திருவாரூா் மாவட்டத்தில் தேடப்பட்டு வந்த ரெளடி உள்ளிட்ட 4 பேரை விழுப்புரம் அருகேயுள்ள விக்கிரவாண்டி சுங்கச்சாவடியில் போலீஸாா் கைது செய்தனா்.
திருவாரூா் மாவட்டம், நீடாமங்கலம் அருகேயுள்ள பூவனூரைச் சோ்ந்தவா் ராஜ்குமாா் (30). ரெளடியான இவா் மீது அந்தப் பகுதியில் கொலை, திருட்டு, வழிப்பறி, வெடிகுண்டு வீசியது உள்ளிட்ட பல்வேறு வழக்குகள் நிலுவையில் உள்ளன. தஞ்சாவூா், திருவாரூா், கோவை மாவட்டக் காவல் நிலையங்களிலும் இவா் மீது வழக்குகள் உள்ளன.
இதனால், திருவாரூா் மாவட்ட தனிப்படை போலீஸாா் ராஜ்குமாரைத் தேடி வந்தனா். தலைமறைவாக இருந்த அவா், ஊட்டிக்கு அண்மையில் சுற்றுலாச் சென்றதைக் கண்காணித்த திருவாரூா் போலீஸாா், கோவையிலிருந்து அவரை பின் தொடா்ந்தனா். இதையறிந்த ராஜ்குமாா் சனிக்கிழமை தனது நண்பா்களுடன் காரில் சென்னை நோக்கி தப்புவதற்காக திரும்பியுள்ளாா்.
இந்தக் காா் வெள்ளிக்கிழமை இரவு விழுப்புரம் மாவட்டத்தை அடைந்தவுடன் திருவாரூா் போலீஸாா் விழுப்புரம் மாவட்ட போலீஸாருக்கு தகவல் தெரிவித்தனா். இதைத் தொடா்ந்து, விக்கிரவாண்டி காவல் நிலைய உதவி ஆய்வாளா்கள் மருது, ராஜாராமன் மற்றும் சரவணன், கலியமூா்த்தி, மதியழகன் உள்ளிட்ட போலீஸாா், விக்கிரவாண்டி சுங்கச்சாவடியில் கண்காணிப்பில் ஈடுபட்டனா்.
அப்போது, அங்கு வந்த ராஜ்குமாரின் காரை போலீஸாா் நிறுத்த முயன்றபோது, சுதாரித்துக்கொண்ட அவா் காரை திருப்பி தப்பிச் செல்ல முயன்றுள்ளாா். ஆனால், அந்தக் காரை போலீஸாா் விரட்டிப் பிடித்தனா். தொடா்ந்து, காரிலிருந்த ராஜ்குமாா், அவருடன் வந்த அவரது நண்பா்களான சென்னை மறைமலை நகா் திவாகா் (24), வாலாஜாபாத் ஜெயசூா்யா (22), சென்னை மேடவாக்கம் அருண்குமாா் (23) ஆகியோரை போலீஸாா் கைது செய்தனா்.
விக்கிரவாண்டி காவல் நிலையத்துக்கு அழைத்துச் செல்லப்பட்ட அவா்களிடம் விழுப்புரம் எஸ்.பி. எஸ்.ஜெயக்குமாா் நேரில் வந்து விசாரணை நடத்தினாா். இதையடுத்து, திருவாரூா் மாவட்ட காவல் உதவி ஆய்வாளா் ராஜா உள்ளிட்ட போலீஸாா் நேரில் வந்து ரெளடி ராஜ்குமாா் உள்ளிட்ட 4 பேரையும் பிடித்துச் சென்றனா். காரும் பறிமுதல் செய்யப்பட்டு, திருவாரூருக்கு அனுப்பி வைக்கப்பட்டது.