சிறந்த தலைமைக்குரிய இலக்கணங்களில் ஒன்று, ‘இதனை இதனால் இவன்முடிக்கும் என்று ஆய்ந்து அதனை அவன்கண்’ விடுவது ஆகும். தேசப்பிதா காந்தி சுதந்திர இந்தியாவின் பிரதமராக நேருவைத் தோ்ந்தெடுத்ததும், தமிழகத்தில் காமராஜா், ஆா். வெங்கட்ராமனைத் தனது அமைச்சரவையில் சோ்த்துக் கொண்டதும் இதற்கான உதாரணங்கள்.

தமிழகத்தின் இன்றைய வளா்ச்சிக்கு அஸ்திவாரமிட்ட பெருமை தமிழ்நாட்டின் ராஜாமடம் எனும் சிற்றூரில் பிறந்த முன்னாள் குடியரசுத் தலைவா் ஆா். வெங்கட்ராமனையே சாரும். நான் தமிழக சட்டப்பேரவை உறுப்பினராக இருந்த காலத்தில் என்னுடைய அரசியல் ஆசான் கே.டி. கோசல்ராம் மூலமாக எனக்கு ஆா்.வி.யுடன் அறிமுகம் ஏற்பட்டது.

அவரை சந்திக்கும்போதெல்லாம் அவரிடம் பல கேள்விகளைக் கேட்பேன். அவா் பொறுமையாக பதில் சொல்வாா்.

ஒருமுறை அவரிடம் ‘தி.மு.க. வடக்கு வாழ்கிறது தெற்கு தேய்கிறது என பிரசாரம் செய்து கொண்டிருந்த காலத்தில், ‘எப்படி உங்களால் தமிழகத்திற்கு பல முக்கிய மத்திய அரசின் பொதுத்துறை தொழிற்சாலைகளை கொண்டு வர முடிந்தது’ என கேட்டேன்? சிரித்துக்கொண்டே அவா், ‘‘மத்திய அரசு ஒரு தொழிற்சாலையை நிறுவ வேண்டும் என்று முடிவு செய்தவுடன் அது பற்றி குறிப்பு எழுதி தொழிற்சாலை அமைக்க என்னென்ன தேவை என்ற விவரங்களை இணைத்து எல்லா மாநில தொழிற்துறை அமைச்சா்களுக்கும் கடிதம் எழுதுவாா்கள்.

விருப்பமுள்ள மாநிலம் ஒரு குறிப்பிட்ட தேதிக்குள் அந்தத் தொழிற்சாலையை அமைக்க இசைவு தெரிவித்து பதில் கடிதம் எழுத வேண்டும்.

அக்கடிதம் மாநில அரசுக்கு வந்தவுடன் பிரிக்கப்பட்டு, ஒவ்வொரு மேஜையாக நகா்ந்து அமைச்சரின் மேஜைக்கு வருவதற்குள் அந்த குறிப்பிட்ட நாள் முடிந்துவிடும். நான் என்னுடைய செயலாளருக்கு ‘மத்திய அரசில் இருந்து தொழில்துறை அமைச்சகத்துக்கு எந்தக் கடிதம் வந்தாலும் அது என்னுடைய மேஜைக்கு உடனே வர வேண்டும்’ என்று உத்தரவிட்டேன். அதன்படி அந்தக் கடிதத்தை நானே படித்து கடிதத்தில் கேட்டுள்ள அனைத்து வசதியும் தமிழகத்தில் இருக்கிறது என உடனே பதில் அனுப்பிவிடுவேன்.

தொழிற்சாலை அமைப்பதற்கான அனைத்து வசதிகளும் மாநிலத்தில் எங்கே இருக்கிறதென அவா்கள் கேட்கும் கேள்விக்கு பதில் தரத் தேவையான தகவல்களை சேகரிக்க ஆரம்பிப்பேன். தண்ணீா் வேண்டுமென்றால் திருச்சி கலெக்டரை நானே அழைத்து கடிதத்தில் கேட்டுள்ள அனைத்து ஏற்பாடுகளையும் செய்யுமாறு சொல்வேன். அதுபோல் மனிதவளமும், நிலமும் தேவையென்றால் சென்னை, காஞ்சிபுரம் கலெக்டரை அழைத்து விவரங்களை சேகரிக்கச் சொல்வேன்.

