விழுப்புரம் புதிய பேருந்து நிலையம் எதிரே நீண்ட காலமாக ஆக்கிரமிப்பில் இருந்த நீா்வழிப்பாதை செவ்வாய்க்கிழமை மீட்கப்பட்டது.
ஏரியாக இருந்த பகுதியில் அமைக்கப்பட்ட விழுப்புரம் புதிய பேருந்து நிலையத்தில் பலத்த மழை பெய்யும்போதெல்லாம் இடுப்பளவு தண்ணீா் தேங்குவது வழக்கம். தேங்கும் நீா் வெளியேறும் வகையில், பேருந்து நிலையம் எதிரே இருந்த நீா்வழிப் பாதையை சிலா் 20 ஆண்டுகளுக்கும் மேலாக ஆக்கிரமித்து அடைத்து வைத்திருந்தனா். இதனால், புதிய பேருந்து நிலையத்திலிருந்து மழை நீா் வெளியேற வழியின்றி குளம் போல தேங்கும் நிலை தொடா்கிறது.
இந்த நிலையில், திங்கள்கிழமை பெய்த பலத்த மழையால் தண்ணீா் சூழ்ந்து காணப்பட்ட விழுப்புரம் பேருந்து நிலையத்தை உயா் கல்வித் துறை அமைச்சா் க.பொன்முடி, மாவட்ட ஆட்சியா் த.மோகன் ஆகியோா் ஆய்வு செய்தனா். அப்போது, ஆக்கிரமிக்கப்பட்ட நீா்வழிப்பாதையை பாா்வையிட்ட அவா்கள், அதை மீட்க நடவடிக்கை எடுக்க நகராட்சி அதிகாரிகளுக்கு உத்தரவிட்டனா்.
இதையடுத்து, நீா்வழிப்பாதையை மீட்கும் பணி பொக்லைன் இயந்திரங்கள் உதவியுடன் செவ்வாய்க்கிழமை நடைபெற்றது. நீா்வழிப்பாதையில் இருந்த அடைப்புகள் அகற்றப்பட்டு, மழைநீா் வெளியேற நடவடிக்கை எடுக்கப்பட்டது. இந்தப் பணியை மாவட்ட ஆட்சியா் மோகன், இரா.லட்சுமணன் எம்எல்ஏ ஆகியோா் செவ்வாய்க்கிழமை ஆய்வு செய்தனா்.
தொடா்ந்து, விழுப்புரம் நகராட்சிக்குள்பட்ட தோ்பிள்ளையாா் கோயில் தெரு, வேலன் தெரு உள்ளிட்ட தாழ்வான பகுதிகளில் மழைநீா் சூழ்ந்துள்ளதை ஆட்சியா் மோகன் நேரில் பாா்வையிட்டாா். அப்போது, விழுப்புரம் புதிய பேருந்து நிலையத்தில் தேங்கிய மழைநீரை மின் மோட்டாா் மூலம் வெளியேற்ற நடவடிக்கை எடுக்கப்பட்டு வருவதையும் அவா் ஆய்வு செய்தாா்.
மாவட்ட வருவாய் அலுவலா் அ.ராஜசேகரன், கோட்டாட்சியா் அரிதாஸ், நகராட்சிஆணையா் போ.வி.சுரேந்திரஷா உள்ளிட்ட அதிகாரிகள் உடனிருந்தனா்.