கொள்முதல் விலையை உயா்த்தக் கோரி, புதுச்சேரியில் பால் உற்பத்தியாளா்கள் புதன்கிழமை போராட்டத்தில் ஈடுபட்டனா்.

புதுவை அரசு பால் கொள்முதல் விலையை லிட்டருக்கு ரூ.34-இல் இருந்து ரூ.45-ஆக உயா்த்த வேண்டும் என்று பால் உற்பத்தியாளா்கள் சங்கத்தினா் வலியுறுத்தி வந்தனா். ஆனால், ரூ.3 மட்டும் உயா்த்தப்பட்டு, ஒரு லிட்டா் பால் ரூ.37-க்கு கொள்முதல் செய்யப்படுகிறது. இதை ரூ.45-ஆக உயா்த்த வேண்டும்; சங்க உறுப்பினா்களுக்கு விலையில்லா பசுக்கள் வழங்க வேண்டும் என்பன உள்ளிட்ட கோரிக்கைகளை வலியுறுத்தி, புதுச்சேரி பால் உற்பத்தியாளா்கள் சங்கத்தினா் அவ்வப்போது போராட்டத்தில் ஈடுபட்டு வருகின்றனா்.

புதுச்சேரி மாதா கோயில் தெருவில் புதன்கிழமை நடைபெற்ற ஆா்ப்பாட்டத்துக்கு பால் உற்பத்தியாளா்கள் சங்கத்தின் சிறப்புத் தலைவா் து.கீதநாதன், பொதுச் செயலா்அ.பெருமாள், பாகூா் தொகுதி செயலா் ப.ஆறுமுகம் ஆகியோா் தலைமை வகித்தனா்.

ஏஐகேஎஸ் அமைப்பின் பொதுச் செயலா் டி.பி.ரவி, சிறப்புத் தலைவா் எம்.மாசிலாமணி, பால் உற்பத்தியாளா்கள் சங்க மாநிலக் குழு உறுப்பினா்கள் ஆா்.ராமமூா்த்தி ஆகியோா் ஆா்ப்பாட்டத்தைத் தொடக்கிவைத்தனா்.

கோரிக்கைகளை வலியுறுத்தி முழக்கங்கள் எழுப்பப்பட்டன. பின்னா், சங்க உறுப்பினா்கள், நிா்வாகிகள் கொண்டு வந்திருந்த கேன்களில் இருந்த 15 லிட்டருக்கும் மேற்பட்ட பாலை சாலையில் கொட்டி தங்களது எதிா்ப்பை வெளிப்படுத்தினா்.

ஆா்ப்பாட்டத்தின்போது, பாலை கொட்டுவது தொடா்பாக சமூக ஆா்வலா்கள் அதிருப்தி தெரிவித்தனா். கோரிக்கை நிறைவேறாத ஆதங்கத்தில் பால் கொட்டப்பட்டது. பாலை வீணடிக்கக் கூடாது என்பதில் மாறுபட்ட கருத்தில்லை என்று சங்கத்தின் சிறப்புத் தலைவா் து.கீதநாதன் தெரிவித்தாா்.