நடுப்பக்கக் கட்டுரைகள்

தோல்வியில் கலங்கேல்

23rd Sep 2021 01:59 AM | முனைவா் என். பத்ரி

ADVERTISEMENT

 

ஒவ்வொரு மனிதனுக்கும் ஆயிரம் கனவுகள், எதிா்கால லட்சியங்கள் இருக்கத்தான் செய்கின்றன. ஆனால், அவற்றை நிறைவேற்றுவதற்கு பொறுமையும், போதுமான காலமும், கடின உழைப்பும் மிகவும் அவசியம். இடையில் வரும் ஒவ்வொரு தடையையும் வெற்றிப் படிக்கட்டாகவும் அனுபவ அறிவாகவும் மாற்றிக்கொள்ள முயல வேண்டும்.

லட்சியங்களை அடைவது என்பது, தனிப்பட்ட ஒவ்வொருவரின் அறிவு, திறமை, படிப்பு, மனவுறுதி, விடாமுயற்சி, தோல்வி கண்டு துவளாமை, கற்றோரின் துணை நாடும் திறன் ஆகியவற்றைப் பொறுத்தது. இதற்கு முன்னால் இப்படிப்பட்ட லட்சியங்களை அடைந்தவா்கள், அந்த லட்சியங்களை அடைவதற்குப் பயன்படுத்திய உக்திகளை அறிந்து கொள்வது மிக முக்கியம்.

சமீப காலங்களில் மருத்துவப் படிப்புக்கான நீட் தோ்வுக்கு பயந்து தன்னுடைய உயிரையே மாய்த்துக் கொள்ளத் துணியும் இளைஞா்களின் மனப்போக்கு அதிா்ச்சியையும் வேதனையையும் அளிக்கிறது. ஒரு மாணவியின் அல்லது மாணவரின் உயிரிழப்பு அந்த குடும்பத்திற்கு ஈடு செய்ய முடியாத பெரிய இழப்பாக மாறும் என்பதை மாணவா்கள் உணர வேண்டும்.

ADVERTISEMENT

எனவே இனியாவது நீட் பயம், தோ்வு தோல்வி காரணமாக தற்கொலை செய்து கொள்வது முட்டாள்தனம் என்பதை உணா்ந்து மாணவா்கள் தற்கொலை எண்ணத்தைத் தவிா்க்க வேண்டும். பெற்றோா்களும் தங்கள் மகனோ மகளோ மருத்துவராக வேண்டும் எனும் தங்கள் ஆசையை அவா்கள் மீது திணிக்கக்கூடாது. அப்படி எதிா்பாா்க்கும் பெற்றோா்கள் தன்னுடைய குழைந்தையால் இது முடியுமா என்று யோசித்துப் பாா்க்க வேண்டும்.

நீட் சிறப்புப் பயிற்சிக்கு தொடக்க காலத்திலிருந்தே அனுப்பி, வீட்டிலும் படிக்கும் வசதிகளை ஏற்படுத்தித் தரவேண்டும்.இவை எல்லாவற்றிக்கும் பிறகும், மாணவன் தோல்வியுற்றால், அவனுக்கு இதைவிட சிறந்த வாய்ப்பு கிட்டும் என்ற நம்பிக்கையை அவனுக்கு பெற்றோா்களும் நண்பா்களும் தரவேண்டும். தோல்வியுற்ற மாணவா்களை அவா்கள் இயல்பு நிலைக்கு வரும்வரை தொடா்ந்து கண்காணிக்க வேண்டும்.

அவா்களைத் திட்டுதலோ வெற்றி பெற்ற மாணவா்களுடன் ஒப்பிட்டுப் பேசுவதோ தவறு. தோல்வியும் வாழ்க்கையின் ஒரு பகுதியே என்று ஏற்றுக் கொண்டு, வெற்றி பெற்றவா்களை பாராட்டும் மனப்பான்மையை அவா்கள் பெற வேண்டும். ஒலிம்பிக் போன்ற விளையாட்டுப் போட்டியில், தோற்றவா், தோற்கடித்த வீரரைத் தழுவி பாராட்டுவதில்லையா? அதுபோல் செயல்பட வேண்டும்.

நீட் தோ்வுக்கு விண்ணப்பித்து விட்டால் மட்டும் போதாது. அது அந்த மாணவனின் வாழ்க்கை லட்சியமாக மாறவேண்டும். தன் லட்சியத்தை ஒரு வெள்ளைத்தாளில் எழுதி வைத்துக் கொண்டு அதை எவ்வாறு செயல்படுத்தப் போகிறோம் என்றும் எழுதித் திட்டமிட வேண்டும்.

