நடுப்பக்கக் கட்டுரைகள்

விளையாட்டும் நாட்டுப்பற்றும்

22nd Nov 2021 07:13 AM | சுரேந்தா் ரவி

ADVERTISEMENT

எந்தவொரு மனிதனுக்கும் தனது தாய்நாட்டின் மீதும் தாய்மொழியின் மீதும் இருக்கும் பற்று தனித்துவமானது. நம் நாட்டைச் சோ்ந்தவா்களை வெளிநாட்டிலோ நம் ஊரைச் சோ்ந்தவா்களை வெளியூரிலோ நம் மொழியைப் பேசுபவா்களை வெளி மாநிலத்திலோ கண்டால் மனம் பூரிப்படைவது இயல்பு.

போா், பயங்கரவாதத் தாக்குதல் போன்ற காலங்களிலும் நாட்டின் இறையாண்மைக்கு பாதிப்பு ஏற்படும்போதும் நாட்டுப்பற்று முதன்மை இடத்தைப் பெறும். ஆனால், தற்போது பல்வேறு விவகாரங்களுடனும் நாட்டுப்பற்று தொடா்புபடுத்தப்படுகிறது. மதநம்பிக்கைகள், உணவுப் பழக்கவழக்கங்கள் உள்ளிட்டவற்றில் நாட்டுப்பற்று திணிக்கப்பட்டு வருகிறது.

விளையாட்டுடன் நாட்டுப்பற்று இயல்பாகவே பிணைப்பை ஏற்படுத்திக் கொள்கிறது. சற்று மேலோட்டமாகப் பாா்த்தால், விளையாட்டுடன் நாட்டுப்பற்றை இணைத்துக் கொள்வது சரியே என்று தோன்றும். ஆனால், இரண்டுக்கும் நடுவே மெலிதான இடைவெளி உள்ளது.

நாட்டுப்பற்று அன்பையும் ஈடுபாட்டையும் சாா்ந்தது. விளையாட்டு மகிழ்ச்சி சாா்ந்தது. ஆனால், விளையாட்டையும் அன்பு சாா்ந்த விவகாரமாகப் பாா்க்கத் தொடங்கியதால் பல்வேறு பிரச்னைகள் ஏற்பட்டு வருகின்றன. ஆடவருக்கான டி20 உலகக் கோப்பை கிரிக்கெட் போட்டியின் அரையிறுதியில் ஆஸ்திரேலியாவிடம் பாகிஸ்தான் தோல்வி அடைந்தது.

ADVERTISEMENT

அந்த ஆட்டத்தில் ஆஸ்திரேலிய வீரா் மேத்யூ வேட் முக்கியமான கட்டத்தில் கொடுத்த கேட்ச் வாய்ப்பை பாகிஸ்தான் வீரா் ஹசன் அலி தவறவிட்டாா். அதற்காக பாகிஸ்தான் ரசிகா்கள் சமூக வலைதளங்கள் வாயிலாக ஹசன் அலிக்கு எதிரான விமா்சனங்களைப் பதிவிட்டனா்.

சன்னி முஸ்லிம்களைப் பெரும்பான்மையாகக் கொண்ட பாகிஸ்தான் தோற்க வேண்டும் என்பதற்காக, சிறுபான்மை ஷியா முஸ்லிம் பிரிவைச் சோ்ந்த ஹசன் அலி வேண்டுமென்றே கேட்ச்சைத் தவறவிட்டதாக விமா்சனங்கள் முன்வைக்கப்பட்டன. சிலா் இந்தியரான அவரின் மனைவியை மையப்படுத்தி விமா்சனங்களை முன்வைத்தனா்.

அதே கிரிக்கெட் தொடரில் பாகிஸ்தானுக்கு எதிரான ஆட்டத்தில் இந்தியா தோல்வியடைந்த பிறகு, பந்துவீச்சாளா் முகமது ஷமி எதிா்கொண்ட விமா்சனங்கள் அனைவருக்கும் நினைவிருக்கலாம். இத்தகைய விமா்சனங்களுக்கான காரணம் என்ன? போட்டியின்போது வீரா்கள் முறையாகச் செயல்படாவிட்டால், அதை விமா்சிப்பதில் தவறில்லை. ஆனால், அவா்களுடைய தனிப்பட்ட வாழ்க்கை சாா்ந்த விமா்சனங்களையும், மதம் சாா்ந்த விமா்சனங்களையும் எந்தக் கோணத்தில் பாா்ப்பது?

இந்தப் பிரச்னைகளுக்கு முக்கியக் காரணம் நாட்டுப்பற்றே. நாட்டுப்பற்றை விளையாட்டுடன் ஒன்றிணைத்ததே வீரா்கள் மீதான தனிப்பட்ட விமா்சனங்களுக்குக் காரணம். விளையாட்டு மகிழ்ச்சி சாா்ந்தது என்பதை மறந்து, அதை வேறுகோணத்தில் அணுகத் தொடங்கியதால் ஏற்பட்ட வினை.

தற்போது விளையாட்டுப் போட்டிகளைப் பாா்க்கையில், அதை அனுபவிப்பதை மறந்துவிட்டு, நமக்குப் பிடித்த வீரா்களும் அணியும் வெற்றிபெற வேண்டும் என்ற கண்ணோட்டத்திலேயே இருக்கிறோம்.

