பஜாஜ் ஆட்டோ நிறுவனத்தின் வாகன விற்பனை சென்ற மார்ச் மாதத்தில் 10.98 சதவீதம் சரிந்தது.
இதுகுறித்து அந்த நிறுவனம் வெளியிட்டுள்ள அறிக்கையில் தெரிவித்துள்ளதாவது: பஜாஜ் ஆட்டோ சென்ற மார்ச்சில் 2,72,197 வாகனங்களை விற்பனை செய்தது. கடந்த ஆண்டு இதே கால அளவில் விற்பனையான 3,05,800 வாகனங்களுடன் ஒப்பிடுகையில் இது 10.98 சதவீதம் குறைவாகும்.
உள்நாட்டில் வாகன விற்பனை 2,04,281 என்ற எண்ணிக்கையிலிருந்து 17.13 சதவீதம் சரிவடைந்து 1,69,279-ஆக காணப்பட்டது.
ஒட்டுமொத்த மோட்டார் சைக்கிள் விற்பனை 7.57 சதவீதம் குறைந்து 2,44,235-ஆகவும், உள்நாட்டில் இதன் விற்பனை 14.33 சதவீதம் வீழ்ச்சியடைந்து 1,51,449-ஆகவும் காணப்பட்டது.
பஜாஜ் ஆட்டோ நிறுவனத்தின் வர்த்தக வாகனங்கள் விற்பனை சென்ற மார்ச்சில் 27,962 -ஆக இருந்தது. கடந்த ஆண்டு விற்பனையான 41,551 வாகனங்களுடன் ஒப்பிடுகையில் இது 32.70 சதவீத சரிவாகும்.
அதேசமயம், வெளிநாடுகளுக்கான பஜாஜ் வாகன ஏற்றுமதி அந்த மாதத்தில் 1,01,519 என்ற எண்ணிக்கையிலிருந்து 1.37 சதவீதம் உயர்ந்து 1,02,918-ஆக காணப்பட்டது என்று பஜாஜ் ஆட்டோ அந்த அறிக்கையில் தெரிவித்துள்ளது.