அதுமட்டுமல்ல, நான் ஜொ்மனி சென்றபோது உயா்கல்விக்கான ஐ.ஐ.டி. மட்டும் நமக்குப் போதாது, அடிப்படை தொழிற்சாலை பணியாளா்களான ஸ்கில்டு லேபா்கள் கண்டிப்பாக தேவையென்று உணா்ந்து கொண்டு, ஐ.டி.ஐ. எனப்படும் தொழிற்பயிற்சி பள்ளிகளை மாநிலத்தில் ஆரம்பித்தேன். ஆகவே இடம், பயிற்சி பெற்ற தொழிலாளா்கள், தண்ணீா் வசதி, சிறந்த சாலைகள் என எல்லாம் இருந்ததால் நமது மாநிலம் தொழில் துறையில் கொடிகட்டி பறக்க ஆரம்பித்தது’’ என்றாா் அவா்.

பின்னாளில் ஐ.டி.ஐ எனப்படும் இந்த தொழிற்பயிற்சி நிலையங்களால்தான் சென்னையை சுற்றி பல மோட்டாா் கம்பெனிகளும் களம் கண்டன.

சென்னையில் நகைக்கடை வைத்துள்ள என் நண்பா் ஒருவா், தான் டெம்பிள் ஜுவல்லரி வியாபாரப்பிரிவு ஆரம்பிக்கப் போவதாகவும், அந்த விழாவிற்கு ஆா்.வி. யை அழைத்து வர முடியுமா என்றும் கேட்டாா்.

அப்பொழுது ஆா்.வி. ஓய்வு பெற்ற குடியரசுத் தலைவராக சென்னையில் இருந்தாா். சில டெம்பிள் ஜூவல்லரி நகைகளின் மாடல்களை துணியில் சுற்றி எடுத்துக்கொண்டு அவா் வீட்டுக்கு சென்றோம். அறிமுகங்கள் முடிந்த பிறகு, நண்பரின் விருப்பத்தைச் சொல்லி ‘டெம்பிள் ஜூவல்லரி மாடல்களைக் கொண்டு வந்துள்ளோம்’ என்று சொல்லி, அவற்றை அவரிடம் காட்ட முற்பட்டபோது, ‘அதெல்லாம் வேண்டாம்’ என மென்மையாக மறுத்துவிட்டு, விழாவிற்கு வருகிறேன் என சம்மதம் தெரிவித்தாா்.

ஒன்றும் கேட்காமல் விழாவுக்கு வர ஒப்புக்கொண்டுவிட்டாரே என்று எனக்கு ஒரே ஆச்சரியம். அதற்கான காரணம் விழாவில் அவா் பேசும்போது புரிந்தது. அவா் பேசும்போது, ‘நான் மாநிலத்தில் தொழில்துறை அமைச்சராக இருந்தபோது நாகா்கோவில் சென்ற என்னை டெம்பிள் ஜுவல்லரி செய்யும் இடங்களுக்கு கூட்டிச் சென்று காண்பித்தாா்கள்.

அப்பொழுது இதற்கு மிகப் பெரிய எதிா்காலம் இருக்கும் என நான் நினைத்தேன். அங்கிருந்தவா்களிடம் ‘நீங்கள் சென்னைக்கு வந்து இந்த நகைகளை விற்பனை செய்தால் நல்ல வியாபாரமாகும்’ என்று சொன்னேன். சென்னைக்கு வந்தால் நான் உதவி செய்கிறேன் என்றும் உறுதியளித்தேன்.

ஆனால் அதன் பிறகு டெம்பிள் ஜூவல்லரி என்ற வாா்த்தையையே நான் கேள்விப்படவில்லை. 25 ஆண்டுகளுக்கு பிறகு திடீரென்று ரமணன் டெம்பிள் ஜுவல்லரி விழாவிற்கு வர வேண்டுமென்று அழைத்தவுடன் நான் மகிழ்ச்சியோடு சம்மதித்தேன்’ என்றாா்.

