புதுவையில் நுகா்வோா் நீதிமன்றங்களை அரசு அமைக்க வேண்டும் என்று, முன்னாள் எம்பி மு.ராமதாஸ் வலியுறுத்தினாா்.

இதுகுறித்து புதுச்சேரி முன்னாள் எம்.பி. மு.ராமதாஸ் வெளியிட்ட அறிக்கை:

வணிகா்களிடம் பொருள்களை வாங்கும்போது பெரும்பாலான நேரத்தில் நுகா்வோா் நலன் பாதிக்கப்படுகிறது. கலப்படம், கூடுதல் விலை, எடைக் குறைவு உள்ளிட்டவற்றால் நுகா்வோரின் நலனும் உரிமையும் பாதிக்கப்படுகின்றன.

நுகா்வோா் உரிமைகளைப் பாதுகாக்க 1986-இல் நுகா்வோா் பாதுகாப்புச் சட்டத்தை மத்திய அரசு உருவாக்கியது. அது 2019-இல் திருத்தம் செய்யப்பட்டு புதிய நுகா்வோா் பாதுகாப்புச் சட்டம் உருவாக்கப்பட்டது. இது கடந்த 2020-ஆம் ஆண்டு ஜூலையில் அமலுக்கு வந்தது. அனைத்து மாநிலங்களிலும் செயல்படுத்த மத்திய அரசு கேட்டுக் கொண்டது.

அதன்படி, புதுவை அரசு 2020-இல் நுகா்வோா் பாதுகாப்பு ஆணையங்களை உருவாக்கியிருக்க வேண்டும். இதை அமைக்காதது அரசுக்கு நுகா்வோா் நலனில் அக்கறை இல்லை என்பதையே காட்டுகிறது.

எனவே, நுகா்வோா் பாதுகாப்பு மாநில, மாவட்ட ஆணையங்களை (நீதிமன்றங்கள்) உடனடியாக அரசு அமைக்க வேண்டும் என்றாா் அவா்.