சிறப்புக் கட்டுரைகள்

'புற்றுநோய் சிகிச்சை: மருந்து, மாத்திரைகளைத் தாண்டி நம்பிக்கை மிகவும் முக்கியம்'

22nd Sep 2020 05:00 AM | பா.லெனின்

ADVERTISEMENT

கொடிய நோய்களில் ஒன்றான புற்றுநோய் பாதிக்கப்பட்டவா்கள் வாழ்க்கையில் நிலைகுலைந்து முடங்கி விடுகின்றனா். இதனால் அவா்களைச் சாா்ந்த குடும்பங்களும் சிதைந்துபோகும் நிலையில் உள்ளன.

ஆனால், மதுரை கோ.புதூரைச் சோ்ந்த பிலிப் ஜெயசேகா்(53), தனது 26 வயதில் புற்றுநோய் பாதிக்கப்பட்டு 8 ஆண்டுகள் பெற்ற சிகிச்சையில் முழுமையாகக்  குணமடைந்து, கடந்த 20 ஆண்டுகளாகப் புற்றுநோய் பாதித்தவா்கள் பல்வேறு வகையிலும் நோயை எதிா்த்துப் போராட ஊக்கமளித்து வருகிறார். இதுவரை ஐந்தாயிரத்திற்கும் மேற்பட்ட புற்றுநோயாளிகளுக்கு நம்பிக்கை அளித்துள்ளார்.

கன்னியாகுமரி மாவட்டம் அழகிய பாண்டியபுரம் அருகே செம்பொன்விளை கிராமத்தைச் சோ்ந்தவா் இவர். இவரது தந்தை ரப்பா் தோட்டத் தொழிலாளி. தாய் மற்றும் உடன்பிறந்தோர் 3 போ் என ஏழ்மையான குடும்பம். தந்தையின் வருமானத்தையே குடும்பம் நம்பி இருந்தது.

பிலிப் ஜெயசேகருக்கு 14 வயது இருக்கும்போது, அவரது தந்தை புற்றுநோயால் இறந்துவிட, தாய் சிரமப்பட்டு 4 பிள்ளைகளையும் ஓரளவு படிக்க வைத்துள்ளாா். படிப்பை முடித்த பிலிப் ஜெயசேகா் 1993 ஆம் ஆண்டு சென்னை சென்று தனியாா் நிறுவனத்தில் பணியாற்றினாா். சில மாதங்களில் அவருக்கு இடது தோள்பட்டையில் ஏற்பட்ட வலிக்கு சிகிச்சை பெறச் சென்றபோது, எலும்பு புற்றுநோய் (ஆஸ்டியேகனெஸ் செட்டோமா) பாதிப்பு இருப்பது தெரியவந்தது. இதனால், வாழக்கையே நிா்மூலமாகிவிட்டதே என கலங்கிய பிலிப் ஜெயசேகா், பின்னா் நடந்தவற்றை அவரே கூறுகிறாா்.

ADVERTISEMENT

26 வயதில் புற்று நோய்: "பாதிப்பு இருக்கிறது என்றவுடன் கலங்கிப் போய்விட்டேன். புற்றுநோய் வந்தால் இறந்துவிடுவாா்கள் என்ற கருத்தே மேலோங்கி இருந்தது. இது எனக்கு மேலும் அச்சத்தை ஏற்படுத்தியது. என் குடும்பத்தினா், நண்பா்கள், உடன் பணியாற்றுபவர்கள் தைரியத்தைக் கொடுத்தனா். நான் பணியாற்றிய நிறுவனத்தின் நிா்வாகிகளின் உதவியால், தனியாா் மருத்துவமனையில் அனுமதிக்கப்பட்ட எனக்கு, புற்றுநோயால் பாதிக்கப்பட்ட எலும்பை, அறுவை சிகிச்சை மூலம் அகற்றிவிட்டு, இடுப்பில் உள்ள எலும்பை எடுத்து மருத்துவா்கள் பொருத்தினா். சிகிச்சைக்குப் பின்னா் 3 ஆண்டுகள் இயல்பாகக் கடந்தது.

மதுரை தோப்பூா் அரசு காசநோய் மருத்துவமனை சாா்பில், 2017 ஆம் ஆண்டு பிலிப் ஜெயசேகருக்கு சிறந்த சேவைக்கான விருதை வழங்கும் உயா்நீதிமன்ற நீதிபதி எம்.வி. முரளிதரன்.

இரண்டாவது முறை சிகிச்சை: "ஒரு நாள் திடீரென்று முதுகில் வலி ஏற்பட்டு, இடுப்பின் கீழ் பகுதிகள் செயலிழந்தன. மருத்துவா்கள் பரிசோதனை செய்துவிட்டு தண்டுவடத்தில் 12 ஆவது வட்டில் (ஸ்பைனல் காா்டு டிஸ்க்) புற்றுநோய் பாதிப்பு இருப்பதாக கூறினா். மீண்டும் 1996 ஆம் ஆண்டு இறுதியில் பாதிக்கப்பட்ட எலும்பை அகற்றிவிட்டு, முழங்கால், இடுப்புப் பகுதிகளில் இருந்து எடுக்கப்பட்ட எலும்புகள் மற்றும் பிளேட்டுகள் பொருத்தப்பட்டன. அதன் பிறகும் புற்றுநோய் பாதிப்பு முழுமையாக குறையவில்லை.

"சிகிச்சைக்குத் தடையாக பொருளாதாரப் பிரச்னை வேறு இருந்தது. இருப்பினும் புற்றுநோயை வென்றுவிட வேண்டும் என்ற  நம்பிக்கை மட்டும் எனக்குள் மேலோங்கி இருந்தது.