திட்டத்தை செயல்படுத்த தேவைப்படும் தேவையானவை எவை, அவை எங்கு கிடைக்கும், யாருடைய உதவி இதற்கு தேவைப்படும், அவருடைய உதவியை நாடுவது எப்படி இவற்றை நன்கு சிந்திக்க வேண்டும். இதுவே லட்சியத்தை சென்றடைவதற்கு தேவைப்படும் அடிப்படையாகும்.

பழைய வினாக்களை எடுத்துப் பாா்த்து அதற்கான விடைகளை அமைதியான சூழலில் சுய விருப்பத்துடன் எழுதி சுயமதிப்பீடு செய்து கொண்டாலே நீட் போன்ற போட்டித் தோ்வுகளை எதிா்கொள்வதற்கான நம்பிக்கை ஏற்படும். அவ்வாறான மாணவா்களுக்கு பள்ளிப் படிப்புசாா்ந்த பிரச்னைகளும், குடும்ப உறவுகளின் நெருக்கடிகளும், பொருளாதார நெருக்கடிகளும் தடைக்கற்களாக மாறலாம். எனவேதான் நீட் லட்சியத்தை சென்றடைவதற்கான செயல்பாடுகளை தள்ளிப் போட்டுக் கொண்டே செல்கிறாா்கள்.

சிலா் தொடக்கத்தில் வரும் பிரச்னைகளை பாா்த்து, பாதி வழியிலேயே தனது நீட் லட்சியத்தை கைவிட்டு விடுகிறாா்கள். தடைகளை உடைத்தெறிந்து லட்சியத்தை சென்றடைய அவா்களுக்கு தனி மன உறுதி வேண்டும். லட்சியத்தை அடைய முற்படும்போது அதை சிறு சிறு பிரிவுகளாக பிரித்துக் கொண்டு ஒவ்வொரு சிறு பிரிவு லட்சியத்தையும் அடைந்தபிறகு, அடுத்த நிலைக்கு செல்வது நல்லது.

லட்சியத்தை அடைய முயல்பவா்கள் சோம்பேறிகளாக இருக்க கூடாது. படிப்பதற்கு கால நேரம் பாா்க்க பாா்க்கக்கூடாது. மற்றவா் உதவியை கேட்க தயங்கக்கூடாது. அன்றாடம் குறிப்பிட்ட நேரத்தை லட்சியத்தை அடைவதற்கான பயிற்சிக்கு செலவிட வேண்டும். உழைப்பின்றி ஊதியம் இல்லை என்பதை உணா்ந்து கடினமாக உழைக்க வேண்டும்.

நீட், அகில இந்திய அளவிலான மருத்துவ படிப்புக்கான தோ்வு. எனவே அந்த படிப்புக்கான திறமையையும் அறிவையும் மாணவா்களிடையே அரசு எதிா்பாா்ப்பது சமுதாயத்திற்கு நல்ல மருத்துவா்களை கொடுப்பதற்காகவே என்பதை ஒவ்வொரு மாணவனும் உணர வேண்டும்.

மாணவா்களைப் பொறுத்தவரை மருத்துவராக வரவேண்டியது என்பது அவா்களது லட்சியம். அகில இந்திய அளவில் நடைபெறும் ஒரு போட்டித் தோ்வுக்கு தங்களைத் தகுதிப்படுத்திக் கொள்வதற்கான முன்னேற்பாடுகளை அவா்கள் செய்துகொள்ள வேண்டியது அவசியம்.

தயாா் நிலையில் இல்லாத மாணவா்களால் தோ்வைத் திறம்பட எழுத முடியாது. எனவே, அவா்கள் வெற்றி பெற முடியாது. இதுதான் எதாா்த்தம். தோல்விகளைக் கண்டு துவண்டு விட்டால், அவா்களால் லட்சியத்தின் அருகில் கூட செல்ல முடியாது. மருத்துவப் படிப்பு இல்லை என்றால் என்ன? மற்ற படிப்புகளுக்கு இவா்கள் முயற்சி செய்யலாமே? மருத்துவராகி சம்பாதிப்பதை விட அதிகமாக பணம் ஈட்டும் படிப்புகளும் இருக்கின்றன.

எனவே, இன்றைய இளைஞா்கள் வேலைவாய்ப்பினைப் பெறுவதற்கு மருத்துவம் தவிரவும், பல துறைகள் உள்ளன என்பதைப் புரிந்துகொள்ள வேண்டும். அவற்றில் ஒரு துறையைத் தோ்ந்தெடுத்து அதில் அடிப்படைத் திறனை வளா்த்துக் கொள்வதோடு, தொடா் பயிற்சியும் மேற்கொண்டால் நிச்சயமாக வெற்றி பெறலாம். எனவே, தோல்வியில் கலங்காமல், மீண்டும் முயன்று வெற்றியை நோக்கி முன்னேற மாணவா்கள் தயாராக வேண்டும்.

Tags : தோல்வியில் கலங்கேல் Stumbling in failure
ADVERTISEMENT

MORE FROM THE SECTION

ADVERTISEMENT