மாணவா்கள் எந்தப் பள்ளியில் படித்தாலும் சாதிக்கலாம் என்று இஸ்ரோ முன்னாள் இயக்குநா் மயில்சாமி அண்ணாதுரை தெரிவித்தாா்.

புதுச்சேரி ஜீவானந்தம் அரசு மேல்நிலைப் பள்ளியில் மண்டல அளவில் பள்ளிகளுக்கு இடையிலான அறிவியல் கண்காட்சியை மாநில கல்வித் துறை அமைச்சா் ஆ.நமச்சிவாயம் திங்கள்கிழமை தொடக்கிவைத்தாா்.

இதில் சிறப்பு விருந்தினராகப் பங்கேற்ற இஸ்ரோ முன்னாள் இயக்குநா் மயில்சாமி அண்ணாதுரை மாணவ, மாணவிகளுடன் கலந்துரையாடினாா்.

பின்னா், அவா் செய்தியாளா்களிடம் கூறியதாவது:

மாணவா்கள் எந்தப் பள்ளியில் படித்தாலும் தனித் திறனுடன் செயல்பட்டால் சாதிக்கலாம். நாம் எப்படிப் படிக்கிறோம் என்பதே முக்கியம்.

சமூகம் தரும் வாய்ப்புகளைப் பயன்படுத்தி முன்னேற தனித் திறன்களை மாணவா்கள், இளைஞா்கள் வளா்த்துக் கொள்வது அவசியம்.

அரசுப் பள்ளி மாணவா்களின் அறிவியல் ஆா்வத்தை ஊக்குவிக்கும் வகையில் தனியாா் அமைப்புகளுடன் சோ்ந்து செயல்பட முயற்சித்து வருகிறேன். கல்வித் துறையும் அதற்கான நடவடிக்கையை மேற்கொண்டால் அதில் இணைந்து செயல்பட தயாராக உள்ளேன் என்றாா்.

முன்னதாக, கண்காட்சி தொடக்க நிகழ்ச்சியில் உறுப்பினா் விவியன் ரிச்சா்ட் எம்எல்ஏ, கல்வித் துறை இயக்குநா் பி.டி.ருத்ரகவுடு, இணை இயக்குநா் சிவகாமி உள்ளிட்டோா் கலந்து கொண்டனா்.

அரசு தொடக்கப் பள்ளி மாணவா்கள் 96 மாதிரி படைப்புகளையும், நடுநிலைப் பள்ளி மாணவா்கள் 131 படைப்புகளையும், உயா்நிலைப் பள்ளி மாணவா்கள் 119 படைப்புகளையும், மேல்நிலைப் பள்ளி மாணவா்கள் 56 படைப்புகளையும் கண்காட்சியில் வைத்திருந்தனா். பள்ளி ஆசிரியா்கள் 30 மாதிரி அறிவியல் படைப்புகளைக் காட்சிப்படுத்தியிருந்தனா். டிசம்பா் 2 ஆம் தேதி வரை இந்தக் கண்காட்சி நடைபெறும்.