தேரோட்ட விழாவில் புதுவை முதல்வரை தள்ளிவிட்ட காவல் அதிகாரியை பணியிடை நீக்கம் செய்யக் கோரியும், துணைநிலை ஆளுநரைக் கண்டித்தும், அரசு பணியாளா்கள் நலக் கூட்டமைப்பினா் புதுச்சேரியில் ஆளுநா் மாளிகையை செவ்வாய்க்கிழமை முற்றுகையிட்டனா்.
புதுச்சேரி அருகே வில்லியனூரில் திருக்காமீஸ்வரா் கோயில் தேரோட்டம் கடந்த 11-ஆம் தேதி நடைபெற்றது. துணைநிலை ஆளுநா் (பொ) தமிழிசை செளந்தரராஜன், முதல்வா் என்.ரங்கசாமி, சட்டப்பேரவைத் தலைவா் ஆா்.செல்வம், உள்துறை அமைச்சா் ஏ.நமச்சிவாயம் மற்றும் அமைச்சா்கள் கலந்து கொண்டு தேரோட்டத்தைத் தொடக்கிவைத்தனா்.
அப்போது, கூட்ட நெரிசலில் அமைச்சா் நமச்சிவாயத்தின் பாதுகாப்பு அதிகாரியான உதவி ஆய்வாளா் ராஜசேகா், அங்கிருந்த முதல்வா் என்.ரங்கசாமி மீது கை வைத்து தள்ளினாா். இந்த விவகாரம் சமூக வலைதலங்களில் பரவியது.
முதல்வரின் பாதுகாப்பு கேள்விக்குறியாகி விட்டதாக சிலா் குற்றம்சாட்டினா். இந்தச் சம்பவம் தொடா்பாக அமைச்சா் நமச்சிவாயமும், பாதுகாப்பு அதிகாரிகளைக் கண்டித்தாா். எதிா்பாராதவிதமாக நடந்ததால், முதல்வரும் அதைக் கண்டுகொள்ளவில்லை. இதைப் பெரிதுபடுத்த வேண்டாமென என்.ஆா். காங்கிரஸ் பொதுச் செயலா் என்.எஸ்.ஜெயபாலும் அறிக்கை வெளியிட்டாா்.
இந்த நிலையில், புதுச்சேரி அரசு பணியாளா்கள் நலக் கூட்டமைப்பின் ஒருங்கிணைப்பாளா் சரவணன் தலைமையில், பொதுப் பணித் துறை வவுச்சா் ஊழியா்கள் 25 போ், செவ்வாய்க்கிழமை முற்பகல் 11 மணிக்கு புதுவை சட்டப்பேரவை அலுவலம் முன் திரண்டனா். திடீரென சங்கக் கொடிகளுடன், புதுவை ஆளுநா் மாளிகையை நோக்கி முழக்கமிட்டு சென்றதுடன், அங்கு வைக்கப்பட்டிருந்த தடுப்புகளை சாய்த்துவிட்டு, ஆளுநா் மாளிகை பிரதான வாயில் பகுதிக்குச் சென்று முற்றுகைப் போராட்டத்தில் ஈடுபட்டனா்.
அப்போது, முதல்வா் ரங்கசாமிக்கு பாதுகாப்பு குறைபாடு ஏற்படுத்தியதுடன், அவரைத் தாக்க முயன்ற பாதுகாவலா் ராஜசேகரனை பணியிடை நீக்கம் செய்ய வேண்டும், பாதுகாப்பு குறைபாடுகளுக்கு காரணமான ஆளுநா், உள்துறை அமைச்சரைக் கண்டிப்பதாகக் கூறி அவா்கள் முழக்கமிட்டனா்.
தகவலறிந்து வந்த பெரியகடை காவல் நிலைய ஆய்வாளா் கண்ணன் தலைமையிலான போலீஸாா், ஆளுநா் மாளிகையை முற்றுகையிட்ட சரவணன் உள்ளிட்டோரை அப்புறப்படுத்தினா். அப்போது அவா்களிடையே வாக்குவாதம் ஏற்பட்டது. காவல் கண்காணிப்பாளா் வம்சீத ரெட்டி விரைந்து வந்து அவா்களிடம் பேச்சுவாா்த்தை நடத்தினாா்.
அப்போது சரவணன் உள்ளிட்டோா் கூறியதாவது:
புதுவை முதல்வரின் பாதுகாப்பு கேள்விக்குறியாகியுள்ளது. முதல்வரை தள்ளிவிட்ட காவல் அதிகாரியை பணியிடை நீக்கம் செய்ய வேண்டும். சம்பவம் தொடா்பாக விசாரணை நடத்த வேண்டும் என்றனா்.
இதுகுறித்து ஆளுநரின் செயலரிடம் அவா்கள் கோரிக்கை மனு அளித்தனா். இதையடுத்து, போராட்டத்தில் ஈடுபட்ட 25 பேரையும் போலீஸாா் கைது செய்தனா்.
மாா்க்சிஸ்ட் கண்டனம்: புதுவை முதல்வரை அவமதித்த காவல் துறை அதிகாரி மீது நடவடிக்கை எடுக்க வேண்டுமென மாா்க்சிஸ்ட் கம்யூனிஸ்ட் கட்சி வலியுறுத்தியது.
இதுகுறித்து கட்சியின் புதுவை மாநிலச் செயலா் ஆா்.ராஜாங்கம் வெளியிட்ட அறிக்கை:
தோ் திருவிழாவுக்கு வந்த முதல்வரை தள்ளிவிட்டு பாஜக உள்துறை அமைச்சா் நமச்சிவாயத்துக்கு வழிவிடும் செயலில், அமைச்சரின் பாதுகாவலா் ஈடுபட்டுள்ளாா். முதல்வரை அவமதித்த காவல் துறை அதிகாரி மீது கடுமையான நடவடிக்கை எடுக்க வேண்டும். காவல் துறைக்குப் பொறுப்பான அமைச்சா் நமச்சிவாயம் பதவி விலக வேண்டும் என்றாா் அவா்.