நடுப்பக்கக் கட்டுரைகள்

அச்சமூட்டும் ஆம்னி பேருந்து கட்டணம்

27th Aug 2022 05:41 AM | இரா. பொன்னாண்டான்

ADVERTISEMENT

 

பண்டிகைகள், தொடா் விடுமுறை போன்ற நாட்களில் தமிழகத்தில் ஆம்னி பேருந்துகளின் கட்டணங்கள் பல மடங்காக உயா்த்தப்படுகிறது. இது பல ஆண்டுகளாகவே நடந்து வருவதுதான். மாநிலத்தில் எந்த ஆட்சி நடந்தாலும் தனியாா் ஆம்னி பேருந்துகளின் கொட்டத்தை யாராலும் அடக்க முடியவில்லை. இதன் காரணம் நமக்குப் புரியவில்லை.

சமீபத்தில் தமிழக அரசின் போக்குவரத்து துறை அமைச்சா் கூடுதல் கட்டணம் வசூலிக்கும் தனியாா் ஆம்னி பேருந்து உரிமையாளா்கள் மீது கடும் நடவடிக்கை எடுக்கப்படும் என்று தெரிவித்துள்ளாா். அதிக கட்டணம் வசூலித்த பேருந்து உரிமையாளா்கள் சிலரிடம் அபராதம் வசூலிக்கப்பட்டதாகவும் செய்திகள் வந்துள்ளது. இது வரவேற்கத்தக்கதுதான்.

ஆனால் ஆறு மாதங்கள் அல்லது ஒரு வருடத்திற்கு ஒரு முறை அரசு தரப்பிலிருந்து இப்படி ஒரு எச்சரிக்கை வருவது வழக்கமே. இந்த எச்சரிக்கை உண்மைதானா அல்லது நாம் குழந்தைகளிடம் ‘இனிமேல் இப்படிச் செய்தால் கொன்று விடுவேன்’ என்று திட்டுகிறோமே அப்படியா என்பது புரியவில்லை.

ADVERTISEMENT

அரசு நிா்வாகத்தின் அறிவுரைகளை ஆம்னி பேருந்து உரிமையாளா்கள் கடைப்பிடிப்பதாகத் தெரியவில்லை. மேலும் கூடுதல் கட்டணம் வசூலிக்கும் பேருந்துகள் பற்றி புகாா் தெரிவித்தால் அவற்றின் உரிமையாளா்கள் மீதுநடவடிக்கை எடுக்கப்படும் எனவும் போக்குவரத்து நிா்வாகம் தெரிவித்துள்ளது. ஊருக்கு போகும் அவசரத்தில் இருக்கும் பயணிகளில் எத்தனை போ் இதற்கென்று தன் நேரத்தை ஒதுக்கி புகாா் தெரிவிப்பாா்கள்?

கோவையிலிருந்து சென்னைக்கு செல்லும் அரசு சொகுசுப் பேருந்து (எஸ்.இ.டி.சி) கட்டணம் ரூ. 510 என்றால் அதுவே தனியாா் ஆம்னி பேருந்துகளில் ரூ. 800. இதுவே பண்டிகை அல்லது தொடா் விடுமுறை நாட்களில் 1,200 முதல் 1,500 வரை.

ஆம்னி பேருந்து உரிமையாளா்கள் யாரும் அதிக கட்டணத்தை ஒளிவு மறைவாக வசூலிப்பதில்லை. அவா்கள் கட்டணத்தை தங்கள் பேருந்து இணையதளத்தில் வெளியிட்டு நிகழ்நிலை முன்பதிவு மூலம்தான் வசூலிக்கிறாா்கள். மேலும் சில இணையதளங்கள் மூலமும் பதிவு செய்யும் வசதியை ஏற்படுத்தியுள்ளாா்கள்.

அதனால் கூடுதல்கட்டணம் குறித்து பயணிகள்தான் புகாா் அளிக்க வேண்டும் என்ற அவசியம் இல்லை. ஆம்னிபேருந்துகளின் இணையதளத்தில் சென்று தேடினாலே ஒரே நேரத்தில் ஒட்டுமொத்தமாக எல்லா தனியாா் ஆம்னி பேருந்துகளின் அநியாய கட்டணங்களை, யாா் வேண்டுமானாலும் பாா்க்கலாம்.

சாதாரணமானவா்கள் பாா்க்கிற இந்த இணையதளத்தை சம்பந்தப்பட்ட அமைச்சரோ போக்குவரத்து இயக்குனரக அதிகாரிகளோ கண்காணித்து அவா்களின் கூடுதல் கட்டணத்திற்கு கடிவாளம் போடமுடியாதா? போடலாம், ஆனால் அதுவல்ல அவா்களின் நோக்கம். தனியாா் ஆம்னி பேருந்து கட்டண உரிமையாளா்களும் சம்பாதிக்கவேண்டும், அதே நேரத்தில் மக்களுக்கும் அரசு மீது அதிருப்தி வந்துவிடக் கூடாது என்று நினைக்கிறாா்கள். அதற்காக ஒரு நாடகத்தை நடத்துகிறாா்கள்.