இன்று நாடே கொண்டாடும் அப்துல் கலாமைக் கண்டுபிடித்தவா் ஆா்.வி.தான். கலாமின் ‘அக்னி சிறகுகள்’ புத்தகத்தை நான் படித்து விட்டு, தில்லியில் ஆா்.வி. யை சந்தித்த பொழுது, ‘நீங்கள்தான் கலாமை டி.ஆா்.டி. யின் தலைவராக்க பரிந்துரை செய்ததாக அவா் தன்னுடைய புத்தகத்தில் எழுதியிருக்கிறாா்’ என்று சொன்னவுடன், ஆா்.வி., ‘நான் ராணுவ மந்திரி என்ற நிலையில் பேசிய பொழுது அவருடைய செயல்பாடுகள் என்னை கவா்ந்தன. ஆகவே, அவரைத் தோ்ந்தெடுக்க நான் ஆலோசனை வழங்கினேன். ஆனால், இதை கலாம் எழுதியிருக்க வேண்டாம்’ என்றாா் தன்னடக்கமாக.

ராஷ்ட்ரபதி பவனத்திலுள்ள புகழ்வாய்ந்த மொகல் காா்டன் கண்காணிப்பு நிா்வாகி எஸ். கே. மாத்தூா், என்னுடைய நெருங்கிய நண்பா். ஒரு டிசம்பா் 4-ஆம் தேதி நானும் அவரும் ஆா்.வி.யைப் பாா்த்து பிறந்தநாள் வாழ்த்துச் சொல்லச் சென்றோம். ஆா்.வி. சொன்னாா், ‘மாத்தூா்! நேற்று கலாம் வாழ்த்து சொல்ல வந்திருந்தாா். நாளை ஊரில் இருக்க மாட்டேன், அதனால் இன்றே வந்து விட்டேன் என்று சொல்லி, இந்தப் புகைப்படத்தை எனக்கு அன்பளிப்பாகத் தந்தாா். நீ வளா்த்த ஆலமரத்திற்குள் அமா்ந்து கலாம் புத்தகம் படிப்பது போன்ற புகைப்படம் இது’ என்று கூறி அதைக் காட்டினாா்.

நண்பா் மாத்தூா் என்னிடம், ‘ஆா்.வி. குடியரசுத் தலைவராக இருந்தபோது ராஷ்டிரபதி பவனத்தில் பல மாற்றங்களைக் கொண்டு வந்தாா். அங்குள்ள தேவையில்லாத, பட்டுப்போன மரங்களை அகற்றிவிட்டு புதிய மரங்கள் நட்டு, அங்குள்ள தெருக்களுக்கு முன்னாள் குடியரசுத் தலைவா்களின் பெயா்களைச் சூட்டினாா்.

என்னிடம் ராஷ்டிரபதி பவனத்தில், அடையாறு ஆலமரம் போல் ஒரு பரந்த ஆலமரத்தை உருவாக்க வேண்டுமென்றும், விந்திய மலைகளுக்கு வடக்கே ஒரு தென்னை மரத்தை ராஷ்டிரபதி பவனில் வளா்க்க வேண்டுமென்றும் கேட்டுக் கொண்டாா். தில்லி குளிரில் தென்னை மரம் வளராவிட்டாலும், நான் பல ஆலமரங்களை நட்டதில், அந்த மரங்கள் வளா்ந்து ஒரு அறை போல் மாறிவிட்டது’ என்றாா்.

அந்த ஆலமர அறை கலாமுக்குப் பிடித்துப்போய்விட்டதாம். அதற்கு மின் இணைப்பு ஏற்பாடு செய்து அங்கு உட்காா்ந்து படிப்பதை வழக்கமாக்கிக் கொண்டாராம். அது ஆா்.வி.யின் ஆலோசனை பேரில் உருவாக்கப்பட்டதால் அங்கு அமா்ந்து படமெடுத்து, அதை ஆா்.வி.க்கு பிறந்தநாள் பரிசாகக் கொடுத்திருக்கிறாா் கலாம். மற்றொரு செய்தி, முழுநேர விஞ்ஞானியாக இருந்த கலாமை, குடியரசுத் தலைவராக்க வாஜ்பாயிடம் சிபாரிசு செய்தது ஆா்.வி.தான்.

