டிவிஎஸ் மோட்டாா் நிறுவனத்தின் நவம்பா் மாத விற்பனை 21 சதவீதம் அதிகரித்துள்ளது.
இதுகுறித்து அந்த நிறுவனம் செவ்வாய்க்கிழமை வெளியிட்ட அறிக்கையில் தெரிவித்துள்ளதாவது:
டிவிஎஸ் நிறுவனம் நவம்பா் மாதத்தில் 3,22,709 வாகனங்களை ஒட்டுமொத்த அளவில் விற்பனை செய்துள்ளது. இது, கடந்தாண்டு நவம்பரில் விற்பனையான 2,66,582 வாகனங்களுடன் ஒப்பிடுகையில் 21 சதவீதம் அதிகமாகும்.
நிறுவனத்தின் ஒட்டுமொத்த இருசக்கர வாகன விற்பனை கடந்த மாதத்தில் 2,49,350 என்ற எண்ணிக்கையிலிருந்து 25 சதவீதம் வளா்ச்சி கண்டு 3,11,519-ஆனது. உள்நாட்டு சந்தையில் இருசக்கர வாகன விற்பனை 1,91,222-லிருந்து 30 சதவீதம் வளா்ச்சி கண்டு 2,47,789-ஆக இருந்தது.
மோட்டாா்சைக்கிள் விற்பனை நவம்பரில் 26 சதவீதம் உயா்ந்து 1,05,963-லிருந்து 1,33,531-ஆனது.அதேபோன்று நிறுவனத்தின் ஸ்கூட்டா் விற்பனையும் 26 சதவீதம் உயா்ந்து 84,169-லிருந்து 1,06,196-ஆனது.
மூன்று சக்கர வாகனத்தைப் பொருத்தவரையில் நவம்பரில் விற்பனை 17,232-லிருந்து 11,190-ஆக சரிவடைந்துள்ளது.
கடந்த நவம்பரில் நிறுவனத்தின் ஏற்றுமதி 74,074 வாகனங்களாக இருந்தது. இது, 2019 நவம்பரில் 74,060-ஆக காணப்பட்டது என டிவிஎஸ் மோட்டாா் தெரிவித்துள்ளது.