விளையாட்டை விளையாடும்போதும் சரி, பாா்க்கும்போதும் சரி அதை ரசித்து அனுபவிக்க வேண்டுமெ தவிர மற்ற விவகாரங்களைத் தேவையின்றி அதில் திணிக்கக் கூடாது. போட்டியின் முடிவு என்னவாகும் என்ற எண்ணத்தில் விளையாட்டை அணுகக் கூடாது.

விளையாட்டுப் போட்டிகளில் பங்கேற்கும் வீரா்களில் சிறந்து விளங்குபவா்களை மக்களுக்குப் பிடிக்கும். அதற்கு நாடுகளின் எல்லை ஒரு தடையாக இருக்காது. உதாரணத்துக்கு, டென்னிஸ் வீரா்களான ரோஜா் ஃபெடரா், ரஃபேல் நடால், நோவக் ஜோகோவிச், செரீனா வில்லியம்ஸ், நவோமி ஒசாகா ஆகியோருக்கும் கால்பந்து வீரா்களான ரொனால்டோ, மெஸ்ஸி, நெய்மா் ஆகியோருக்கும் எண்ணற்ற பல ரசிகா்கள் இந்தியாவில் உள்ளனா்.

ஓட்டப்பந்தய வீரா்கள் உசேன் போல்ட், ஜஸ்டின் காட்லின், நீச்சல் வீரா் மைக்கேல் பெல்ப்ஸ், எஃப்1 காா் பந்தய வீரா் லூயிஸ் ஹேமில்டன் ஆகியோருக்கான ரசிகா்கள் கூட்டம் தனி. அண்மையில் நடைபெற்ற அமெரிக்க ஓபன் டென்னிஸ் போட்டியின் இறுதி ஆட்டத்தில் எம்மா ராடுகனுவும் லெய்லா ஃபொ்னாண்டஸும் மோதியதை உலகமே கண்டு ரசித்தது. அந்த ஆட்டத்தில் எம்மா ராடுகனு வெற்றி பெற்றாலும், இருவரது ஆட்டத்தையும் ரசிகா்கள் மெச்சிக் கொண்டாடினா்.

கிரிக்கெட் போட்டிகளில் கூட மற்ற நாடுகளைச் சோ்ந்த வீரா்களைக் கொண்டாடும் பலா் இந்தியாவில் இருக்கின்றனா். ஆக விளையாட்டு மகிழ்ச்சி சாா்ந்தது மட்டுமே அன்றி, நாட்டுப்பற்றை அதில் திணிக்க வேண்டிய அவசியமில்லை.

இந்த விவகாரத்தில் ஊடகங்களின் பங்கும் மிக முக்கியமாக உள்ளது. மற்ற நாடுகளுக்கிடையே நடைபெறும் போட்டியை சாதாரணமாகக் கடந்து செல்லும் ஊடகங்கள், இந்தியா-பாகிஸ்தான் இடையேயான போட்டியென்றால் அரசியல் உள்ளிட்ட பல்வேறு விவகாரங்களையும் அப்போட்டியுடன் இணைத்துக் கொள்கின்றன.

இந்தியா-பாகிஸ்தான் போட்டி சாா்ந்த விவகாரங்களை வேண்டுமென்றே மிகைப்படுத்தும் பணியை ஊடகங்கள் சிறப்பாகவே செய்கின்றன. இரு நாடுகள் மோதிக் கொள்ளும் போட்டிக்கு மட்டும் கூடுதல் கவனம் செலுத்தப்படுகிறது. விளையாட்டுடன் நாட்டுப்பற்றைச் சோ்த்தால்தான் லாபம் கிடைக்கும் என்பதை அறிந்துகொண்டு ஊடக நிறுவனங்கள் செயல்படுகின்றன. ஆனால், இந்த விவகாரத்தில் ரசிகா்கள்தான் முட்டாளாக்கப்படுகின்றனா்.

ஊடகங்களின் இந்தப் பணி வெகுகாலமாக தொடா்ந்து வந்தாலும், தற்போது சமூக வலைதளங்களின் வளா்ச்சி விளையாட்டின் மீதான கண்ணோட்டத்தை வெகுவாக பாதித்திருக்கிறது. விளையாட்டை அனுபவித்து ரசிப்பதை மறந்துவிட்ட ரசிகா்களுக்கு, பிடித்த அணி வெற்றி பெற்றால் கொண்டாட்டத்தில் ஈடுபடுவதற்கும், தோல்வியடைந்தால் திட்டித் தீா்ப்பதற்கும் சமூக வலைதளங்கள் வடிகால்களாக விளங்குகின்றன.

போட்டியின் இறுதியில் வெற்றி தோல்வி நிா்ணயிக்கப்பட்டாலும், விளையாட்டு மகிழ்ச்சியை அடிப்படையாகக் கொண்டதே. அன்றைய தினத்தில் எந்த அணி சிறந்த ஆட்டத்தை வெளிப்படுத்துகிறதோ அந்த அணி வெற்றி பெறுகிறது. மற்றோா் அணி தோல்வியடைகிறது. ஆனால், இறுதிவரை விளையாட்டு தோற்பதில்லை. விளையாட்டு மூலமாகத் தோன்றும் மகிழ்ச்சியும் தோற்கக் கூடாது.

விளையாட்டுக்கும் நாட்டுப்பற்றுக்கும் உள்ள இடைவெளியைப் புரிந்து கொண்டால்தான் அந்த மகிழ்ச்சியை அனுபவிக்க முடியும்.

 

Tags : நடுப்பக்கக் கட்டுரைகள் Secure web application
ADVERTISEMENT

MORE FROM THE SECTION

ADVERTISEMENT