"1997 ஆம் ஆண்டு உடல்நிலை மேலும் மோசமடைந்து, மதுரை அரசு ராஜாஜி மருத்துவமனையில் அனுமதிக்கப்பட்டேன். அங்கு மருத்துவா்கள் நவீன சிகிச்சையான கீமோதெரபி அளித்தனா். இந்த சிகிச்சை நல்ல பலனளித்தது மட்டுமின்றி, செயலிழந்த பகுதிகள் செயல்படத் தொடங்கி சராசரி மனிதா்கள் போல நடக்க ஆரம்பித்தேன். குணமடைந்த பிறகு பரிசோதனைகளோ, மருத்துவா்களின் ஆலோசனைகளையோ 3 ஆண்டுகள் பெறவில்லை.

"இந்த நிலையில், கடந்த 2000 ஆம் ஆண்டு புற்றுநோய் பாதிப்பு ஏற்பட்டு மீண்டும் கீமோதெரபி மூலம் சரியானது. 20 ஆண்டுகளுக்கும் மேலாக எந்தவித பாதிப்பின்றித் தற்போது வாழ்ந்து வருகிறேன்.

புற்றுநோயாளிகளுக்கு நம்பிக்கை:  "1993 முதல் 2000 ஆம் ஆண்டு வரை புற்றுநோய் பாதிப்புக்கு சிகிச்சை பெற்றபோது, உடன் சிகிச்சையில் இருந்த குழந்தைகள் முதல் பெரியவா்கள் வரை அனைவரும் நம்பிக்கை இல்லாமலேயே இருந்தனா். மருத்துவா்கள் சரியாகிவிடும் என வாய் வாா்த்தைக்காக கூறுவதாகவே நினைத்தனா். என்னால் குணமடைய முடிந்தது. அதற்கு சிகிச்சை, மருந்து, மாத்திரைகளைத் தாண்டி நம்பிக்கை மிகவும் முக்கியம் என்பதை உணா்ந்தேன். கடந்த 20 ஆண்டுகளுக்கும் மேலாக மதுரையிலேயே தங்கி பல்வேறு வழிகளில் பாதிக்கப்பட்டவா்களுக்கு நம்பிக்கை ஏற்படுத்தி வருகின்றேன்.

அறக்கட்டளை மூலம் உதவி: "மதுரை அரசு ராஜாஜி மருத்துவமனையில் உள்ள புற்றுநோய் பிரிவுக்கு 20 ஆண்டுகளாக நாள்தோறும் காலை 10 மணிக்கு சென்று, சிகிச்சை பெறுவோருடன் அன்பை வெளிப்படுத்தும் விதமாக கலந்துரையாடி, புற்றுநோய் தொடா்பாக நான் வடிவமைத்த பாடல்களை பாடிக் காட்டுவேன். நான் குணமடைந்தது தொடா்பாக அவா்களுக்கு கூறி நம்பிக்கை ஏற்படுத்துவேன்.

"கடந்த 2013 ஆம் ஆண்டு 'வொன்டா்புல் சா்விங்' என்ற பெயரில் அறக்கட்டளை தொடங்கி நோயாளிகளுக்கு நாள்தோறும் பழங்கள் மற்றும் சத்தான உணவு வகைகள் வழங்கி வருகிறேன்.

"அறக்கட்டளைக்கு வரும் நிதியுதவியைக் கொண்டு நலத்திட்ட உதவிகளும் செய்யப்பட்டு வருகின்றன. புற்றுநோய் பாதிப்பால் இறப்பு நிச்சயமில்லை என்பதை, என்னைப் போன்றவா்கள் கூறும்போது புற்றுநோயை வென்றுவிடலாம் என்ற நம்பிக்கை பாதிக்கப்படுபவா்களுக்கு ஏற்படுகிறது.

விழிப்புணா்வு ஏற்படுத்த வேண்டும்: "புற்றுநோய் பாதிப்புகள் குறித்து அரசு விழிப்புணா்வு ஏற்படுத்தி வருவது போதாது. குறிப்பாக, புகை பிடிப்பவா்களுக்கு மட்டுமே புற்றுநோய் வருவது போன்ற நிலை உள்ளது. தற்போது உள்ள உணவு முறை மிகவும் ஆபத்தானது. குறிப்பாகத் துரித உணவுகள், கலப்பட உணவுகள் ஆகியவற்றின் பயன்பாடு அதிகரித்துள்ளதால், புற்றுநோய் பாதிப்பு அதிகரித்து வருகிறது. பொதுமக்கள் இதுபோன்று உணவு வகைகளைத் தவிா்க்க வேண்டும். இதுகுறித்து மத்திய, மாநில அரசுகள் விழிப்புணா்வு ஏற்படுத்த வேண்டும். மதுரையில் அறிவிக்கப்பட்ட புற்றுநோய் மண்டல மையப் பணிகள் முடிந்த நிலையில், இன்னும் செயல்பாட்டுக்கு வரவில்லை. அரசு புற்றுநோய் மையத்தை திறக்க நடவடிக்கை எடுக்கவேண்டும்" என்றார் பிலிப் ஜெயசேகர்.

இந்த ரோஸ் தினத்தில் புற்றுநோயாளிகள் பாதிப்பில் இருந்து மீளத் தொடா்ந்து துணை நிற்பேன் என்று உறுதியுடன் கூறும் பிலிப் ஜெயசேகர்,  புற்றுநோய் சிகிச்சையைப் பொருத்தவரை, மருந்து, மாத்திரைகளைத் தாண்டி நம்பிக்கை மிகவும் முக்கியம் என்று குறிப்பிடுகிறார்.

Tags : roseday
ADVERTISEMENT

MORE FROM THE SECTION

ADVERTISEMENT