பொதுக் காப்பீட்டு வணிகத்தில் ஈடுபட்டு வரும் ஐசிஐசிஐ லொம்பாா்டு நிறுவனத்தின் செப்டம்பா் காலாண்டு லாபம் 35 சதவீதம் அதிகரிப்பைக் கண்டுள்ளது.

இதுகுறித்து அந்த நிறுவனம் வெளியிட்ட அறிக்கையில் தெரிவித்துள்ளதாவது:

இயற்கை பேரழிவு மற்றும் கரோனா தொடா்பான காப்பீட்டு விண்ணப்பங்கள் கணிசமாக அதிகரித்த போதிலும் நிறுவனம் செப்டம்பா் காலாண்டில் ரூ.415.74 கோடி நிகர லாபத்தை பதிவு செய்துள்ளது. இது, கடந்தாண்டில் நிறுவனம் ஈட்டிய லாபத்துடன் ஒப்பிடுகையில் 35 சதவீதம் அதிகமாகும்.

ஜூலை-செப்டம்பா் காலாண்டில் நிறுவனத்தின் மொத்த வருமானம் ரூ.2,739.67 கோடியிலிருந்து ரூ.2,883.40 கோடியாக அதிகரித்துள்ளது. நிகர அளவிலான பிரீமியம் வருவாய் ரூ.2,356.92 கோடியிலிருந்து ரூ.2,462.52 கோடியாக உயா்ந்துள்ளது.

காப்பீடு கோரி வாடிக்கையாளா்களிடமிருந்து 17,000 விண்ணப்பங்கள் வந்த நிலையில், 14,000 விண்ணப்பங்களுக்கு இதுவரையில் தீா்வு காணப்பட்டுள்ளது. இதில், கரோனா தொடா்பான காப்பீடு கோரி வந்த 1,000 விண்ணப்பங்களும் அடக்கம். கரோனா காப்பீட்டுக்காக, ரூ.115 கோடி மதிப்பிலான தொகை காப்பீட்டுதாரா்களுக்கு வழங்கப்பட்டுள்ளது. இதில், செப்டம்பரில் மட்டும் 50 சதவீத தொகை வழங்கப்பட்டுள்ளது என ஐசிஐசிஐ லொம்பாா்டு அந்த அறிக்கையில் கூறியுள்ளது.