அறிவியல் தொழில்நுட்பமே சமூக பிரச்னைகளுக்கு தீா்வுகளைத் தரும் என, ஜி20 மாநாட்டின் ‘அறிவியல் 20’ பிரிவின் தலைமைப் பொறுப்பாளா் பேராசிரியா் அசுதோஷ் ஷா்மா தெரிவித்தாா்.
புதுச்சேரி கடலூா் சாலையிலுள்ள தனியாா் விடுதியில் ஜி20 மாநாட்டுப் பிரதிநிதிகள் கலந்தாய்வுக் கூட்டம் திங்கள்கிழமை தொடங்கியது. இதில் இந்தியா, அமெரிக்கா, ஆஸ்திரேலியா, ஸ்வீடன், பிரிட்டன், இந்தோனேசியா உள்ளிட்ட ஜி20 கூட்டமைப்பு நாடுகளின் தூதரக அதிகாரிகள், பல்கலைக்கழகப் பேராசியா்கள் உள்பட 70 போ் கலந்து கொண்டனா்.
சமூக சீா்த்திருத்தங்களுக்கு அறிவியல்: ‘அறிவியல் தொழில்நுட்ப மேம்பாடு’ என்னும் தலைப்பில் நடைபெற்ற கூட்டத்தை, ஜி20 மாநாட்டின் ‘அறிவியல் 20’ பிரிவின் தலைமைப் பொறுப்பாளா் பேராசிரியா் அசுதோஷ் ஷா்மா தொடக்கிவைத்துப் பேசியதாவது:
உலக அளவில் வளா்ச்சிக்கு அவசியமான அறிவியலையும், தொழில்நுட்பத்தையும் மதிக்கிற பல்வேறு நாடுகளைச் சோ்ந்த விஞ்ஞானிகள் பங்கேற்கும் கூட்டத்தை இந்தியா நடத்துவது பெருமைக்குரியது. அறிவியல் என்பது நமது பொருளாதார வளா்ச்சிக்கு மட்டும் பங்காற்றுவதில்லை. சமூக சீா்திருத்தங்களுக்கும் அது உதவுகிறது. அறிவியல் வளா்ச்சியால்தான், உலகளவில் வறுமை விகிதம் பெருமளவு குறைந்துள்ளது.
பல்வேறு தரப்பட்ட ஒத்துழைப்பு, நட்புறவுடன் அறிவியல் ஆராய்ச்சி, கல்வி மற்றும் புத்தாக்கங்களை உலகளவில் முன்னெடுக்கும் வகையில் இந்தக் கூட்டத்தில் பங்கேற்றுள்ளோம்.
தற்போதைய தலைமுறையினா் அறிவியல் வளா்ச்சியின் வசதிகளைப் பெற்று வளா்கின்றனா். உலக மக்கள்தொகையில் இளைஞா்களின் எண்ணிக்கை பெரும்பங்கு வகிக்கிறது. தற்போது பிறக்கும் குழந்தைகள் நம்பிக்கை மிகுந்த காலகட்டத்தில் உள்ளனா். ஆனாலும், எதிா்கால தலைமுறையினருக்கு பல்வேறு பிரச்னைகள் உள்ளன.
நமது வீடுகள் எண்ம (டிஜிட்டல்) மயமாகின்றன. ஆனால், சமூகத்தில் இதற்கு இணையான மாற்றங்கள் மெதுவாகவே நிகழ்கின்றன. நாம் முன்வைக்கும் அறிவியல் தொழில்நுட்பமே சமூகத்தில் புதிய தீா்வுகளை தரும் என்றாா் அவா்.
பெங்களூரு இந்திய அறிவியல் கழக இயக்குநா் ஜி.ரங்கராஜன் பேசியதாவது:
ஜி 20 கூட்டமைப்பு நாடுகளின் இலக்கை அடைவதற்கு, அறிவியல், தொழில்நுட்பம் முக்கியப் பங்காற்றுகிறது. தற்காலத்துக்கும், எதிா்காலத்துக்கும் மிகப் பெரும் பிரச்னைகளாக உள்ள பருவநிலை மாற்றம், பெருந்தொற்றுப் பரவல், எரிசக்தி பாதுகாப்பு, நீா் மேலாண்மை, உணவுப் பற்றாக்குறை ஆகியவற்றை ஒரு நாட்டால் மட்டும் தன்னளவில் தீா்த்துவிடமுடியாது. அதற்கு பல்வேறு நாடுகளின் ஒத்துழைப்பும், நட்புறவும் அவசியம் என்றாா்.
ஜூலைக்குப் பிறகு கொள்கை அறிக்கை: கலந்தாய்வுக் கூட்டத்துக்குப் பிறகு செய்தியாளா்களிடம் பேராசிரியா் அசுதோஷ் ஷா்மா கூறியதாவது:
ஜி20 அமைப்பின் ‘அறிவியல் 20’ பிரிவு ஆக்கப்பூா்வமான தீா்வுகளை வழங்கும். அறிவியலை சமூகத்தின் ஓா் அங்கமாக மாற்றுவதற்கும் இது ஒரு தளமாகச் செயல்படுகிறது.
அறிவியல் ஆய்வுகளின் அடிப்படையில் புதுமையான நடைமுறைகள் மூலம் மட்டுமே வாழ்க்கைத் தரத்தை மேம்படுத்த முடியும். மனிதகுலம் எதிா்கொள்ளும் பிரச்னைகளை தீா்க்க புதுமையான சிந்தனைகள் உருவாக வேண்டும். அதனடிப்படையில், ஜி20 அமைப்பு நாடுகளின் ஈடுபாடுகள், கொள்கைக் கட்டமைப்புகளுடன் வெளிவர வேண்டும். அறிவியல் ஆராய்ச்சி, கல்வி மற்றும் கண்டுபிடிப்புகளை மேலும் மேம்படுத்த வேண்டியது மிக அவசியம்.
ஜி20 உறுப்பு நாடுகளின் வாழ்க்கை தரத்தை மேம்படுத்த அறிவியல் உலகில் சமீபத்திய முன்னேற்றங்களைப் பயன்படுத்துவது குறித்து அறிக்கை வெளியிடுவோம்.
மொத்தம் ஐந்து கலந்தாய்வுக் கூட்டங்கள் நிறைவடைந்த பிறகு, ஜூலை மாதத்துக்குப் பிறகு பொருத்தமான நடைமுறைகளைப் பின்பற்றுவதற்கான கொள்கை அறிக்கை வெளியிடப்படும் என்றாா் அவா்.
முன்னதாக, கூட்டத்துக்கு வந்த இந்திய மற்றும் வெளிநாட்டுப் பிரதிநிதிகளை புதுவை தலைமைச் செயலா் ராஜீவ் வா்மா, புதுச்சேரி மாவட்ட ஆட்சியா் இ.வல்லவன், டிஜிபி மனோஜ்குமாா்லால், கூடுதல் டிஜிபி ஆனந்தமோகன், ஐ.ஜி. வி.ஜெ.சந்திரன் ஆகியோா் வரவேற்றனா்.
மாநாட்டுப் பிரதிநிதிகள் சா்வதேச நகரான ஆரோவிலுக்கு செவ்வாய்க்கிழமை காலை (ஜன.31) செல்ல உள்ளனா்.