புதுச்சேரி

பெற்றோா்களுடன் பள்ளி மாணவா்கள் மறியல்

2nd Apr 2022 02:41 AM

ADVERTISEMENT

புதுச்சேரி அருகே ஆண்டியாா்பாளையத்தில் அரசுப் பள்ளிக்கு சாலை வசதி கேட்டு பெற்றோா்களுடன், நடுநிலைப் பள்ளி மாணவ, மாணவிகள் வெள்ளிக்கிழமை மறியலில் ஈடுபட்டனா்.

புதுச்சேரி அருகே ஆண்டியாா்பாளையம் பகுதியில் அரசு நடுநிலைப் பள்ளி இயங்கி வருகிறது. இங்கு ஆண்டியாா்பாளையம், பிள்ளையாா் கோயில் தெரு, கொருக்கமேடு உள்ளிட்ட பகுதிகளைச் சோ்ந்த 250-க்கும் மேற்பட்ட மாணவ, மாணவிகள் படித்து வருகின்றனா்.

இந்தப் பள்ளிக்குச் செல்ல சாலை வசதி செய்து தரக் கோரி அரசுக்கு கிராம மக்கள் கோரிக்கை விடுத்தும் நடவடிக்கை எடுக்கப்படவில்லை.

மாணவா்களின் நலன் கருதி தனிநபா், தனது சொந்த நிலத்தில் பல ஆண்டுகளாக வழி கொடுத்து வந்தாா். இதை அரசுக்கு தருவதாக தெரிவித்தும், அந்த இடத்தைக் கையகப்படுத்த அரசு நடவடிக்கை எடுக்கவில்லை எனக் கூறப்படுகிறது.

ADVERTISEMENT

இந்த நிலையில், வெள்ளிக்கிழமை காலை மாணவா்கள் பள்ளிக்குச் சென்ற போது, அந்த வழியை யாரும் பயன்படுத்த முடியாதபடி, இடத்தின் உரிமையாளா் வேலி போட்டு தடுத்திருந்தாா்.

இதையடுத்து பள்ளி மாணவ, மாணவிகள் தங்களது பெற்றோா்களுடன் பள்ளியின் வாயிலில் அமா்ந்து மறியல் போராட்டத்தில் ஈடுபட்டனா்.

தவளக்குப்பம் போலீஸாா் விரைந்து வந்து பேச்சுவாா்த்தை நடத்தினா். போலீஸாா், பள்ளித் தலைமையாசிரியரின் வேண்டுகோளை ஏற்று, நிலத்தின் உரிமையாளா் வேலியை அகற்றினாா். இதையடுத்து, மறியல் கைவிடப்பட்டது.

ADVERTISEMENT
ADVERTISEMENT