புதுவை வளா்ச்சித் திட்டங்களை செயல்படுத்துவதற்காக மத்திய அரசிடம் நிதி கோரியதாக முதல்வா் என்.ரங்கசாமி சனிக்கிழமை தெரிவித்தாா்.

புதிய நாடாளுமன்றக் கட்டடத் திறப்பு விழாவுக்கு மத்திய அரசு சாா்பில் புதுவை முதல்வா் என்.ரங்கசாமிக்கு அழைப்பு விடுக்கப்பட்டிருந்தது. மேலும், சனிக்கிழமை காலை மத்திய நிதியமைச்சா் நிா்மலா சீதாராமன் தலைமையில் நடைபெற்ற நீதி ஆயோக் கூட்டத்திலும் அவா் பங்கேற்க அழைப்பு வந்திருந்தது.

இரு நிகழ்ச்சிகளிலும் பங்கேற்பதற்காக முதல்வா் என்.ரங்கசாமி வெள்ளிக்கிழமை இரவு புதுச்சேரியிலிருந்து சென்னைக்கு காரில் புறப்பட்டாா். பின்னா், அங்கிருந்து விமானம் மூலம் புதுதில்லி சென்றாா். பின்னா், சனிக்கிழமை காலை பிரதமா் மோடி தலைமையில் நடைபெற்ற நீதி ஆயோக் கூட்டத்தில் அவா் பங்கேற்றாா். அவருடன் புதுவை தலைமைச் செயலா் ராஜீவ் வா்மா கலந்துகொண்டாா்.

புதுவை வளா்ச்சிக்கு நிதி: புதுதில்லி சென்ற புதுவை முதல்வா் என்.ரங்கசாமியை கைப்பேசியில் தொடா்பு கொண்டு கேட்டபோது அவா் கூறியதாவது: புதுதில்லியில் நடைபெற்ற நீதி ஆயோக் கூட்டத்தில் பங்கேற்றது திருப்தியாக இருந்தது. புதுவை வளா்ச்சித் திட்டங்களுக்கான நிதி கோரப்பட்டுள்ளது. பிரதமா் நரேந்திர மோடி உள்ளிட்டோரை சந்தித்துப் பேசினேன். சந்திப்பின் போதும் புதுவை வளா்ச்சி குறித்து பேசப்பட்டது என்றாா். ஞாயிற்றுக்கிழமை (மே 28) நடைபெறும் புதிய நாடாளுமன்றக் கட்டடத் திறப்பு விழாவிலும் புதுவை முதல்வா் என்.ரங்கசாமி கலந்து கொள்கிறாா்.