விழுப்புரம்

மக்களுக்குத் தேவையான திட்டங்களை நிறைவேற்ற அரசின் முதன்மைச் செயலா் அறிவுரை

19th Aug 2022 03:36 AM

ADVERTISEMENT

மக்களுக்குத் தேவையான திட்டங்களை அதிகாரிகள் திட்டமிட்டு செயல்படுத்த வேண்டும் என்று விழுப்புரம் மாவட்டக் கண்காணிப்பு அலுவலரும், தமிழக அரசின் திட்டமிடல் மேம்பாட்டுத் துறை முதன்மைச் செயலருமான ஹா் சஹாய் மீனா அறிவுறுத்தினாா்.

விழுப்புரம் மாவட்டத்தில் அனைத்துத் துறைகள் சாா்பில் செயல்படுத்தப்பட்டு வரும் வளா்ச்சிப் பணிகள் தொடா்பாக விழுப்புரம் மாவட்ட ஆட்சியா் அலுவலகக் கூட்டரங்கில் வியாழக்கிழமை ஆய்வுக் கூட்டம் நடைபெற்றது. இதில், முதன்மைச் செயலா் ஹா் சஹாய் மீனா பேசியதாவது:

அரசு அதிகாரிகள் எந்த ஒரு வளா்ச்சிப் பணிகளை அமல்படுத்தினாலும் முன்கூட்டியே திட்டமிட்டு செயல்பட வேண்டும். மேலும், பணிகளை திட்டமிட்ட உரிய காலத்துக்குள் செயல்படுத்த வேண்டும். அவ்வாறு மேற்கொள்ளப்படும் பணிகள் முழுமையாகவும், மக்களின் நீண்டகால பயன்பாட்டுக்க ஏற்ப இருக்கும்படியும் பாா்த்துக்கொள்ள வேண்டும். மக்களின் தேவைக்கேற்ப திட்டங்களை செயல்படுத்த வேண்டும்.

மழைக்காலம் தொடங்கிவிட்டதால், வேளாண் துறையின் மூலம் விவசாயிகளுக்கு உரிய வேளாண் இடுபொருள்களை வழங்க வேண்டும். அரசுத் திட்டப் பணிகளை உரிய காலத்துக்குள் மேற்கொள்ள வேண்டும் என்றாா்.

ADVERTISEMENT

பின்னா், விழுப்புரம் புதிய பேருந்து நிலையத்தை அரசு முதன்மைச் செயலா் ஹா் சஹாய் மீனா பாா்வையிட்டு, பேருந்து நிலையத்தை தினமும் சுகாதாரமான முறையில் பராமரிக்க வேண்டும் என அறிவுறுத்தினாா். தொடா்ந்து, விழுப்புரம நகரில் அமைந்துள்ள உழவா் சந்தையையும் பாா்வையிட்டு, விவசாயிகளுக்குத் தேவையான அடிப்படை வசதிகளை செய்து கொடுக்க வேண்டும் எனவும் அறிவுறுத்தினாா்.

கூட்டத்தில் மாவட்ட ஆட்சியா் த.மோகன், மாவட்ட வருவாய் அலுவலா் மு.பரமேஸ்வரி, மாவட்ட வருவாய் அலுவலா் (நில எடுப்பு) சரஸ்வதி, திண்டிவனம் சாா் - ஆட்சியா் எம்.பி.அமித், மகளிா் திட்ட இயக்குநா் காஞ்சனா, கூட்டுறவுச் சங்கங்களின் இணைப் பதிவாளா் யசோதா மற்றும் அரசு அலுவலா்கள் உள்பட பலா் கலந்துகொண்டனா்.

 

ADVERTISEMENT
ADVERTISEMENT