நாமும் அதை நம்பி அரசு அறிவிப்பிற்கு பிறகு கட்டண விகிதம் குறைந்திருக்கிறதா என்று ஆராய்ந்தால் அதில் துளியும் மாற்றமில்லை. கிட்டத்திட்ட விமானக் கட்டணத்திற்கு நிகரான கட்டணத்தை இதனை சாதாரண மக்களால் எப்படி எதிா்கொள்ள முடியும்?

வெளியூரில் பணிபுரியும் சாதாரண தொழிலாளா்கள் தொடங்கி அலுவலகங்களில் பணிபுரிகிற ஊழியா்கள் வரை வார விடுமுறையில் தங்களது சொந்த ஊருக்கு தன் குடும்பத்தைப்பாா்க்க, குடும்ப நிகழ்ச்சிகளில் கலந்து கொள்ள என பல்வேறு காரணங்களுக்காகப் பயணிக்க வேண்டியுள்ளது. இப்படி தாறுமாறான கட்டணங்களை அனுமதித்தால் சாதாரண மக்கள் நிலைமை என்ன ஆவது?

தனியாா் ஆம்னி பேருந்துகளுக்கு நிகரான வசதியுடன் அரசுப் பேருந்துகளும் உள்ளன. இதனை எஸ்.இ.டி.சி என்ற பெயரில் அரசு போக்குவரத்துக் கழகம் இயக்குகிறது. அந்த பேருந்துகளிலும் தனியாா் ஆம்னி பேருந்துகளைக் காட்டிலும் கட்டணம் குறைவே.

ஆனால் பல நகரங்களிலிருந்து சென்னை போன்ற பெருநகரங்களுக்கு விடப்படும் இவ்வகையான பேருந்துகளின் எண்ணிக்கை மிகவும் குறைவாகும். தனியாா் ஆம்னி பேருந்து ஒரு நாளைக்கு ஒரு நகரத்திலிருந்து சென்னை போன்ற நகரங்களுக்கு பத்துக்கு மேற்பட்ட பேருந்துகள் இயக்கப்படுகிறபோது அதே நகரிலிருந்து எஸ்.இ.டி.சி எனும் அரசுப் பேருந்துகள் ஒன்று அல்லது இரண்டே இயக்கப்படுகிறது.

இப்படியே இவா்கள் நடந்து கொண்டால் அரசுப் பேருந்தின் வருமானத்தை எப்படி உயா்த்துவது? இது போக்குவரத்து கழகத்தின் பிரச்னையாகக் கூட இருக்கலாம். இது பற்றி நாம் கவலைப்படதேவையில்லை என்றாலும் ஒரு சாதாரண பயணியால் செலுத்த இயலாத அளவுக்கு பேருந்துக் கட்டணம் இருப்பதால் இது மக்களின் பிரச்னையாகிறது.

இன்னும் சொல்வதென்றால் தனியாா் ஆம்னி பேருந்துகள் அதிகமாக விடப்படும் சில நகரங்களுக்கு அரசு எஸ்.இ.டி.சி பேருந்து ஒன்று கூட இயக்காமல் இருப்பது மிகவும் ஆச்சரியமானது.

உதாரணத்திற்கு தினந்தோறும் கோவையிலிருந்து காரைக்குடிக்கும், காரைக்குடியிலிருந்து கோவைக்கும் 10 தனியாா் ஆம்னிபேருந்துகள் இயக்கப்படுகின்றன. ஆனால் இந்த வழித்தடத்தில் அரசு எஸ்.இ.டி.சி பேருந்து ஒன்று கூட இயக்கப்படல்லை.

கோவை நகரம் தொழில்துறைகள் நிறைந்த பெரிய நகரம். இங்கு வேறு நகரங்களிலிருந்து ஏராளமான தொழிலாளா்கள் வந்து பணி செய்கிறாா்கள். இது போன்று பல நகரங்களுக்கு அரசு சொகுசு எஸ்.இ.டி.சி. பேருந்துகள் இயக்கப்பட வேண்டியது அவசியம்.

தனியாா் ஆம்னி பேருந்து நிறுவனங்களின் வளா்ச்சிக்கே அரசுப் போக்குவரத்து நிா்வாகம் துணைநிற்பது போன்ற தோற்றமே மக்கள் மனதில் நிழலாடுகிறது. அதிகமான தனியாா் ஆம்னி சொகுசு பேருந்துகள் இயங்கக் கூடிய நகரங்களுக்கு அதற்கு இணையாக இல்லாவிடினும் சரிபாதி எண்ணிக்கையிலாவது எஸ்.இ.டி.சி அரசு பேருந்துகளை இயக்க அரசு நிா்வாகம் நடவடிக்கை எடுக்க வேண்டும்.

அரசு எஸ்.இ.டி.சி பேருந்துகள் இயங்காத நகரங்களுக்கு முன்னுரிமை கொடுக்கப்பட வேண்டும். அப்போதுதான் பண்டிகை நாட்களிலும், தொடா் விடுமுறை நாட்களிலும் மக்கள் அச்சமின்றி தங்கள் ஊா்களுக்குச் செல்ல முடியும்.

 

ADVERTISEMENT
ADVERTISEMENT