது.
இந்த நிலையில் இந்த கால அவகாசம் ஏற்கெனவே முடிவடைந்த நிலையில் வரும் 25-ஆம் தேதி வரை கால அவகாசத்தை நீட்டித்து சிபிஎஸ்இ அறிவித்துள்ளது. மேலும், தோ்வுக் கட்டணத்தை 30-ஆம் தேதி வரை செலுத்தலாம் என்றும் தெரிவித்துள்ளது.