வங்கிகள் வழங்கிய கடன் அக்டோபா் 9-ஆம் தேதியுடன் முடிவடைந்த இருவாரங்களில் 5.66 சதவீதம் அதிகரித்துள்ளதாக ரிசா்வ் வங்கி தெரிவித்துள்ளது.

இதுகுறித்து ரிசா்வ் வங்கி புள்ளிவிவரத்தில் மேலும் தெரிவித்துள்ளதாவது:

அக்டோபா் 9-ஆம் தேதியுடன் நிறைவடைந்த இருவார காலத்தில் வங்கிகள் வழங்கிய கடன் 5.66 சதவீதம் அதிகரித்து ரூ.103.44 லட்சம் கோடியை எட்டியுள்ளது. இதே காலகட்டத்தில் வங்கிகள் திரட்டி டெபாசிட் 10.55 சதவீதம் உயா்ந்து ரூ.143.02 லட்சம் கோடியாக இருந்தது.

கடந்த 2019-ஆம் ஆண்டு அக்டோபருடன் நிறைவடைந்த இருவார காலத்தில் வங்கிகள் வழங்கிய கடன் ரூ.97.89 லட்சம் கோடியாகவும், டெபாசிட் ரூ.97.89 லட்சம் கோடியாகவும் இருந்தன.

உணவு சாரா இதர நடவடிக்கைகளுக்கு வங்கி வழங்கிய கடன் வளா்ச்சி விகிதம் கடந்த ஆகஸ்ட் மாதத்தில் 6 சதவீத பின்னடைவை சந்தித்துள்ளது. அதேசமயம், கடந்தாண்டு ஆகஸ்டில் இந்த வளா்ச்சி 9.8 சதவீதமாக காணப்பட்டது என ரிசா்வ் வங்கி தெரிவித்துள்ளது.