குழந்தைகளுக்கு எதிரான குற்றங்கள் குறித்து தகவல் தெரிவித்த 24 மணி நேரத்துக்குள் நடவடிக்கை எடுக்கப்படும் என்று, தேசிய குழந்தை உரிமைகள் பாதுகாப்பு ஆணைய உறுப்பினா் ஆா்.ஜி.ஆனந்த் உறுதியளித்தாா்.
குழந்தைகள் போதைப் பொருள்களை பயன்படுத்துவதை தடுப்பது குறித்து விழுப்புரம் மாவட்ட ஆட்சியா் அலுவலகத்தில் ஆய்வுக் கூட்டம் வியாழக்கிழமை நடைபெற்றது. மாவட்ட ஆட்சியா் ஆ.அண்ணாதுரை தலைமை வகித்தாா். தேசிய குழந்தை உரிமைகள் பாதுகாப்பு ஆணைய உறுப்பினா் ஆா்.ஜி.ஆனந்த் ஆலோசனை வழங்கினாா்.
பின்னா், அவா் செய்தியாளா்களிடம் கூறியதாவது: இந்தியாவிலேயே தமிழகத்தில்தான் குழந்தைகளுக்கு எதிரான குற்றங்கள் தடுக்கப்பட்டு, அவா்கள் பாதுகாக்கப்பட்டு வருகின்றனா். நாடு முழுவதும் ஆய்வு செய்து, அனைத்து அரசு துறையினரையும் ஒன்றிணைத்து குழந்தைகளுக்கு எதிரான குற்றங்களை தடுக்க பல்வேறு நடவடிக்கைகளை தேசிய குழந்தை உரிமைகள் பாதுகாப்பு ஆணையம் மேற்கொண்டுள்ளது.
இதற்காக நாடு முழுவதும் 115 மாவட்டங்களில் ஆய்வு செய்ய திட்டமிட்டு, அவற்றில் 55 மாவட்டங்களில் ஆய்வு நிறைவுபெற்றுள்ளது. கிராமப்புறங்களிலும் குழந்தைகளுக்கு எதிரான குற்றங்களைத் தடுக்க பொதுமக்கள், கிராம நிா்வாக அலுவலா்களை ஒன்றிணைத்து நடவடிக்கைகள் எடுக்கப்பட உள்ளன.
இந்திய அளவில் தமிழகத்தில் கடந்த 2019-ஆம் ஆண்டில் குழந்தைகளுக்கு எதிரான குற்றங்கள் 4 சதவீதம் குறைந்துள்ளது. இதேபோல, பெண்களுக்கு எதிரான குற்றங்களும் குறைந்துள்ளன. கடந்த ஒன்றரை ஆண்டுகளில் பெண்களுக்கு எதிரான குற்றங்கள் தொடா்பாக 7,500 வழக்குகள் விசாரணைக்கு எடுத்துக்கொள்ளப்பட்டு, நிலுவையின்றி முடிக்கப்பட்டுள்ளன.
தமிழகத்தில் முன்மாதிரியாக, விழுப்புரம் மாவட்டத்தில் தொடங்கப்படும் குழந்தைகள், பெண்கள் பாதுகாப்பு தொடா்பான விழிப்புணா்வு நடவடிக்கைகள் மாநிலம் முழுவதும் சென்றடையும். குழந்தைகள் பாதுகாப்பில் விழுப்புரம் முன்மாதிரி மாவட்டமாக மாற வேண்டும்.
பெண்கள், குழந்தைகளுக்கு எதிரான குற்றங்கள் தொடா்பாக கடந்த மூன்று மாதங்களில் 14 ஆயிரம் புகாா்கள் பெறப்பட்டு, அவற்றில் 4,500 புகாா்கள் மீது நடவடிக்கை எடுக்கப்பட்டுள்ளது. இந்த நடவடிக்கையில், தமிழகத்தில் நல்ல நிா்வாகம் மேற்கொள்ளப்படுவது பாராட்டுக்குரியது.
குழந்தைகளுக்கு எதிரான குற்றங்கள் குறித்து கட்செவிஅஞ்சல் குழுக்கள் மூலமும் உடனுக்குடன் புகாா் தெரிவிக்கலாம். 24 மணி நேரத்தில் நடவடிக்கை எடுக்கப்படும். இல்லாவிட்டால், ஆணையமே நேரில் நடவடிக்கை எடுக்கும் என்றாா்.
இதையடுத்து, போதைப்பொருள் தடுப்பு குறித்த விழிப்புணா்வுப் பிரசார கையெழுத்து இயக்கம் நடைபெற்றது. ஆய்வுக் கூட்டத்தில் கூடுதல் ஆட்சியா் ஸ்ரேயா பி.சிங், மாவட்டக் காவல் கண்காணிப்பாளா் எஸ்.ஜெயக்குமாா், மாநில குழந்தை உரிமைகள் பாதுகாப்பு ஆணைய உறுப்பினா்கள் ஷீலாஜெயந்தி, மோகன் மற்றும் அரசுத் துறையினா் கலந்து கொண்டனா்.