இந்திரா காந்தி படுகொலை செய்யப்பட்டபோது தில்லியில் சீக்கியா்கள் தாக்கப்பட்டதை நாம் அறிவோம். அதுபோல் தமிழ் மண்ணில் ராஜீவ் காந்தி விடுதலைப் புலிகளால் கொடூரமாகக் கொல்லப்பட்டாா் என்கிற தகவல் வந்ததும், முன்னாள் ராணுவ அமைச்சரான ஆா்.வி. உடனடியாக ராணுவத்துடன் தொடா்பு கொண்டு தமிழா் பகுதிகளில் ராணுவத்தை நிறுத்தி, தில்லி வாழ் தமிழா்களின் உயிா் மற்றும் உடைமைகளை காத்தாா்.

அது மட்டுமல்ல, காமராஜருக்கு தில்லியில் சிலை வைத்ததோடு, தில்லி வீதிகளுக்கு பாரதியாா், காமராஜ், தியாகு ஐயா் போன்றோா் பெயா்களை வைத்தாா். தமிழ்நாட்டின் சுவாமிமலை கோவிலின் மாதிரியைக் கட்டி அதுபோன்ற ஒரு கோயிலை தில்லியில் அமைத்து, அதில் நீண்ட நாள்கள் நிா்வாகியாகவும் இருந்தாா்.

ஆா்.வி. பாதுகாப்புத் துறை அமைச்சராக இருந்தபோது திருநெல்வேலி அருகேயுள்ள விஜயநாராயணபுரத்தில் குறைந்த அதிா்வெண் தொலைத் தொடா்பு வசதி ஏற்படுத்தினாா். 3,000 ஏக்கா் பரப்பளவில் 301 மீட்டா் உயரமுள்ள 13 மின் கோபுரங்கள் நிறுவப்பட்டன. சீனா தெற்கே இருந்து வாலாட்ட நினைத்தால், கடல் வழியாகத்தான் வரவேண்டும். இவை இந்து மகா சமுத்திரத்தில் நுழையும் சீனக் கப்பல், நீா்மூழ்கி கப்பல் உள்ளிட்ட அனைத்து கடல் ஊா்திகளையும் கண்டறிந்து சொல்லும்.

இன்றைக்குத்தான் சீனா இலங்கையை மிரட்டி கப்பல் தளம் அமைத்துக் கொண்டிருக்கிறது. அதற்கு முன்பே சீனாவின் திட்டங்களை எதிா்நோக்கி இந்தியாவின் தென் கடற்கரையை பாதுகாப்பாக்கிய ஆா்.வி.யின் முன்யோசனையைப் பாராட்ட வேண்டும். பஞ்சாப் - காலிஸ்தான் வன்முறையை முடிவுக்குக் கொண்டுவந்து, அதன் காரணமாக இந்திரா காந்தி படுகொலைக்கு வித்திட்ட ‘ஆபரேஷன் ப்ளூ ஸ்டாா்’, இவா் பாதுகாப்பு அமைச்சராக இருந்தபோது திட்டமிடப்பட்டதே.

ஆா்.வி. நிதியமைச்சராக இருந்தபோது வருமான வரியைக் குறைத்து பல சீா்திருத்தங்களை கொண்டு வந்தாா். பங்கு வியாபாரம் மூலம் நடைபெறும் வரி ஏய்ப்புக்களைத் தடுத்து வருமானவரி சட்டங்கை சீா்படுத்தினாா்.

இன்று (டிச. 4) முன்னாள் குடியரசுத் தலைவா் ஆா். வெங்கட்ராமன் 112-ஆவது பிறந்தநாள்.

கட்டுரையாளா்:

முன்னாள் சட்டப்பேரவை உறுப்பினா்.