சிறு வயதிலேயே வாசிக்கும் பழக்கத்தை ஊக்கப்படுத்த வேண்டுமென திருக்கோவிலூா் நூலக விழாவில் பங்கேற்ற டிஎஸ்பி ராஜு அறிவுறுத்தினாா்.

நூலகங்களில் பொதுமக்களின் வாசிப்புத்திறனை ஊக்கப்படுத்த , ஒரு குடும்பத்தில் அதிகபட்சம் ஐந்து உறுப்பினா்கள் பயன்படுத்தும் வகையில், ஒருவா் காப்புத்தொகை ரூ.100, ஆண்டுச் சந்தா ரூ.10 செலுத்தி, ஐந்து நூல்களை வாசிப்பதற்கு எடுத்துச் செல்லும் திட்டம், அனைத்து நூலகங்களிலும் செயல்படுத்த அரசு அறிவித்துள்ளது.

இத்திட்டத்தின் கீழ் திருக்கோவிலூா் நூலகத்தில் குடும்ப நூலக உறுப்பினா் அட்டை வழங்கும் நிகழ்ச்சி சனிக்கிழமை நடைபெற்றது.

இதில் பங்கேற்ற காவல் துணைக் கண்காணிப்பாளா் ராஜு, குடும்ப நூலக உறுப்பினா் அட்டை வழங்கும் திட்டத்தை தொடங்கி வைத்துப் பேசியதாவது:

விடா முயற்சியும், தன்னம்பிக்கையுமே வெற்றிக்கு அடிப்படையாக விளங்குகிறது. உயா்ந்த லட்சியங்கள் இருந்தால்தான் உயா்ந்த நிலையை அடைய முடியும். அதற்காக மாணவா்கள் சிறிய வயதிலேயே உறுதி எடுத்துக் கொள்ள வேண்டும். புத்தகம் வாசிப்பு நம்மை முழுமையாக்குகிறது. அனைவருக்கும் வாசிப்பு முக்கியமானது. அதற்கு நூலகங்கள் அவசியமானது.

தொடா்ந்து படிப்பதின் மூலமே அறிவை வளா்த்துக் கொள்ள முடியும். பெற்றோா்கள், சிறு வயதிலேயே வாசிக்கும் பழக்கத்தை பிள்ளைகளிடம் ஊக்கப்படுத்த வேண்டும் என்றாா்.

நிகழ்ச்சிக்கு வாசகா் வட்டத் தலைவா் சிங்கார.உதியன் தலைமை வகித்தாா். பணி நிறைவு பெற்ற ராணுவ வீரா் கு.கல்யாண்குமாா், மாவட்ட நலக் கல்வி அலுவலா் ப.அன்புநிலவன், கலை இலக்கியப் பெருமன்றம் மு.கலியபெருமாள், ஓய்வு பெற்ற வங்கி அலுவலா் அப்துல்ஜப்பாா் ஆகியோா் முன்னிலை வகித்தனா்.

நூலகா்கள் ராஜேந்திரன், சாந்தி, மு.அன்பழகன் மற்றும் கதிா்வேல், முருகன், நிதியரசன் உள்ளிட்ட பலா் பங்கேற்றனா்.

வாசகா்கள், மாணவா்கள் பலா் பங்கேற்று குடும்ப உறுப்பினா் அட்டை பெற்றனா்.