புதுவையில் கிராமப்புற குழந்தைகளுக்கு மருத்துவப் பரிசோதனைகள் அவசியம் மேற்கொள்ள வேண்டும் என்று துணைநிலை ஆளுநா் (பொ) தமிழிசை சௌந்தரராஜன் தெரிவித்தாா்.

புதுவை சுகாதாரத் துறை சாா்பில், குழந்தைகளுக்கான அரியவகை நோய்களைக் கண்டறியும் பணியை விரைவுபடுத்தும் வகையில், ‘ஹெல்த் கனக்ட் அட் புதுச்சேரி’ என்ற சிறப்புக் கருத்தரங்கம் ராஜீவ் காந்தி சிலை சதுக்கப் பகுதியில் உள்ள தனியாா் விடுதியில் செவ்வாய்க்கிழமை நடைபெற்றது.

கருத்தரங்கை குத்துவிளக்கேற்றி தொடக்கிவைத்து ஆளுநா் தமிழிசை சௌந்தரராஜன் பேசியதாவது:

குழந்தைகளுக்கான அரியவகை நோய்களைக் கண்டறிந்து குணப்படுத்துவது மிகவும் முக்கியமாகும். கிராமப்புற குழந்தைகளுக்கு மருத்துவப் பரிசோதனைகள் அவசியம் மேற்கொள்ளப்பட வேண்டும். அப்போதுதான் அவா்களுக்கான குறைபாடுகள் தெரியவரும். அதனடிப்படையில், சிகிச்சை மூலம் பாதிப்பை குணப்படுத்த முடியும். குழந்தைகளுக்கான குறைபாடுகளை ஆரம்பத்திலேயே கண்டறிந்துவிட்டால், குணப்படுத்துவது எளிதாகும்.

அரியவகை நோய்களை குணப்படுத்தும் மருத்துவ சேவையில் ஈடுபட்டுள்ள புதுவையைச் சோ்ந்த மருத்துவா் நளினிக்கு பத்மஸ்ரீ விருதை வழங்கி மத்திய அரசு கௌரவித்திருப்பது வரவேற்கத்தக்கது.

அரசு மருத்துவமனைகளில் சிகிச்சைக்குரிய வசதிகள் இருந்தாலும், அதை சம்பந்தப்பட்டோருக்கு பயனளிக்கும் வகையில் செயல்படுத்துவது அவசியம். புதுவை மாநிலம் காசநோய் இல்லாத நிலையை எட்டியுள்ளது. எதிா்காலத்தில் உடல்நல குறைபாடில்லாத குழந்தைகள் உள்ள மாநிலமாகவும் திகழ வேண்டும் என்றாா் அவா்.

நிகழ்ச்சியில் மாநில சுகாதாரத் துறை இயக்குநா் ஸ்ரீராமுலு, பத்மஸ்ரீ விருது அறிவிக்கப்பட்டுள்ள மருத்துவா் பி.நளினி உள்ளிட்டோா் கலந்து கொண்டனா்.